1Angkansa, una et ginsan, pegtewen ku dimu na mengangat tyu dut Empuꞌ ating mengeꞌ keilangan et ginsaʼt taaw, bekeꞌ ipenelang tyu gasi pasal et mengeꞌ keilangan dye, bekeꞌ peseselamat dut Empuꞌ sabab et nebuwat Ye dut ginsaʼt mengeꞌ taaw. 2Ipenelang tyu gasi pasal et mengeꞌ surutan bekeꞌ ginsaʼt pegibuten, supaya mekepengebiyagan tyu et kaya sasew bekeꞌ mesanang, bekeꞌ metanam dut pasek ketignaan sampay mepengendelan eset ginsaʼt ebiaꞌ. 3Menunga baꞌ menelangin tyu samat itue bekeꞌ kekeenep dut Empuꞌ neng Mememawiꞌ tyu. 4Na meireg Ya mebawiꞌ ginsaʼt taaw bekeꞌ mekikilala dut keberbenaran. 5Sabab sembebatu ga Empuꞌ, bekeꞌ sembebatu gasi pepetngaꞌ dut Empuꞌ bekeꞌ taaw, ating taaw neng si Jesus Kristo. 6Pinegsimayaꞌ i Jesus Kenyeng biyag sepantun kelekatan apang ipemuwas et ginsan. Ating pesebanar neng nebunayag i Empuꞌ, na meinabu dut sugat ne timpu. 7Angkan sabab et itue, aku piniliꞌ na mengengabar bekeꞌ apostol apang penulduꞌ et pegandel bekeꞌ kebebenaran dut mengeꞌ tawʼt lein Judio. Pegsusugid ku kebenaran, diki ku pengembut.

8Ingin ku ne dut ginsaʼt ketingtimungan dut ginsaʼt eensanan, na mengeꞌ kelelekian na pasek metignaꞌ megperibuwat et keremut dut pegpenelang, mengeꞌ kelelekian kaya iseg etawa kesagkaꞌ.

9Ingin ku gasi mengeꞌ kelilibunan endey pebiꞌbiriꞌ eset diriꞌ dye, imbes megbadyuꞌ et meatur, sereng neng pinekayan, sampay diki nekesulapid buek. Sampay diki megpepakay et bulawan etawa buligaꞌ, etawa pegbadyuꞌ et mengeꞌ memeargaꞌ. 10Erapun pegbadyuꞌ dye et menunungang buwat, atin ne kedyeng manis ne teup dut mengeꞌ kelilibunan baꞌ sugiren dye mengempuꞌ dye dut Empuꞌ. 11Mengeꞌ kelilibunan subaliꞌ pepetimemes baꞌ timpuʼt peganad bekeꞌ lulus pesakup. 12Diki ku pegtugutan menulduꞌ sebarang mengeꞌ kelilibunan, etawa menginuna dut mengeꞌ kelelekian. Keilangan dye pepetimemes ganang megtingtimung kew neꞌ bilang ketingtimungan. 13Sabab ganang ginuna et Empuꞌ taaw, si Adan key binuwat meguna, mura si Eba. 14Bekeꞌ diki si Adan unang nerundingan i Seytan, erapun ga libun key nerundingan bekeꞌ negmendyaring mekeselaan dut Empuꞌ. 15Segwaꞌ gasi mebawiꞌ mengeꞌ kelilibunan mapet megyegang, baꞌ dye megpelahyun et pegandel, bekeꞌ pegmergaꞌ eset mengeꞌ sebayaꞌ, sampay pasek metignaꞌ, na maya menungang arat.