ሚሺራቹዋ ቃላው ኪቴቴዳ ኣሳቱዋ
1ሃዋፔ ካላ ጎዳይ ሃራ ላፑን ታሙ ኣሳ ሱንꬂዴ ላዑዋ ላዑዋ ኡዲዴ ኢ ባናው ዴዒያ ካታማ ኡባ ኪቴዳ። 2ዬሱሲ ኡንቱንታ፥
«ቆይቻው ጋኬዳ ካꬃይ ዳራ፤ ኪቴቲያ ኣሳይ ጉꬃ። ሲሚ ቆይጬቲያ ካꬃ ጎዳይ፥ ቆይቻው ኪቴቲያዋንታ ዬዳና ማላ ዎሲቴ። 3ታኒ ዶርሳቱዋዳን ዋላቱዋ ጊዶ ሂንቴና ኪታይ፥ ቢቴ። 4ሂንቴንቱ ኦጌው ኣያኔ ኦይቆፒቴ፡ ቦርሳ፥ ቃርጪቲያ፥ ጫማ፥ ጊዲናካ ኦይቆፒቴ፤ ኣሳና ሳሮቴቲዴ ኦጊያን ዎዲያ ዉርሶፒቴ።
5«ሂንቴንቱ ጌሊያ ጎሌ ኡባ ካሲያን፥ ‹ሳሮቴꬃይ ሃ ጎሌው ጊዶ› ያጊቴ። 6ሄ ጎሊያን ሳሮቴꬃ ዶሲያ ኣሳይ ዴዖፔ፥ ሂንቴንቱ ሳሮታይ ሄ ጎሊያን ኣቃናዋ፤ ኮዬናዋ ጊዶፔ፥ ሂንቴንቱ ሳሮታይ ሂንቴንቶ ሲማናዋ። 7ሄ ጎሊያን ኡንቱንቶ ዴዒያዋፔ ሚዲኔ ኡሺዴ ዴዒሺቴ፤ ኦሳንቻው ኣ ዲርጉዋ ጪጋይ ኮሼ፤ ኢቲ ጎሊያፔ ሃራ ጎሊያ ዩዮፒቴ።
8«ኣይ ካታማኔ ሂንቴንቱ ጌሊያ ዎዴ፥ ኣሳይ ሂንቴና ሞኪ ኣኪዴ ሚዛናው ሺሾዋ ኣያኔ ሚቴ። 9ሄ ካታማቲን ዴዒያ ሃርጋንቻቱዋ ፓꬂዴ ኣሳው፥ ‹ፆሳ ካዉቴꬃይ ሂንቴኮ ማቴዳ› ያጊዴ ኦዲቴ። 10ዬዉዋን ቃሲ ኣይ ካታማኔ ጌሎዴ፥ ኣሳይ ሂንቴንታ ሞኪ ኣኬናዋንታ ጊዶፔ ሄ ካታማ ቃꬋኮ ኬሲኔ፥ 11‹ኑኒ ሂንቴና ዬላያናው፥ ሃራይ ኣቶ ኑ ጌዲያ ቦላን ዴዒያ ሂንቴንቱ ካታማ ባናካ ሂንቴንቶ ቆቆፌቶ ፤ ዬዉዋን ቃሲ፥ ፆሳ ካዉቴꬃይ ሂንቴንቱኮ ማቴዳዋ ኤሪቴ› ያጊቴ። 12ፒርዳ ጋላሲ ሃ ካታማቲፔ ሶዶማ ካታማ ጋኬዳ ሙራይ ካዉሻናዋ ያጋዴ ታኒ ሂንቴው ኦዳይ።
ኣማኔናን ኢፄዳ ካታማቱዋ
(ማት 11፡20-24)
13«ኣዬ ኔው ኮራዚኔ፤ ኣዬ ኔው ቤቴሳይዴ፤ ሂንቴንቱን ሃኔዳ ማላታቱ ፂሮሳ ካታማኒኔ ሲዶና ካታማን ሃኔዴንቶ፥ ሄዋን ዴዒያ ኣሳቱ ካዩዋ ማዩዋ ማዪዴ፥ ቢዲንꬃ ቦላን ኡቲዴ፥ ቤኒፔ ባሬንቱ ናጋራፔ ሲማናዋንታሺን። 14ሃዋ ዲራው፥ ሙሬቲያ ጋላሲ ሂንቴንቱፔ ኣꬂዴ ፂሮሳ ካታማዉኔ ሲዶና ካታማው ሙራይ ካዉሻናዋ። 15ሃኔ ቂፊሪናሆሜ፥ ኔኒ ሳሉዋ ፑዴ ꬎቁ ጋናው ኮያዲ? ዱጌ ሲዖሊያ ዎꬋናሳ።
