Bibeli Luayãtaalá Zia yã́ 1

ZIA YÃ

Yã́ pↄ́ kú láɛ bee guuↄ

Zãa mɛ́ Bibeli lá gbɛzã kɛ̃̀. À yã́ dasi pↄ́ Yesu Kilisi bìiwàɛ bↄↄlɛkɛ̀wɛ̃ɛ (1.1), yã́ pↄ́ a è gↄↄ pↄ́ Lua Nisĩna dɛ̀dɛwà (1.10). Gↄↄ pↄ́ à lápi kɛ̃̀, a ku Patemↄ gũgũnaaɛ. Wàlɛ aà wɛtã kɛ́ àlɛ Yesu baona kpá yã́i (1.9), asa gↄↄ bee Lomadeↄ kía lɛ́ ĩada Yesudeↄwa. À lápi kɛ̃̀ Yesu gãli mɛ̀n sopla pↄ́ aa ku Azii bùsuuↄnɛɛ, gu pↄ́ wì mɛ tia Tuukii.

Tó Yesudeↄ ku wɛtɛ̃a guu, kɛ́ Dii mɛ̀ndona Yesu Kilisi aa zɛ̀ò yã́iɛ. Kua yã'ĩa guu Zãa láɛ bee kɛ̃̀nɛ́ kɛ́ wà zɛ gbãa luanaaikɛa guu ń zia yã́ pↄ́ an wɛ́ dↄio. Lápi guu Zãa wɛ́pungu pↄ́ a èↄ yã'ò ń a lɛɛũaↄ dasi. Gbɛ̃́ pↄ́ aa luabaakuańnↄ káau taala dↄ̃ↄ fↄ̃ yãlɛɛũapiↄ gbadↄ̃, ãma dãↄ ń asii dↄ̃o. Wɛ́pungu pↄ́ Zãa èↄ yã́ↄ dodoa, ãma an yãmi doũɛ. Gbɛ̃eↄ ì asiiyãpiↄ bↄↄlɛkɛ dodoa, ãma yã́zĩnda pↄ́ lápi lɛ́ o ku wásawasaɛ: Vãi a kigↄↄsoplanable, ãma Lua ń a gbɛ̃́ↄ zĩ̀ gbɛzã ble Yesu Kilisi sabai, asa ↄ̃mɛ Dii ũ ado.

A daalɛkĩi Zãa azĩa yã'ò Yesu Kilisi pↄ́ bↄ̀ gau zĩna ũ (1.1-8).

Aà waaso sɛ̃́ia guu, à yã́ pↄ́ à wɛsìɛ a wɛ́pungu sɛ̃́ia ea guuↄ sɛ̀lɛ sìu. A guu Yesu òɛ̀ aà lákɛ̃ Yesude gãli mɛ̀n sopla pↄ́ ku Azii bùsuuↄnɛ (1.9-3.22).

Bee gbɛa Zãa sù è á kú musu, we a wɛ́punguↄ è dasi: Luabɛdeↄ kúlɛa Luaɛ ń Yesu Kilisio (lɛɛ 4-5), lá kooa ń a kã́n'ↄ mɛ̀n soplaↄ (6.1-8.1), kãae mɛ̀n soplaↄ pɛa (8.2-11.19), dalagↄ̃ↄ ń wài mɛ̀n plaↄ (12.1-13.18), sã ń gbɛ̃́ pↄ́ à ń bóↄ, yã́kpalɛkɛgↄↄ pↄ́ malaikaↄ a baokpà (14.1-20), kìsia gbɛzã mɛ̀n sopla pↄ́ dɛ Lua pↄkũma ũↄ (15.1-16.21), Babɛli lɛ́lɛa, zĩblea wàiwa ń ãnabi ɛgɛnao ń Ibiisio (17.1-20.10), luabɛ dafu ń tↄↄlɛ dafuo ń Yelusalɛũ dafuo (21.1-22.5). Lápi láakĩi Yesu lɛgbɛ̃̀ à mɛ̀: Má mↄ́ tia (22.6-21).

Gbɛ̃́ pↄ́ aalɛ lápi kyokɛↄ fↄ̃ yã́ↄ gbadↄ̃, tó aa wɛ̀ɛlɛ yã́pi wásawasa dↄ̃ yã'ĩa pↄ́ a su ń le zia yã́ musu. Zãa lɛ́ vĩadada Lua gbɛ̃́ↄzi no, àlɛ ń gba sↄ̃ ĩadamagↄↄ. Wɛ́pungu pↄ́ Zãa è lɛ́ ↄlↄnɛ́ yã́ pↄ́ a yã́i Yesu Kilisi gà a vùi, àizãna yã́ pↄ́ aaↄ kuò e gↄↄpii.

