Ila⁄imbidu Gu ⁄abu hari Burungaisoo

Hadee haa Irimu
1Da hheꞌesi, hagi arimi gimba gu didiru gu bakaꞌasa rawaa gu rawge. Teꞌesii yaa wanta hadee saa daasi letu, yeꞌeeroo kosi yaa hiikala⁄iri rawaa gu slehhenge. Kara saga gosii yaa wana hhamaa gwaa koomaa tica⁄eerii mibi haa cada. 2Hadetee yaa konta hubay, ina yaa ⁄aa⁄ii⁄iminta sa ba⁄adaa gu hiidawaraa.
3Da hheꞌesi, gimba waku gu bakaꞌasa gii ca⁄i yade rawaa gu rawge. Yuꞌudiyaa, hagi arimi irimu gu didiru gu daa⁄adu, gwaa kooma sagaiĩ fanqu, khadami mibi haa hhamaai fanqu sagaiĩ hhakeesii kosii. 4Irimukee hari hhaysoo gosi yaagi duukhi leẽ da tami da tica⁄eerii rawgo haa giyaagii slakhi hhapeege. Da hheꞌesi, irimukee gi qadidi pandaa da hadeteesii daa daadaauusidi hiidawaraa, magi afa gwi⁄i daa⁄u gosi cira, qatlay dugoó ilii daye. 5Da hheꞌesi, hadetee gii daadi naw. Nakee na tawaalina hhapapu goõ gu khooroo, hari hhadaa da sikhima. Nakee dugurigi waaudi rawaa gu rawge daqa Iliitleemuge, pandaa da kitiĩ gosii gu tawaalooge. 6Da hheꞌesi, hadetee gi lakiti kongoqomeege, yade Iliitleemu sagaa boo⁄imisi daqa, daga ilii ga⁄aye, qoomay gu balalu elefu leẽ miyaa cada haa mibeeri lahhoꞌo (1,260).
Gau rawaa gu rawge
7Da hheꞌesi, dagii ca⁄i gau rawaa gu rawge. Mikayeeli, malayika gu didiru haa malayika dosi, gi qwaatliri haa irimukee haa malayika dosi. 8Teesaaqay see, Irimukee haa malayika dosi digigi kaba⁄i gaukeesii, haa yaa wanta kara daqa rawaa gu rawge sa inay. 9Irimukee, hikira gu wakaꞌalee, hikee doó eteedine Biriisimoo haa Sataanimoo, ina goóyii corida hida khooroo goõ, dugwaagii slakhi hhapeege sliimaa haa malayika dosi goõ.
10Da hheꞌesi, hagi akhasi afoo da didiri rawaa gu rawgo kakanta tuba,
“Inkoo ilabuꞌuru, ⁄uuru haa Tawaaloo da Iliitleemu goori yaani khaydi
haa hiidahhasa da Kristu gosi.
Sa gimba, dugwaanii kwahhi hhapeege hikira goó sitaakiikima hhiee koti,
ina goó sitaakiikima pandaa da Iliitleemuge amasi haa tleemaa.
11Hhiee hhakee koti guũ kaba⁄iri Sataanimoo,
hari ceedee da ⁄ambeenimoo,
haa hari gimba lou giyaa ilatlatlayri.
Inay yaa aniriiba ibinaa dooina ti idoo da kaari,
teesaaqay yaa tlaꞌamuudiriiba gwaaꞌaraa see, sa ⁄imba uma gu Yeesu.
12Inkoo, hhaꞌaluumida unkuray goõ goó ibiidee taysi rawaa gu rawge!
Teesaaqay see, laoo daqa hida goõ goó ibiidee khoorooge,
haa daqa idadu goõ goó ibiidee tlawoo gu denige,
sa gimba Sataanimoo dugwaanii lihhi hhapeege tla⁄aã googunay.
Ina hiĩ slahhaai hari khisla,
sa gimba ina khui tuba, balalu kosi ti coko⁄o hari khisla!”
13Qatlay irimukee giyaa ili caahhi tuba, ina dugwaanii lihhi hhapeege, gi siragusimi hadetira daay daadi naw. 14Teesaaqay see, Iliitleemu gi hadisi sa hadetee hhababeeraa cada gu tambayciraꞌa da didiri, ina ma hiidahhasidi tlawaraa, ma waauti yade kongoqomeege, daqatiray sagaa boo⁄imisi, ma ibiti segenge haa irimukee. Teꞌesii na daqa daga ilii ga⁄aye, koraraa tami haa nusuu. 15Da hheꞌesi, irimukee yaagi wa⁄i maꞌay wa⁄a afa gosaa ubee duudu, aluũ gu hadeteesaa, daga ilahubidi ha duudukee. 16Teesaaqay see, hhapee gi ilabuꞌunti hadetee. Hhapetee gii tlaaꞌati afa pahha, gi gwi⁄idi maꞌay gu duudukee goõ, gwaa afa gu irimu dahhee. 17Da hheꞌesi, irimukee gi slahhaai hari khisla sa hadetee. Gi waaudi, ma gaukay haa yaꞌay gwaa meetee gu hadetee, inay na hhakee goó iliikoomee ilakaawa da Iliitleemu haa goó ilatlatlawee ilatlatlaw gu Yeesu Kristu. Da hheꞌesi, irimukee gi qadidi seehhinay gu tlawa da didirige.

*12:1 12:1 hadee saa daasi letu: Hadeti ti ilakhuukhuꞌusa da kanisaa da Iliitleemu da Ila⁄imbidu gu Segu sliimaa haa Ila⁄imbidu gu ⁄abu, daa ⁄imbidi ina. Letu yaa laqaru gu wanqamee da hhoinay gosi. Hiikala⁄a rawaa gu slehhenge yaa laqaru ⁄uuru sagaa hadisi ha Looimoo gu goõ. Yuꞌudii kitaabuu gu Luuka 10:19. Yuꞌudii kitaabuu gu Yondu gu Ya⁄abimiisee 20:28; Wagalatiyaa 4:21-31; Waefeeso 5:24-27.

†12:1 12:1 hhamaa gwaa koomaa tica⁄eerii mibi haa cada: Gimbaki gu bakaꞌasa dugu hiidahhasi ilakhuukhuꞌusa haa tletaa gu Yoseefu ila⁄imbidu gu seguge. Yuꞌudii kitaabuu gu Tlaatleesoo 37:9-10.

‡12:3 12:3 irimu gu didiru gu daa⁄adu: Hiĩ ti Sataanimoo dugunaa ilakhuukhuꞌusi, goó koimisa hhamisaraa kanisaa da Kristu qatlay sliimaa, teesaaqay see yoóyii dahhasiyaaba.

§12:3 12:3 sagaiĩ fanqu, khadami mibi: Haã yaa ilaꞌaaꞌaatisa da watemi paslaapasloo gwaa tawaalimee hari qatlay paslaapasloo. Yuꞌudii kitaabuu gu Danieeli 7:7-8, 20-25.

*12:5 12:5 hhadaa da sikhima: Hiĩ ti laqaru idoo nakee gimaa ilii tawaaline hhapapu goõ khoorooge harii ⁄uuru gu Tawaaloo da Iliitleemu, haa idoo gimaa ilii kaba⁄iye fa⁄ayaa dosi goõ. Yuꞌudii kitaabuu gu Daareesoo 2:9; Hiitlaaꞌasa 2:27-28.