16«ሂንቴንቱ ጊያዋ ሲሲያ ኣሳይ፥ ታኒ ጊያዋ ሲሴ፤ ሂንቴንታ ኢፂያ ኡራይ ታና ኢፄ፤ ታና ኢፂያ ኡራይ ታና ኪቴዳዋካ ኢፄ» ያጌዳ።
ኣ ካሊያዋንቱ ኪቴቴዳሳፔ ሲሜዲኖ
17ላፑን ታሙ ኣሳቱካ፥ «ጎዳው፥ ኢታ ኣያናቱካ ኔ ሱንꬃን ኑሲ ኣዛዜቴዲኖ» ያጊዴ ናሼቻን ሲሜዲኖ።
18ዬሱሲካ ኡንቱንቶ፥ «ሴፃናይ ዋልቃንꬃዳን ሳሉዋፔ ዎꬊሺን ቤዓዲ። 19ሲሚ ሾሻኔ ሶጉዋ ዬꬋናዳን ሂንቴንቱ ሞርኪያ ፃላሂያ ዎልቃ ፆናና ማላ ማታ ኢማዲ። ሂንቴንታ ቆሃናዌ ኣይኔካ ዴዔና። 20ጊዶፔ ኣቲን ሂንቴንቱ ሱንꬃይ ሳሉዋ ማዚጎቢያን ፃፌቶ ዲራው፥ ናሼቲቴፔ ኣቲን ኢታ ኣያናቱ ኣዛዜቶ ዲራው ናሼቶፒቴ» ያጌዳ።
ዬሱሲ ባሬ ናሼቻ ቆንጪሴዳ
(ማት 11፡25-27፤ 16፡13-17)
21ሄ ዎዲያን ዬሱሲ ኣያና ጌሻን ዳሮ ናሼቲዴ፥ «ሳሉዋኔ ሳዓ ጎዳው፥ ኔኒ ሃ ዬዉዋ ታማሮዋንቱፔኔ ኣꬎ ኤራንቻቱዋፔ ጌንꬃዴ፥ ቄሪ ናናው ቆንጪሶ ዲራው፥ ኔና ጋላታይ፤ ኤ፥ ታ ኣቦ፥ ኣዪሲ ጎፔ፥ ሃዋ ኦꬃናው ኔ ሎዖ ሼኔ ጊዴዳ።
22«ኡባ ዬዉ ታው ታ ኣቡፔ ኢሜቴዳ። ናዓይ ኦኔንቶ ኣዉዋፔ ኣቲሺን ኦኒኔ ኤሪያዌ ባዋ፤ ሄዋዳንካ ኣዉ ኦኔንቶ ናዓፔኔ ኢ ቆንጪሳናው ኮዮ ኡራፔ ኣቲን፥ ሃራይ ኦኒኔ ኤሪያዌ ባዋ» ያጌዳ።
23ካሊዴካ ዬሱሲ ባሬና ካሊያዋንቱኮ ሲሚ ዎꬊዴ፥ ኡንቱንቱ ፃላላ፥ «ሂንቴንቱ ቤዒያዋ ፄሊያ ኣይፋቱ ኣንጄቴዳዋንታ። 24ታ ሂንቴው ኦዲያዌ ኣዬ ጎፔ፥ ጮራ ናባቱኔ ካታቱ ሂንቴንቱ ቤዒያዋ ቤዓናው ኣሞቴዲኖሺን ቤዒቤይኪኖ፤ ሂንቴንቱ ሲሲያዋካ ሲሳናው ኣሞቴዲኖ፤ ሺን ሲሲቤይኪኖ» ያጌዳ።
ኣሳው ቃሬቲያ ሳማሪያ ቢታኒያ
25ኢቲ ጋላሲ ሂጊያ ኤሪያዌ ኢቱ ዬሱሳ ፓጫናው ኣኮ ዪዴ፥ «ታማሪሲያዎ፥ ሜꬊና ዴዑዋ ላታናው፥ ታኒ ኣያ ኡዶ?» ያጊ ኦቼዳ።
26ዬሱሲ ዛሪዴ፥ «ሙሴ ሂጊያ ማፃፋን ፃፌቶዌ ኣዬ? ኔኒ ኣያ ጋዴ ቢላይ?» ያጌዳ።
27ቢታኒካ፥ «ሙሴ ሂጊያ ማፃፋይ፥ ‹ፆሳ ኔ ጎዳ ፖሎ ኔ ዎዛናፔ፥ ፖሎ ኔ ሼምፑዋፔ፥ ፖሎ ኔ ዎልቃፔኔ ፖሎ ኔ ቆፋፔ ሲቃ፤ ሄዋዳንካ ኔ ላጌꬃካ ኔ ሁጲያዳን ዶሳ› ጌ» ያጌዳ።
