ዪሁዳይ
ፃፌዳ ኪታ
ጌሉዋ
ዪሁዳ ኪታይ ፃፌቴዳዌ፥ ኣማኔናን ዴዒዴ ኣማኒያ ኣሳ ማላቲዴ፥ ዎርዶ ቲሚርቲያ ላሊያ ኣሳቱዋፔ ኣማኒያ ኣሳይ ናጌታና ማላ፥ ኦዳናሳ። ሃ ቃንꬃ ኪታይ ባሬ ጊዶን ኦይቄዳዋን ላዔንꬆ ጴፂሮሳ ማላቴ። ፃፊ ናባቢያዋንቱሲ ኦዲዴ፥ «ላዔꬄና ሃኖታን ፆሳይ ባሬ ናናቱዋሲ ኢቲ ካላካ ኢሜዳ ኣማኑዋሲ ሚኒዴ ባፄታናዳን» ሚኒሲዴ ቆፊሴ።
ሼምፓቱዋ ኡባቱዋሲ ኢሜቴዳ ቃንꬃ ቆፋቱዋ
ጌሉዋ (1-2)
ዎርዶ ኣስታማራቱዋ ቲሚርቲያ ኤሻኔ ኩንዴꬃ (3-16)
ኣማኑዋ ናጋናዳን ኢሜቴዳ ዞሪያ (17-23)
ዉርሴꬃ ኣንጁዋ (24-25)
1ታኒ ዬሱሲ ኪሪስቶሳ ቆማይ ዪሁዳይ፥ ያዪቆባ ኢሻይ፥ ፆሳይ ፄሴዳዋንቶ፥ ፆሳይ ኣዉ ሲቂያዋንቶ፥ ቃሲ ዬሱሲ ኪሪስቶሲ ናጊያዋንቶ፥ ሃ ዳቢዳቢያ ፃፋይ።
2ማሮቴꬃይ፥ ሳሮቴꬃይኔ ሲቆቴꬃይ ሂንቴናን ኩሞ።
ዎርዶ ኣስታማራቱዋ
3ታ ሲቃቶ፥ ኑኒ ኢቲፔ ሻኪ ኣካና ኣቶቴꬃባ ሂንቴንቶ ፃፋናው ታኒ ዳሮ ዳቡሪያ ዎዴ፥ ፆሳይ ባሬ ናናቶ ላዔꬄናን ኢቲ ጌዴ ኢሜዳ ኣማኖ ሂንቴ ባፄታና ማላ፥ ሂንቴና ዞራዴ ፃፋናው ኮሺያዋ ኣኬካዲ። 4ኣዪሲ ጎፔ፥ ፆሳ ኤሬና ኢቲ ኢቲ ኣሳቱ ኦኒኔ ቤዔናን ሂንቴ ጊዶ ጌሌዲኖ። ሄዋንቱ ኑ ፆሳ ኣꬎ ኬካቴꬃባ ኦዲያ ኪታ ኢታ ቱናቴꬃው ጌላይ ታማሪሲኖ፤ ኡንቱንቱ ኑ ኢቲ ካቲያ፥ ኑ ጎዳ ዬሱሲ ኪሪስቶሳ ኤሮኮ ያጊኖ፤ ቃሲ ኡንቱንቱ ፒርዳ ኣካናዋ ፆሳ ማፃፋቱ ዳሮ ዎዲያፔ ካሴ ኦዴዲኖ።
