ኢብራዌ ኣሳው
ፃፌቴዳ ኪታ
ጌሉዋ
ሃዌ ጳዉሎሲኔ ጴፂሮሲ ፃፌዳዋዳን ኪታ ጊዴናን ቲሚርቴ ጊዲዴ ፃፌቴዳዌ፥ ዎልቃማ ቱጋይ ጋኪና፥ ኣማኑዋ ኣጋናው ማቴዳ ኣማኒያ ኣሳቱዋሳ (10፡32-39)። ሃ ማፃፋ ፃፌዳዌ ኦኔንቶ ኤሬቴና። ሃ ፃፊያ ሁጴ ቆፋይ ኮይሮቲዴ ኡንቱንቱን ዴዒያ ሲቁዋኮ ሲማናዳን ዬሱሳ ꬎቃቴꬃ ቤሲዴ ኡንቱንታ ዞሬ። ሄ ፃፊ ኢብራዌ ኣማኒያዋንቱሲ ሚኒሲ ኦዲያዌ ዬሱሲ ኪሪስቶሲ ቱማኔ ፆሳ ፖሎ ቆንጬꬃ ጊዲያዋና። ሃ ኣማኒያዋንቱ ባሬንቱ ኣማኑዋን ሚናና ማላ፥ ኡንቱንታ ሜንꬄꬄ። ኢ ሄዋ ኦꬂዴ ሄዙ ቱማቱዋ ቆንጪሲዴ ቤሴ፡
1. ኢ ኣኬዳ ሜቱዋ ባጋና ባሬ ኣዉዋሲ ቱሙ ኣዛዜቴዳ ዬሱሲ ፆሳው ሜꬊና ናዓ። ኢ ፆሳ ናዓ ጊዴዳ ዲራው፥ ኤጫ ቃላ ጫቁዋ ዎዲያን ቲምቢቲያ ኦዲያዋንቱፔ፥ ኪታንቻቱዋፔኔ፥ ሃራይ ኣቲን፥ ሙሴፔካ ሎይꬂ ኣꬊያዋ።
2. ዬሱሲ ኤጫ ቃላ ጫቁዋ ቄሳቱዋፔ ሎይꬂ ኣꬊያ፥ ሜꬊና ቄሳ ጊዲያዋ ፆሳይ ባሬ ሁጴው ኦዴዳ።
3. ዬሱሳ ባጋና ኣማኒያዌ ናጋራፔ፥ ያሻቴꬃፔኔ ሃይቁዋፔ ኣቴ። ዬሱሲ ቄሳቱዋ ኡባቱዋ ካፑዋ ጊዲያ ዲራው፥ ካሴ ኢብራዋቱዋ ኣማኑዋ ዎጋቱዋኒኔ ሜሄቱዋ ያርሹዋን ኩዋዳን ቤቲያ ኣቶቴꬃ ሃዒ ቱማ ጊዳናዳን ኡዴዳ።
ፃፊ ኢስራዔሊያ ኣሳ ታሪኪያን ዳሮ ኤሬቴዳ ኣሳ ኣማኑዋ ሌሚሱዋዳን ጎዔቲዴ (ሼምፑዋ 11)፥ ሃ ማፃፋ ናባቢያ ኣሳቱ ባሬንቱ ኣማኑዋን ሚናናዳን ቆፊሴ። ሄዋዳንካ (ሼምፑዋ 12) ናባቢያዋንቱ ባሬንቱ ኣይፊያ ዬሱሳ ቦላን ቲሺ ኡዲ ዎꬂዴ፥ ባሬንቱ ኣማኑዋን ሚናናዳኒኔ ኣይ ማላ ሜቱኔ ዋዪ ጋኮፔካ፥ ኡንቱንቱ ጌንጫናዳን ዞሬ። ዉርሴꬃን ቃሲ ዞሪያኔ ኣኬኪሱዋ ቃላ ኢሚያዋን ዉርሴ።
ሼምፓቱዋ ኡባቱዋሲ ኢሜቴዳ ቃንꬃ ቆፋቱዋ
ጌሉዋ፡ ፆሳይ ዬሱሳን ቆንጬዳዋ (1፡1-3)
ኪሪስቶሲ ኪታንቻቱዋፔ ቦላ ጊዲያዋ (1፡4-2፡18)
ኪሪስቶሲ ሙሴፔኔ ኢያሱፔ ቦላ ጊዲያዋ (3፡1-4፡13)
ኪሪስቶሳ ቄሳቴꬃ ꬎቃቴꬃ (4፡14-7፡28)
ኪሪስቶሳ ቃላ ጫቁዋ ꬎቃቴꬃ (8፡1-9፡23)
