Bibeli Luayãtaalá Isaia 1

ISAIA

Yã́ pↄ́ kú láɛ bee guuↄ

Ń Ɛbɛlu yã́o Isaia tↄ́ bↄↄlɛ mɛ̀ Dii ì ń suaba. Ãma Lua gbɛ̃́ↄ suabaa doũ ń pↄ́ pↄ́ gbɛ̃́ↄ ìↄ yaoo. A yã́i láɛ bee yã́ ì dimá. A lɛɛ mɛ̀n bàaↄ̃ ń soolooɛ (66) kpaalɛa lɛɛ àaↄ̃:

Lɛɛ 1 e 39 Ãnabi Isaia kɛ̀ Lua lɛdↄɛkɛna ũ Yelusalɛũdeↄnɛ yãpãsĩ gↄↄɛ. Gↄↄ bee Egipiↄ gbãa lɛ́ sↄaa mɛ́ Asiliↄ gbãa lɛ́ kã́fĩ.

E wàↄ gɛ́ Yesu Kilisi ii wɛ̃̀ 734, gↄↄ pↄ́ Aaza dɛ Yelusalɛũ kía ũ, Siliↄ ń Isailiↄ (wì mɛ lↄ Ɛflaiũↄ) lɛdoũkɛ̀, ↄ̃ aa zĩkà ń Yudaↄ, kɛ́ Yudapiↄ e namá, wi zĩka ń Asiliↄ.

Wɛ̃̀ 722-721 guu Isaili bùsu mìdɛ. Asiliↄ ń mɛɛwia Samali sì, ↄ̃ aa tà ń ń gbɛ̃́ↄ.

Wɛ̃̀ 701 guu kí Ezekia kpalablegↄↄ ↄ̃ Asiliↄ koezↄ̃̀ Yelusalɛũzi, ↄ̃ aa Yuda bùsu kpaalɛ̀.

Gↄↄ bee ãnabi Isaia bↄ̀ gupuau nɛgↄ̃na ũ, aà yã́ↄ adoa. À mɛ̀ Asiliↄ wɛ́tɛ̃amↄanɛ́ bↄ̀ Lua kĩ́iɛ, àlɛ a gbɛ̃́ náaisaidepiↄ swã́gagaɛ. À gì Yelusalɛũ dↄaanaↄ lɛkpaaĩnzi dasiↄi ń ń bↄa ikoyã kpɛo ń ń yã́zɛsaio ń lousisiyã pↄ́ aa koleaↄ ń ń gbãamↄa taasideↄnɛo ń yãpãleↄ dasi. Ãma tó kai mↄ̀, ãnabipi yã'oanɛ́ ì ń gba sↄ̃, ì ń nↄ̀sɛ níninɛ́ɛ.

Yã́pii guu Isaia ì onɛ́ aa Lua náaikɛ, atɛ̃sa lɛ́ pↄ́ a gbɛ̃̀nɛ́ↄ, aai zĩkɛ aà yãdilɛaↄwa. Isaia ò à kpàlɛ à sìwà à mɛ̀, sema luanaaikɛa mↄ́ ń yãmaakɛaↄ, baade zĩa yã́ↄ musu ń wɛ̃́lɛdeↄ yã́ↄ lↄ ń gbãadeↄ yã́ↄ píi.

Lɛɛ 40 e 55 ↄ̃ wì mɛ Isailiↄ nↄ̀sɛninia yã́. Bùsu yã́ↄ lìlɛ sa. Babilonideↄ mɛ́ aa gↄ̃̀ dↄaaa Asiliↄ gbɛu, aamɛ gↄ̃̀ gbãa vĩ, ↄ̃ aa Yelusalɛũ sì e wàↄ gɛ́ Yesu Kilisi ii wɛ̃̀ 587, aa gbɛ̃́ pↄ́ kú a guuↄ nàaa tàńnↄ. Gbɛ̃́ pↄ́ wà ń sɛ́lɛ wà tàńnↄↄ lɛ́ kↄ̃ lala wàlɛ mɛ: Lua wɛ̃́lɛ kaalɛaá Babiloni tã́aↄ zĩblea Isailiↄ Luawa yã̀ mↄↄↄ? Wà ń kɛ̃́ bùsu pↄ́ Dii kpàmáwa zã̀zã, wà gìnɛ́ aa lousisi Dii kpɛ́u, ↄ̃ an pↄ na lↄo, aa dìlɛ Dii pãkpàńziɛ, à kàaàgu màan lò, ge a gbãa vĩ lↄon lò, wa dↄ̃o.

Gbɛ̃́ pↄ́ an pↄ yaapiↄ ↄ̃ ãnabi lɛ́ yã'onɛ́. À mɛ̀ Lua a zĩkɛ Pɛɛsiↄ kí Kilusi nↄ̀sɛ guu, kɛ́ à a gbɛ̃́ↄ suaba. A ń bↄ a gɛ̃n plaade lá à ń bↄ́ Egipi bùsuu yãawa, Lua gbɛ̃́piↄ i ɛa ta bùsu pↄ́ Lua kpàmáu. Lá Lua mɛ́ dṹnia Kɛna ũ, a fↄ̃ yã́ pↄ́ a mↄ o, i gbasa kɛ. Gbɛ̃́ pↄ́ zĩblèmápiↄ tã́aↄá pↄ́ gianaↄnɛ.