5ሺን ሂንቴ ሃ ኡባባ ኤሪያዋ ጊዶፔካ፥ ጎዳይ ኢስራዔሊያ ኣሳ ጊብፄ ጋዲያፔ ዎቲ ኣሼዴንቶኔ ቃሲ ኣማኒቤናዋንታ ጉዬፔ ዎቲ ꬋዪሴዴንቶ፥ ታኒ ሂንቴና ሃሳዪሳናው ኮያይ። 6ቃሲ ባሬንቱ ዴዒያሳ ኣጊዴ፥ ባሬንቶ ኢሜቴዳ ካፖቴꬃ ናጊቤና ኪታንቻቱ ፒርዳ ኣኪያ ዎልቃማ ጋላሳይ ጋካናው ፆሳይ ኡንቱንታ ናጊያሳን፥ ꬉማፔ ጋርሳን ሜꬊናው ቃቺ ዎꬄ። 7ሄዋዳን ሶዶማኔ ጋሞራ ጊያ ካታማቱዋኒኔ ኡንቱንቱ ሄራን ዴዒያ ካታማቱዋን ዴዒያ ኣሳይ ሄ ኪታንቻቱዋዳን ዎሹሜዲኖኔ ዎሹማናው ሎይꬂ ካጄሌዲኖ፤ ሄዋንቱ ሜꬊና ታማን ኤፂዴ፥ ሃራቶ ሌሚሱዋ ጊዴዲኖ።
8ሄዋዳን ቃሲ ሄ ኣኩሜቲያ ኣሳቱ ባሬንቱ ኣሳቴꬃ ቱኒሲኖ፤ ፆሳ ጎዳቴꬃ ካꬊኖ፤ ቦንቾ ሜꬌታቱዋካ ቦሪኖ። 9ሺን ኪታንቻቱዋ ካፑ ሚካዔሊ ሙሴ ኣኃባ ፃላሂያና ፓሉሜቴዳ ዎዴ፥ «ጎዳይ ኔና ሴሮ» ጌዳዋፔ ኣቲን፥ ቦሪያ ቃላን ኣ ቦላ ፒርዳናው ኮዪቤና። 10ሺን ሄ ኣሳቱ ባሬው ኣኬኬናባ ኡባ ቦሪኖ፤ ቃሲ ኡንቱንቱ ዩሺ ቆፔና ዶዓቱዋዳን፥ ሜꬌታ ኤራቴꬃን ኤሪያ ዬዋቱ ኡንቱንታ ꬋዪሲያዋንታ። 11ኡንቱንቶ ኣዬሮ! ኣዪሲ ጎፔ፥ ኡንቱንቱ ቃዬሊ ሃሜቴዳ ኦጊያ ሃሜቴዲኖ። ሻሉዋ ዲራው ጊዴ፥ ባላሚ ኦꬄዳዋ ማላ ባዪዙዋ ኦꬄዲኖ። ቃሲ ቆሬ ጊያ ቢታኒ ማካሊዴ ꬋዬዳዋዳን፥ ኡንቱንቱካ ማካሊዴ ꬋዬዲኖ።
12ሄዋንቱ ሲቁዋን ሾቢያ ሂንቴ ሚያሳን ሂንቴናና ያሺ ባዪናን ሚያ ዎዴ፥ ቆሴቴዳ ꬉቡዋ ማላ። ኡንቱንቱ ባሬንቱ ፃላላ ናጊኖ። ኡንቱንቱ ጫርኩ ኣፊያ ኢራይ ባዪና ሻሪያ ማላ፤ ቃሲ ኡንቱንቱ ቦኒያን ኣይፊያ ኣዪፌና፥ ፃጱዋና ሾዴቲዴ፥ ሙሌካ ሜሌዳ ሚꬃ ማላ። 13ኡንቱንቱ ባሬንቱ ፖኩዋ ጌንꬄና ሆሞቲያ፥ ኢታ ኣባ ቤታ ማላ። ኡንቱንቱ፥ ፆሳይ፥ ሜꬊናው ሳካና ꬉማኒ ሳዓ ጊጊሲ ዎꬄዳ ዩዪያ ፆሊንታቱዋ ማላ።
14-15ሄኖኪ ኣዳማፔ ዶሚና፥ ላፑንꬃ ዬሌታ ጊዲያዌ፥ ዳሮ ዎዲያፔ ካሴ ኡንቱንቱዋ ቲምቢቲያ ኦዲዴ፥ ሃዋዳን ያጌዳ፤
