1Keiman kamit teni toh kigahna kasem in khangdong numei chu jon lunga vet lou dingin, 2Ijeh inem itile chunga Pathen chun eiho ipi dinga eilhen u ham? Chungsang a um hatchungnung pa a konna goulo ding chu ipi ham? 3Migiloute dinga vangsetna hilou hija chule thilphalou bolte dinga vangset umtah dinmun chu hilou ham? 4Pathen in kabol katoh jouse amulou hija chuleh kakalse jat jong ahet hilou ham? 5Mikhat tou koma jou kasei khah a chuleh mikhat tou kalhep khah em? 6Thudih kitena chun Pathen in eitetoh hen, ijeh inem itile aman kalung thenna hi ahet ahi. 7Alamlhah a konna ahilouva ijem tia kamu ji ho a kalungthim jon lung ngaichatna kanei khah a ahiloule chonsetna dang khat a themmona kanei khah a ahile, 8Hiti chun mikhat touvin hange mim kaphu na ana nejeng hen, kaphu doh chengse abonchan kibotdoh soh jeng hen. 9Ijem tia kalungthim in numei khat tou alheplhah a ahiloule ka inheng pa jinu jon lunga kavet khah a ahile, 10Chuti chun kajinu jong pasal dang ji hijeng hen, pasal dang khat in luppi jeng hen. 11Ijeh inem itile jon lung put hi jachat umtah chonset ahi, hiche dandih louva chon ho chu gimbol dinga lha ahi. 12Hichu damun lampi lhung keija meiyin akah tobang ahin, kanei jouse kamang hel ding ahi. 13Ijemtia kasohpa ham kasoh numei adih louva kabolla ahileh amahon akiphin nau kakoma ahinlhut teng uleh, 14Pathen chu iti kakimaito pi ding hitam? Aman thu eihin doh teng ipi kasei tadem? 15Ajeh chu Pathen in kei leh kasoh te kaniuva eisem kop u ahi. 16Vaichate panpi ding kada khah a ahiloule meithai ho kinepna kasuh keh peh khah em? 17Ka anneh chunga kachip khah a chaga pabeite toh nehkhom ding kada khah em? 18Ahipoi, mipa khat bangin, kaneo laiya pat in chagate kahin hoitup in chule kahinkho lhumin meithaite hoitup nan kahin mange. 19Itih lai hijongle chenna ding neilou ponbeija umho chule von ding neilou gentheiho kamu tengle 20Akisillum diuva samul pon kapeh ji jeh a eipachat jiu hilou ham? 21Thutanpa kalanga apan nadinga chaga khat douna a kakhut kadop khah a ahile, 22Hiti chun kalengkou aumna a konin kisatlha jeng hen, kaban jang jong akisuhto na a konin kisatlha jeng hen. 23Hichu Pathen thutanna kimaitopi sangin phajonte, ijemtia oupe Pathen chun einan chahkheh a ahile kinepna ipi kanei ding ham? 24Keiman katahsanna summa kakoi khah a ahile, ahiloule kasana a hi kakison khah a ahile, 25Kanei kagou jouse leh kakhol khom jouse jeh a kipah a kahile, 26Vantham jol ho a vahpel a vah nisa leh lha alampia chesuh khu kavet a, 27Chuleh aguh a kalungthim kalheplhah a amaho houna kaga galchop khah a ahile, 28Achuti tah a ahile thutan vaihom hon eigim bol uhen, chuti chu ahi tah leh van Pathen thusei kangaipeh lou hiding tina ahi. 29Kamelma techu manthah nan ahin phah tenga ahiloule alampiuva hahsatna ahung tengle, hetnom ten tena aum jeh uva kipah kahile, 30Ahipoi, keiman mikhat tou kaspset a, ahiloule phulah ding kasei kha pon, hitobang chonsetna hi kabol khapoi. 31Kasoh pan jong adangho chu gilkel in kachesah tai tin asei khapoi. 32Hetkhah lou mi jong kakihei mangsan kha pon, ahinlah mijouse din kot kahonpeh ji bouve. 33Midangho banga ken kachonsetna selmang ding kagot a, kasuhkhel kalung thima ka imden khah ham? 34Mipiho kakichatna ahiloule kikhop khom naho kadeimo a hiche ho jeh a chu thipbeh a insunga kaum den khah ham? 35Mikhat tou beh in kathusei eingai peh hen lang hileh ven kakihonna dinga kamin soi kakai ding ahi. Hatchungnungpa chun eidonbut hen lang eiheh pan kei douna thu sundoh hen. 36Keiman themmo eichan sah nau chu kiloupi sah tah a kaki maitopi ding lallukhuh banga kakikhuh ding ahi. 37Ijeh inem itile keiman kathilbol adihtah chu kaseipeh ding ahin, ama masanga chu leng chapate banga kahung ding ahi. 38Kagam in themmo eichansah khah tah a tucha maha jouse kitoh tah a ahung ka soh keijuva, 39Ahilouva achang leh mim kana guh khah a ahiloule anei ho kana tha khah tah a ahile, 40Chuti chun gehu khellin ling leh khau agama chun keh henlang, chang khellin hampa keh hen. Job thusei ho akichaitai.