ኪሪስቶሲ ያርሼቴዳዌ ኦዋፔኔ ዳሪያዋ (9፡23-10፡39)
ኣማኑዋ ዳሮቴꬃ (11፡1-12፡29)
ፆሳ ናሼቹሳ (13፡1-19)
ፆሳይ ባሬ ናዓ ባጋና ሃሳዬዳ
1ፆሳይ ቤኒ ዎዴ፥ ኑ ኣዎቱ ናባቱዋ ባጋና ዱማ ዱማ ኦጊያኒኔ ዳሮ ዎዲያን ሃሳዬዳ። 2ሺን ሃ ዉርሴꬃ ዎዲያን፥ ኡባባ ኣ ላቲሲዴ፥ ዬሌታ ኣ ባጋና ሜꬌዳ ባሬ ናዓ ባጋና ኑሲ ሃሳዬዳ። 3ናዓይ ፆሳ ቦንቾ ፖዑዋ ጶሌ፤ ቃሲ ኩሜንꬃ ፆሳ ኤሻ ኣኪዴ፥ ባሬ ዎልቃማ ቃላን ሃ ሳዓ ናጌ፤ ያቲዴ ኣሳ ናጋራፔ ጌሺዴ፥ ኡባፔ ቦላ ፆሳፔ ኡሼቻ ባጋና ሳሉዋን ኡቴዳ።
ፆሳ ናዓይ ኪታንቻቱዋፔ ቦላ
4ፆሳይ ኣው ኢሜዳ ሱንꬃቴꬃይ ኪታንቻቱዋፔ ꬎቃ ጊዲያዋዳንካ፥ ኡንቱንቱፔ ኣ ሎይꬂ ꬎቁ ኦꬄዳ። 5ኣዪሲ ጎፔ፥ ፆሳይ ባሬ ኪታንቻቱዋፔ ኦና፥
«ኔኒ ታ ናዓ፤
ታኒ ሃቼ ኔው ኣዉዋ ጊዳዲ»
ጌዴ? ዎይ ቃሲ ኦና፥
«ታኒ ኣው ኣዉዋ ጊዳና፤
ኢካ ታው ናዓ ጊዳና»
ጌዴ? 6ቃሲ ፆሳይ ባሬ ባይራ ናዓ ሃ ሳዓ ዬዳና ሃኒዴ፥
«ታ ኪታንቻቱዋ ኡባቱካ ኣው ጎዪኒኖ»
ያጌዳ። 7ፆሳይ ኪታንቻቱዋባ ሃሳዪዴ፥
«ታኒ ታ ኪታንቻቱዋ ጫርኩዋ ኬሳይ፤
ቃሲ ታ ኦሳንቻቱዋካ ታማ ላጩዋ ኬሳይ»
ያጌ። 8ሺን ባሬ ናዓዋ ሃሳዪዴ፥
«ፆሳው፥ ኔ ካዉቴꬃ ኦይዲ
ሜꬊ ሜꬊናው ዴዔ።
ኔ ካዉቴꬃ ፂሎቴꬃን ኣሃሳ።
9ኔኒ ፂሎቴꬃ ሲቃዴ፤
ናቁዋ ኢፃዳ።
ፆሳይ፥ ኔ ፆሳይ ኔና
ኔ ላጌቱዋፔ ኣꬂዴ፥
ናሼቻን ኢሊሊሲያ ዛይቲያ ኦኬዳዌ ሃዋሳ»
ያጌ። 10ፆሳይ ሃዋዳን ያጌ፤
«ጎዳው፥ ኮይሮ ኔኒ ሳዓ ሜꬋዳ፤
ሳሉዋካ ኔ ኩሺያን ሜꬋዳ።
11ሄዋንቱ ኡባይ ꬋያና፤
ሺን ኔኒ ዴዓና።
ኡንቱንቱ ኡባይካ ኣፊላዳን ዉራና።
12ኔኒ ኡንቱንታ ጋቢያዳን ዳኮያና፤
ቃሲ ኡንቱንቱ ኣፊላዳን ላሜታናዋንታ።
ሺን ኔኒ ኔናካ፤
ኔ ላይꬃይ ኡባካ ዉሬና»
ያጌ። 13ሺን ፆሳይ ባሬ ኪታንቻቱዋፔ ኢቱዋኔ፥
«ታኒ ኔ ሞርኬቱዋ ኔኒ
ጌዲያን ዬꬊያዋ ኦꬃና ጋካናው፥
ሃዋን ታፔ ኡሼቻ ባጋን ኡታ»
ጊቤና። 14ኪታንቻቱ ኡባይ ፆሳው ኦꬃናዉኔ ኣቶቴꬃ ዴማና ኣሳቱዋ ማዳናው ፆሳይ ኪቴዳ ኣያናቱዋ ጊዲኪኖዬ?