Láɛ bee bↄkĩi

1Lua yã́ pↄ́ lɛ́ mↄ́ kɛi dà Yesu Kilisiɛ aà biiwà a zↄ̀blenaↄnɛ, ↄ̃ à a malaika zĩ̀ ma Zãa a zↄ̀blenawa, a tò ma yã́pi dↄ̃̀. 2Lua yã́ pↄ́ Yesu Kilisi dɛ a seelade ũ ↄ̃ má è, ↄ̃ málɛ o. 3Gbɛ̃́ pↄ́ zia yã́ɛ bee kyokɛ̀ ń gbɛ̃́ pↄ́ aa a yãmà aa kũaↄá báaadeↄnɛ, asa a gↄↄ kãikũ̀.

4Ma Zãa mámɛ ma láɛ bee kɛ̃̀ gãli sopla pↄ́ kú Azi bùsuuↄnɛ. Lua pↄ́ kú za yãa mɛ́ a ku tia mɛ́ àlɛ mↄ́ ń a Nisĩna mɛ̀n sopla pↄ́ kú a kpalabaa aɛↄ 5ń Yesu Kilisi pↄ́ dɛ seelade náaide ũo aa gbɛ̃kɛkɛɛ́, aai á tó aafia. Yesupi mɛ́ gàbↄ sɛ̃́ia ũ, ↄ̃mɛ dṹnia kíaↄ gbãade ũ. A yewázi à wá bↄ́ wá duunau ń a au gbãao, 6à wá kpá kpalau Lua a Mae gbàgbanaↄ ũ. Ɔ̃mɛ gawi ń gbãao vĩ gↄↄpii! Ãmi.

7Ma, àlɛ mↄ́ luabɛpuanau. Gbɛ̃́pii a wɛsiaàlɛ, baa gbɛ̃́ pↄ́ aa aà zↄ̃̀ↄ, dṹnia bui píi i ńzĩa gbɛ̃gbɛ̃ aà yã́ musu. Aà kɛ màa! Ãmi.

8Dii Lua mɛ̀: Mámɛ má Alafa ń Omɛgao ũ. Ma Gbãapiide má kú yãa mɛ́ má kú tia mɛ́ málɛ mↄ́.

Yesu Kilisi bↄ mↄa Zãawa

9Mámɛmaa Zãa á gbɛ̃do, naa Yesuwa guu kↄ̃gbɛ̃ↄn wá ũ wɛ́tɛ̃a guu, kpalablea guu, mɛnakɛa guu. Má kú ísia gũgũna pↄ́ wì mɛ Patemↄ guu luayã'oa ń Yesu seeladekɛo yã́i. 10Dii gↄↄzĩ Lua Nisĩna dɛ̀dɛa, ↄ̃ ma lↄↄ gbãa mà ma kpɛ lán kã̀ae'ↄwa 11à mɛ̀: Yã́ pↄ́ ń è kɛ̃ lá guu, ní kpã́sã gãli sopla pↄ́ kú wɛ̃́lɛɛ beeuↄnɛ: Ɛfɛsɛ, Simiina, Pɛɛgaũ, Tiatii, Saadi, Filadɛlifi ń Laodisio.

12Ma lili mà gbɛ̃́ pↄ́ lɛ́ yã'omɛɛpi e. Kɛ́ ma lili màa, ma vua dau è mɛ̀n sopla. 13Ma gbɛ̃e è daupiↄ zãnguo lán gbɛ̃nazĩn nɛ́wa. A ulatao daa, àlɛ gálɛ aà gbázĩ, mɛ́ vua asana dↄa aà kùawa. 14Aà mikã dɛ púntaitai lán sãkã ge buawa, mɛ́ aà wɛ́ dɛ lán tɛ́vuawa. 15Aà gbá lɛ́ tɛkɛ lán mↄgotɛ̃ pↄ́ wàlɛ baasa mua tɛ́ guuwa. Aà lↄↄ dɛ lán izↄ̃ↄsuka kↄ̃fĩwa. 16A saana kũa a ↄplaau mɛ̀n sopla, mɛ́ fɛ̃nda lɛna kpɛpla lɛ́ bↄ aà lɛ́u. Aà oa lɛ́ tɛkɛ lán ĩatɛ̃ gbãawa.

17Kɛ́ ma aà è, ma lɛlɛ aà gbázĩ, ma gↄ̃ sã́ii. Ɔ̃ à ↄplaa nàa à mɛ̀: Ńsu to vĩa n kũo. Mámɛ má Dↄaana ń Gↄ̃zãnao ũ, 18gbɛ̃́ pↄ́ ìↄ ku ũ. Ma ga, ↄ̃ má kú kɛ́, mɛ́ máↄ ku e gↄↄpiiɛ. Má ga ń bɛdao kilinɛↄ kũa. 19Yã́ pↄ́ ń è kɛ̃́, yã́ pↄ́ kúↄ ń yã́ pↄ́ a mↄ a kpɛↄ píi. 20Saana mɛ̀n sopla pↄ́ ń è ma ↄplaaupiↄ ń vua dau mɛ̀n soplapiↄ asiin kɛ: Saana mɛ̀n soplapiↄá gãli mɛ̀n soplapiↄ dↄaanaↄnɛ, mɛ́ dau mɛ̀n soplapiↄá gãli mɛ̀n soplapiↄnɛ.

Notes