Wɛdↄa yã́piↄi guu yã́ mɛ̀n síiↄ̃ↄ ku, àlɛ gbɛ̃́ pↄ́ wì mɛɛ̀ Dii zĩkɛna yã'o: (42.1-4, 49.1-6, 50.4-9, 52.13-53.12). Lua bàakuańnↄ gbɛzã lá guu gbɛ̃́pi mɛ́ Yesu Kilisi pↄ́ wà dↄ̀aa wà aà yã'ò ũ (Zĩn 8.30-35).

Lɛɛ 56 e 66 yã́á gbɛ̃́ pↄ́ wà tàńnↄↄ ɛa sua Yelusalɛũ yã́ɛ. E wàↄ gɛ́ Yesu Kilisi ii wɛ̃̀ 538 Pɛɛsiↄ kí Kilusi ↄdà láu à mɛ̀ gbɛ̃́ pↄ́ wà ń sɛ́lɛ wà sùńnↄↄ ɛa tá ń bùsuu, aai ɛa Lua kpɛ́ kɛkɛ wà dↄ. Kɛ́ aa kà we, yã́ zĩ'ũↄ ń lé. An mɛɛwia Yelusalɛũ ↄ̃̀ↄkpà, gbɛ̃́ pↄ́ aa gↄ̃̀ bɛↄ bùsu kɛ̃̀aakɛ̃aakↄ̃ɛ, mɛ́ luanaaikɛnaↄ dasi lↄo. Wàlɛ yãkɛ a zɛ́wao, baa kúlɛa tã́aↄnɛ ɛ̀a fɛ̀lɛ ń gbãao se.

Ãma ãnabi Isaia azĩa ↄ̀lↄnɛ́ Dii zĩna ũ, à bao na kpà taasideↄnɛ, à pↄsiadeↄ gbà sↄ̃. (61.1-3). Gↄↄ pↄ́ Yesu mↄ̀, a dↄ̃ zĩ pↄ́ a mↄ kɛiá ãnabikɛzĩpiɛ. (Luk 4.16-21).

Isailiↄ swã́gbãakɛa

1Yã́ pↄ́ Amↄzu nɛ́ Isaia è Yuda bùsu ń Yelusalɛũo musu Yuda kíaↄ Uzia ń Yotaũo ń Aazao ń Ezekiao gↄↄn kɛ:

2Musudeↄ, à yãma!

Gbɛ̃́ pↄ́ kú zĩ́lɛↄ, à swã́kpa!

Asa ma Dii ma mɛ̀,

ma nɛ́ↄ sì ma ń gwá,

ↄ̃ aa gìmazi.

3Zu a dii dↄ̃,

zàa'ĩna a blɛkalɛkĩi dↄ̃,

kási Isailiↄ ye yã́pi dↄ̃a yã́io,

ma gbɛ̃́piↄ líↄ yã́ dↄ̃o.

4Waiyoo bui duunkɛna pi!

Tàae kɛ̀ ń musu zↄ̃ↄ!

Gbɛ̃nazĩn vãikɛnaↄ! Nɛ́ vlãaↄ!

Aa pãkpà Diizi aa mikpɛlìɛ̀,

aa sakà Isailiↄ Lua Kuaadoadegu.

5Á ye aà ɛa á gbɛ̃ yã̀?

Bↄ́yãi a gi lɛ́ bↄ aà yã́ kpɛi?

Mi gyã sɛ̀, sↄ̃ yɛ̃̀ɛɛ làa míↄ.

6Za á kɛ̀sɛwa e à gɛ̀ pɛ̀ á miwa,

aafia ku gueio,

sema bↄ ń flàala iaↄ ń bↄ̀ uusikɛaↄ.

Wi ↄtↄ̃ a keewa à ibↄ̀o,

wi nísimawà wà zwãa yèwào.

7Á bùsu gↄ̃̀ da giiɛ,

á wɛ̃́lɛↄ tɛkũ̀.

Bui zĩ̀loↄ á buapↄ́ↄ sɛ̀lɛ á wáa,

à gↄ̃̀ da gii kɛ́ aa zĩblèwà yã́i.

8Siↄna mɛ́ gↄ̃̀ ado lán vɛ̃ɛbu kolakpɛwa.

À gↄ̃̀ lán pɛ̃n bua yãayãasuwa,

lán wɛ̃́lɛ pↄ́ wà koezↄ̃̀iwa.

9Mɛ́ i kɛ Dii Zĩgↄ̃de wá kↄ̃naeↄ tòwɛ̃ɛo,

dↄ̃ wa gↄ̃ lán Sↄdↄũwa,

wí bↄ lán Gↄmↄↄwa.

10À Lua yãma,

á kía pↄ́ á yã́ muaa ń Sↄdↄũdeↄ.

À swãdↄ wá Lua ikoyãi,

á Gↄmↄↄ dendaeↄ.