«ኣኬኪቴ፤ ፆሳ ኤሬና ናጋራንቻ
ኣሳቱ ኦꬄዳ ኢታ ኦሱዋ ኡባዉኔ
ቃሲ ፆሳ ኤሬና ሄ ኢታ ኣሳቱ
ፆሳ ቦላ ሃሳዬዳ ኢታ ሃሳያ ኡባው፥
ጎዳይ ኡንቱንቱ ኡባ ቦላ ፒርዳናው፥
ባሬ ጮራ ሻዓ ጌሻቱዋና ኢቲፔ ያና»
ያጌዳ። 16ሄ ኣሳቱ ኡባ ዎዴ ዙዙሚኖኔ ሃራቱዋ ኣማሳሊኖ፤ ቃሲ ባሬንቱ ኢታ ኣሙዋ ካሊኖ፤ ባሬንቱ ሁጴው ጎዓ ዴማናው ሃራቱዋ ሳቢኖኔ ባሬንቱ ኮሻ ዎጋፔ ኣꬂዴ፥ ꬎቁ ኦꬂ ሃሳዪኖ።
ሚኖ ኣኬኪሱዋኔ ዞሪያ
17ሺን ታ ሲቃቶ፥ ኑ ጎዳ ዬሱሲ ኪሪስቶሲ ኪቴዳዋንቱ ሂንቴንቶ ቤኒ ሃሳዬዳ ቃላ ኣኬኪቴ። 18ኡንቱንቱ ሂንቴንቶ፥ «ዉርሴꬃ ዎዲያን፥ ባሬንቶ ፆሳይ ባዪናዋንቱ፥ ባሬንቱ ኣሙዋ ካሊያዋንቱ፥ ቃሲ ሂንቴ ቦላ ቂሊጪያዋንቱ ያና» ያጌዲኖ። 19ሄዋንቱ ኣሳ ጊዶን ሻኮቴꬃ ሜꬊያዋንታኔ፥ ባሬንቱ ኢታ ኣሞ ሞዴቴዳዋንታ፤ ቃሲ ጌሻ ኣያናይ ባይናዋንታ።
20ሺን ታ ሲቃቶ፥ ኡባፔ ኣꬊያ ጌሻ ኣማኑዋን ሂንቴ ሁጲያ ኬፂቴ፤ ቃሲ ጌሻ ኣያና ዎልቃን ፆሳ ዎሲቴ። 21ቃሲ ኑ ጎዳይ ዬሱሲ ኪሪስቶሲ ባሬ ማሮቴꬃን ሂንቴንቶ ኢማና ሜꬊና ዴዑዋ ናጊዴ፥ ሂንቴ ሁጲያ ፆሳ ሲቁዋን ዎꬂቴ።
22ኢቲ ኢቲ ሲꬊ ዴዒያ ኣሳቶ ቃሬቲቴ። 23ኢቱዋ ኢቱዋ ታማፔ ዳፊ ኬሲዴ ኣሺቴ። ቃሲ ሃራይ ኣቶ ኡንቱንቱ ኢታ ኣሙዋን ቱኔዳ ማዩዋ ኢፂዴካ፥ ኢቶ ኢቶ ያሻቴꬃን ቃሬቲቴ።
ጋላታ ዎሳ
24-25ሂንቴ ኩንዴናዳን፥ ሂንቴና ናጋናዉኔ ፖኩ ባይናዋንታ ኡዲዴ፥ ባሬ ቦንቹዋ ሲንꬃ ዎልቃማ ናሼቻን ሺሻናው ዳንዳዪያ ኑና ኣሺያ ኢቲ ፆሳው፥ ኑ ጎዳ ዬሱሲ ኪሪስቶሳ ባጋና ቦንቹ፥ ጊታቴꬃይ፥ ዎልቃይኔ ማታይ፥ ኣꬌዳ ዎዴ ኡባፔኔ ሃዒኔ ሜꬊና ጋካናው ጊዶ። ኣሜንዒ።