28ዬሱሲ ኣ፥ «ሊኬ፥ ቱሙዋ ጋዳ፤ ሲሚ ኔኒካ ሃዋ ኦꬃ፤ ዴዑዋን ዴዓናሳ» ያጌዳ።
29ሙሴ ሂጊያ ታማሪሲያ ቢታኒ ቃይ ባሬና ፂሎ ኦꬃናው ኮዪዴ ዬሱሳ፥ «ሃኖሺን፥ ታ ላጌꬃይ ኦኔ?» ያጊዴ ኦቼዳ።
30ዬሱሲ ዛሪዴ፥ «ኢቲ ቢታኒ ዬሩሳላሜፔ ኢያርኮ ቢዴ ዴዒሺን፥ ኦጊያ ቦላን ፓናቱ ኣ ዴሚዴ፥ ኣ ማዩዋ ቃሮዋፔ ጉዬ ሾጪዴ፥ ሃይቃናው ፖሉ ጎዴ ኦሊዴ ቤዲኖ። 31ቆፔናን ኢቲ ቄሳይ ሄ ኦጊያና ቢዴዒያዌ፥ ሾጬቲዴ ኩንዴዳ ቢታኒያ ቤዔዳ ዎዴ፥ ኣያኔ ኡዴናን ሚዪያና ኣꬊዴ ቤዳ። 32ሄዋዳንካ ኢቲ ሌዊ ሄ ኦጊያና ቢዴዔ። ኢካ ቢታኒያ ቤዒዴ፥ ሚዬቲ ኣꬌዳ። 33ሺን ሳማሪያ ኣሳ ጊዴዳ ኢቲ ቢታኒ፥ ሄ ባጋና ኣꬊዴ፥ ሃ ቢታኒያኮ ዬዳ። ኣ ቤዔዳ ዎዴ ኣው ቃሬቴዳ። 34ኣኮካ ሺቂዴ፥ ዛይቲያኔ ዎዪኒያ ኤሳ ኣ ማይꬃን ቲጊዴ፥ ቃቼዳ። ሄዋፔ ጉዬ ባሬ ሃሪያ ቶጊሲዴ፥ ኢማꬃይ ኣቂያ ጎሊያ ኣኪ ቤዳ፤ ሄዋን ቢꬋዪዴ ናጌዳ። 35ዎንቴꬃ ጋላሲ ጉꬃ ቢራ ባሬ ኪሲያፔ ኬሲዴ፥ ኢማꬃይ ኣቂያ ጎሊያ ጎዳው ኢሚዴ፥ ‹ሃ ቢታኒያ ታው ሎይꬃ ቢꬋያ፤ ሃዋፔ ዳሩዋ ኔኒ ኬሶፔካ፥ ታኒ ሲሚያ ዎዴ ኔው ጪጋና› ያጌዳ።
36«ሲሚ ሃ ሄዙ ኣሳቱዋፔ፥ ፓናቱዋ ኩሺያን ሾጬቲዴ ኩንዴዳ ቢታኔው፥ ላጌ ጊዴዳዌ ሃቃዋ ማላቲ?» ያጌዳ።
37ሂጊያ ታማሪሲያዌካ፥ «ሄ ኣው ቃሬቶዋ» ያጌዳ።
ዬሱሲካ ኣ፥ «ሲሚ ባዴ ኔኒካ ሄዋዳን ኦꬃ» ያጌዳ።
ዬሱሲ ማርቲኔ ማይራሚ ሶይ ቤዳ
38ዬሱሲ ባሬና ካሊያዋንቱና ኦጊያ ቢዴ፥ ኢቲ ሄራ ጋርሳ ጋኬዳ። ሄዋን ማርቶ ጌቴቲያ ኢቲ ሚሺራታ ባሬ ጎሌን ሞካዱ። 39ኢዚዉካ ማይራሞ ጌቴቲያ ሚቻታ ዴዓው፤ ሄናካ ዬሱሳ ጌዲያ ማታን ኡታዴ፥ ኢ ኦዲያዋ ሃይዛዴ ዴዓው። 40ማርታ ቃይ ሶይባ ጊጊሳዴ ዳቡራ ዴዓው፤ ሄዋ ዲራው ዬሱሳኮ ሺቃዴ፥ «ሃና ታ ሚቻታ፥ ኪታ ኡባ ታ ቦላ ኦሊና፥ ታኒ ታሬካ ላባኖዴ ፄላዴ ጮዑ ጋይ? ሃያና ታና ማዳናዳን ኢዚው ኦዳ» ያጋዱ።
41ዬሱሲካ ዛሪዴ ኢዞ፥ «ማርቴ፥ ማርቴ፥ ኔኒ ጮራ ዬዉዋ ቆፓዴ ሂርጋ፤ ቃሲካ ሜቶታ። 42ሺን ኮሺያዌ ኢቲባ፤ ማይራማ ባሬፔ ኦኒኔ ኣኬና ሎዖባ ዶራዱ» ያጌዳ።