11Ma Dii ma mɛ̀:

Sa dasi pↄ́ álɛ oa dɛmɛɛ pↄe ũe?

Sa pↄ́ wì a pↄ́ kátɛu à tɛ́kũ oaa

ń são ń pↄ mɛkpaa nísio ni bↄ̀mala.

Gáae ń são ń bleo au lí kamaguo.

12Kɛ́ a mↄ zɛ ma aɛ,

démɛ bee gbɛ̀awái?

Pↄ́ↄ kìlimpaa ma uapi.

13Ásu ɛa ma gba pↄpã lↄo,

má ye á tulaleti gĩyãio.

Dikpɛ pↄ́ i kɛ mↄbↄzĩ ń kã́mabogↄↄo,

á kↄ̃kãaapiↄ vãiɛ, má fↄ̃o.

14Má za á mↄbↄa dikpɛↄgu

ń dikpɛ pↄ́ i kɛↄ píi,

ì ma kũ gbãa lán asowaɛ,

ma kpasa ń a sɛao.

15Tó a ↄsɛ̀ musu a wabikɛ̀a,

má a wɛ́ ga zuɛ,

baa tó a wabikɛ̀a kↄ̃sↄ̃kↄ̃sↄ̃,

má swã́sɛio.

Gbɛ̃dɛ'au gↄ̃́kpa á ↄwa.

16À zu'o, í gↄ̃ gbãsĩsai,

à yãvãi tó,

má ye mà á e ń vãikɛao lↄo.

17À fɛlɛ zɛ ń maakɛao,

íↄ tɛ yã́zɛdekɛai.

À gbɛ̃́ pↄ́ wàlɛ gbãamↄnɛ́ↄ dazɛwa,

í yãnakpa tonɛ pↄ́ gwana vĩoↄwa,

í yã́gↄ̃gↄ̃ gyaa gbɛ̃andoↄnɛ.

18Ma Dii ma mɛ̀:

À mↄ wà lɛdoũkɛ.

Baa tó á duuna gↄ̃̀wá tɛ̃́ɛɛ lán wↄ̃ↄtɛ̃nawa,

a gↄ̃wá púuu lán buawaɛ.

Baa tó à gↄ̃̀wá tɛ̃́ɛɛ lán gàalulawa,

a gↄ̃wá púuu lán sãkãwaɛ.

19Tó a wei mɛ́ a ma yãmà,

áↄ á bùsuɛ bee blɛ maa bleɛ.

20Tó a gi sↄ̃ mɛ́ a swã́gbãakɛ̀,

wa á dɛdɛ ń fɛ̃ndaoɛ.

Ma Dii ma lɛ́ mɛ́ ò.

21À gwa lá wɛ̃́lɛ pↄ́ náai vĩ yãa gↄ̃̀ káalua ũ sa.

Maakɛa ń yã́zɛdeo di a guu yãaɛ,

tiasa gbɛ̃dɛnaↄ mɛ́ kↄ̃̀ a guu.

22N ã́nusu tã́nkpakɛ̀,

n vɛ̃ɛ maa kɛ̀ íwa.

23N dↄaanaↄ swã́gbãakɛ̀,

aa nà kpã́iↄwa.

Ampii aa ye gbagusaɛi,

aaìↄ kpálɛkɛ gbai.

Aali yãnakpa tonɛↄwao,

aali lɛda gyaaↄzio.

24A yã́i tò ma Dii Zĩgↄ̃de Isailiↄ Lua Gbãade ma mɛ̀:

Kai ma ibɛɛↄ! Má tↄsiwáɛ,

ma pↄ i weewá.

25Má ↄdiɛwáɛ sa,

mí á baasa lán mↄwa ń kasagbↄ̃o,

mí á gbãsĩ wolowá píi.

26Má tó àↄ dↄaanaↄ vĩ lán yãawa,

á lɛdamadeↄ i gↄ̃ ń kua ziwa.

Bee gbɛa wi mɛ á wɛ̃́lɛɛ

yã́zɛde wɛ̃́lɛ ge náai wɛ̃́lɛ.

27Má Siↄnadeↄ bↄ ĩadaama guu,

an gbɛ̃́ pↄ́ nↄ̀sɛlìlɛↄ bↄ yã́zɛde yã́i.

28Má tàaedeↄ ń duunkɛnaↄ wíwi píiɛ,

gbɛ̃́ pↄ́ aa pãkpàmaziↄ midɛ.

29Wí a á kṹ

gbɛ̃́nɛli pↄ́ kàágu a sa'òmáↄ yã́i.

Á gɛɛ a gↄ̃ kpá á wɛ́iɛ

swalu sa'oa pↄ́ a zɛòↄ yã́ musu.

30Á gↄ̃ lán gbɛ̃́nɛli pↄ́ a lá wòlowa,

lán swalu pↄ́ a í làawa.

31Gↄ̃sa gbãa a gↄ̃ lán sɛ̃̀ giiwa,

aà yãkɛa iↄ dɛ tɛkↄna ũ.

A tɛ́kũ ń a yãkɛao sãnuɛ,

gbɛ̃e aↄ ku we à tɛ́pi dɛo.

Notes