Ikeruwang Surat i
JUAN
Kepurisnan et itueng Surat neng 2 Juan
Itueng ikeruwang surat i Juan tuꞌ, sinurat et “Megurang”, tudyu eset pegmerganen neng libun bekeꞌ eset mengeꞌ yegang ye, pepeantang lengku pegtingtimungan mekabiꞌ kenye, bekeꞌ eset mengeꞌ mekesekupan. Itueng mebaba neng pebunayag na sembatung abar na megmerganan. Pebtiꞌ gasi itue atu dut mengeꞌ pebeꞌbaluꞌ neng menunulduꞌ.
Ketulduan et itueng Surat
Pemangling 1-3
Itueng Keegitan et Pegmergaꞌ 4-6
Pebtiꞌ atu eset kaya sugat neng penulduꞌ 7-11
Ketbesan 12-13
Pemangling i Juan
1Mewanan et Megurang,
Eset pegmerganeng libun na piniliꞌ et Empuꞌ, bekeꞌ eset mengeꞌ yegang ye, na tantung pegmerganen ku, bekeꞌ diki lang eset daken imbes dut ginsan gasi na mekekilala et keberbenaran et Empuꞌ. 2Tantung pegmerganen kami kemyu alang-alang eset ating keberbenaran teyeg Empuꞌ eset kityu bekeꞌ megteternaꞌ kityu kaya seskeran. 3Ibgey teyen et Empuꞌ Amaꞌ bekeꞌ i Jesus Kristo neng yegang ye kityu redyikiꞌ, ingasiꞌ bekeꞌ kesenangan. Itue meseʼt kityu na pebibiyagan pebiyaʼt keberbenaran bekeꞌ pegmergaꞌ et Empuꞌ.
Keberbenaran bekeꞌ Pegmergaꞌ Kaya Seskeran
4Nenep ku banar na nebiriꞌ pengebiyagan kuyun dut keberbenaran et Empuꞌ mengeꞌ senung mengeꞌ yegang mu, uyun eset ketehagan eset kityu et Empuꞌ Amaꞌ. 5Indyari tiban pegmerganeng libun, maya tewen ku dimu. Diki sembatung bagu neng ketehagan itueng sinurat ku dimu, imbes itue lelaging ketehagan ne dut sengkepuunan nega eset kityu ne, kwan, megmerganan tyu ginsan. 6Itue ne neng ketehagan binggey net Empuꞌ dimyu sengkepuunan nega, kwan, mengebiyagan kew teyen dut pegmergaꞌ. Indyari itueng ketehagan et pegmergaꞌ neng pegbersen ku in, kwan, mengebiyagan kuyun dut mengeꞌ ketehagan et Empuꞌ.
7Sabab pinepanew ne eset dunyaꞌ mekansang mengeꞌ mengrurunding mengeꞌ taaw, na kaya pepebunayag na Empuꞌ in negmendyaring taaw eset si Jesus neng Kristo. Kwantin mengeꞌ taaw in mengrurunding bekeꞌ kesagkaꞌ i Kristo. 8Peginget kew pesi apang diki kew malam itueng ganti na pinegkeredyanan, imbes puspusen myu terimanen dimyung ganti teyeg et Empuꞌ.
9Sebarang kaya megteteg eset ketulduan i Kristo, imbes pengdugang nega, kaya pegtetegan et Empuꞌ. Misan sinu megteteteg eset ketulduan i Kristo in pekiiba-iba dut Empung Amaꞌ bekeꞌ Yegang. 10Misan sinu dumateng eset dimyu na leing ketulduan neng pegbibiten in, kasiꞌ myu ne terimanaꞌ eset benwa myu in sampay kasiꞌ myu ne pegpenglingaꞌ. 11Sabab itueng pemangling eset kenye in pegmendyaring kesembatu ye gasi eset meraat neng buwat.
Pengemuring Pemangling
12Mekansang nega teyen sugiren ku dimu, segwaꞌ lein ne eset surat. Imbes et itueng surat, pegarap ku na sumurung bekeꞌ megelepan tyu na megtuturan supaya mesukup tyuʼt keenepan.
13Pegpenglingen ke et mengeꞌ yegang et tipused mu neng libun, na piniliꞌ et Empuꞌ saliꞌ mu.