Bibeli Luayãtaalá Galatiↄ 1

GALATIƆ

Yã́ pↄ́ kú láɛ bee guuↄ

Galati bùsu gbɛ̃eↄ Yesu baona mà wa sì Pↄlu wɛ̃́lɛgɛa gɛ̃n plaade ń a àaↄ̃deo guuɛ (Zĩn 16.6, 18.23). Ãma waasokɛn pãleↄ gɛ̀ we lↄ, ↄ̃ aa dàda gbɛ̃́ↄnɛ aa mɛ̀, sema Yesude pↄ́ aa dɛ Yudaↄ ũↄ misiilɛ Mↄizi ikoyãɛ, aai tↄ̃zↄ̃. Pↄlu kĩ́i yãdanɛ bee bↄ̀ Yesu Kilisi yã́ kpɛɛ, àlɛ Galati bùsu Yesudeↄ da zↄbleu. Kɛ́ a mà gbɛ̃́piↄ lɛ́ swã́sɛ yã́pizi, ↄ̃ à láɛ bee kɛ̃̀nɛ́.

Kɛ́ Pↄlu ye a gbɛ̃́ↄ ɛa laaidↄ baona zɛ́ mɛ̀ndonawa, ↄ̃ à yãdàdanɛ́ à mɛ̀:

À azĩa yã́ bↄↄlɛkɛ̀nɛ́, aà nↄ̀sɛlilɛa ń lɛdoũ pↄ́ wa kɛ̀ ń kↄ̃o ń Yelusalɛũ dↄaanaↄ ikoyãpi musu ń a kↄ̃yãmasai ń Piɛɛo yã́pi musuo. Pↄlu a zĩnakɛyã bↄↄlɛkɛ̀nɛ́, à kpàlɛ à sìwà kɛ́ a zĩnakɛpi bↄ̀ Dii kĩ́iɛ (1-2).

À gbãa'è Luabaakuańnↄ káau yã́ↄwa, ↄ̃ à mɛ̀ gbɛ̃e a e bↄ maa Mↄizi ikoyã maà sabaio, sema Yesu Kilisi náaikɛa (3-4).

À tɛkpàńgu aa wɛtã wàↄ ńzĩa vĩ ń Lua Nisĩna dↄaaanɛ́o, asa Nisĩnapi ì yãmaaↄ inɛ́ dasi, a sɛ̃́ia mɛ́ yeakↄ̃zi ũ (5-6).

À kũ̀ Yesu gãli píi ń Yesudeↄ píi swã́sɛ Pↄlu yã́pizi, aai sí ń nↄ̀sɛmɛndoo kɛ́ aa e bↄ zↄblea bui píiu.

Baona pãle kuo

1-2Ma Lua zĩna Pↄlu ń ma Yesude dee pↄ́ wá sãnuↄ píi wámɛ wa láɛ bee kɛ̃̀ Yesude pↄ́ aa ku Galati bùsuuↄnɛ. Ma zĩnakɛ i bↄ gbɛ̃nazĩna kĩ́io, gbɛ̃nazĩna mɛ́ i a lɛdↄɛkɛo, Yesu Kilisi ń Mae Lua pↄ́ aà bↄ̀ gauo mɛ́ ma zĩ. 3Lua wá Mae ń Dii Yesu Kilisio gbɛ̃kɛkɛɛ́, aai á gba aafia. 4Kilisipi gì a wɛ̃nii Lua wá Mae pↄeãwa, à wá duuna kɛ̃̀wá, kɛ́ à e wá bↄ dṹnia tia vãiɛ beeu. 5Lua mɛ́ gawi vĩ gↄↄpii! Ãmi.

6Kɛ́ álɛ bↄ Lua pↄ́ á sisi a gbɛ̃kɛ guu kpɛ màa gↄ̃̀ↄ, álɛ zɛ ń bao koleao, yã́pi dìa maamaaɛ. 7Baona pãle kuo. Gbɛ̃́ pↄ́ ye Kilisi baopi lilɛↄ lɛ́ á liaaɛ. 8Baa tó wápiↄ ge malaikae bↄ̀ luabɛ à baona pↄ́ i kpaaĩ ń pↄ́ pↄ́ wá òɛ́oo waasokpàɛ́, Lua láaikɛwà. 9Wá òɛ́ yãa mɛ́ málɛ oɛ́ lↄ, tó gbɛ̃e baona pↄ́ i kpaaĩ ń pↄ́ pↄ́ á màoo waasokpàɛ́, Lua láaikɛwà.

10Málɛ sáau wɛɛlɛ gbɛ̃nazĩnawa yã̀, ge Luaɛ? Málɛ wɛɛlɛ ma yã́ ká gbɛ̃nazĩnagu yã̀? Tó gbɛ̃nazĩna má ye à káńgu e tia, dↄ̃ Kilisi zↄ̀blenan ma ũo.

Yesu Pↄlu sɛa a zĩna ũ

11Ma gbɛ̃́ↄ, má ye à dↄ̃ kɛ́ baona pↄ́ mi kpáɛ́ i bↄ gbɛ̃nazĩna kĩ́io. 12Mi ma gbɛ̃nazĩna kĩ́io, gbɛ̃e mɛ́ i damɛɛo, Yesu Kilisi mɛ́ bↄ̀ mↄ̀oa.

13Á mà lá má kú yãa Yudaↄ zɛ́u. Ma Yesudeↄ wɛtã̀ wɛ̃́lɛ ń wɛ̃́lɛo pãsĩpãsĩ, má wɛ̀ɛlɛ mà ń midɛ. 14Ma Yudaↄ zɛ́pi yã́ kũ̀ ↄplapla dɛ ma sáaↄla dasi, ma ãia dɛńla wá deziↄ fɛlɛkaayãpi guu. 15Ãma Lua ma dilɛ a pↄ́ ũ za ma da nↄ̀sɛu. Kɛ́ aà ma sísia a gbɛ̃kɛ guu gↄↄ kàɛ̀, 16ↄ̃ à a Nɛ́ gbàɛa, kɛ́ mà aà baona kpá buipãleↄnɛ. Mi gɛ́ kpálɛi gbɛ̃e gɛ̃zĩo, 17mi gɛ́ Yelusalɛũ gbɛ̃́ pↄ́ aa dɛ zĩnaↄ ũ ma ãaↄ kĩ́io, ma gɛ Laalubuↄ bùsuu gↄ̃̀ↄɛ, ↄ̃ ma ɛa ta Damasi.

18Wɛ̃̀ àaↄ̃ gbɛa ↄ̃ ma gɛ Yelusalɛũ, kɛ́ wà kↄ̃ dↄ̃ ń Piɛɛo, ↄ̃ ma kɛaànↄ gↄↄ gɛ̃o. 19Mi zĩna pãle eo, sema Dii dãuna Zaaki bàasio. 20Yã́ pↄ́ má kɛ̃̀ɛ́pi, má sì ń Luao, ɛɛ málɛ tóo. 21Bee gbɛa ma gɛ Sili bùsuu ń Silisi bùsuo. 22Gↄↄ bee Yesude pↄ́ kú Yudeↄ i wɛsimalɛo, 23ãma aa su mà wà mɛ̀, gbɛ̃́ pↄ́ lɛ́ ń wɛtã yãa mɛ́ lɛ́ zɛ́ pↄ́ á wɛ̀ɛlɛ kaalɛpi waasokpa tiasa, 24ↄ̃ aa Lua tↄbↄ̀ ma yã́ musu.

Notes