1N pooloŋir, n pooyookir, n kɔɔ n kpaab niwa.
N pɔ n baarii nan bonnunubit nba tee mir nae;
n di siat nan sagbente; n nyu tilɔɔna daame nan naabiin.
Poob lomm yaŋ
N yɔɔsnba, ii di kii biaki nyu man nan yaa tan saa gboo.
Yaŋ nba pukin munna
Poo lomm yaŋ
2N dɔɔr gɔɔne, ki damii damiit,
ki li damiit ni ki n yɔɔk koon n tammɔb.
Jɔɔ lomm yaŋ
N yɔɔk, ŋaant man kɔɔ.
N pooloŋir, a tee nan ŋmann nae n boor.
Marin borik n yura, ki n yut borik nan sinsamiin.
Poo lomm yaŋ
3N dɔŋ yokita; bee paake ki n saa ŋamm yoo?
N wuur n taawa, bee paake ki n saa te ki lin ji jɔkin ni?
4N yɔɔk tun u nuu gann fɔnn niwa,
ki li maŋin nan waa nakinin na.
5Ki n bo teen siir nan man te ki wun kɔɔ.
Ki bonnunubit nba tee mir na pɔr n nii,
ki n niibira maan mir nyun, yoo nba ki n soor ganlootir na.
6Ki n loot gann na ki tur n yɔɔk, ŋaan sɔɔ ki u dɔŋ yaata.
Ki n lek loon man gbat u kunkɔr. Ki n lin lomɔ, ŋaan ki ki lau.
Ki n yiu, ŋaan ki ki gbat ki u toon.
7Ki nyiɔk guura na lin doo na ni ki tan lan, ki faan ki turin daŋ;
ki guura nba be doo na joonn boor na liat n gbakit foouk.
8Jerusalem poob, ii sat mɔb nanin nan li-i tee ki i la n yɔɔk na,
i saa betɔ nan u niɔŋ te ki n baŋa.
Poob lomm yaŋ
9Poo nba mantik fan ki gar poo kur na,
a yɔɔk na mɔk bɔkitu nan jaleeb nba be nawa-a?
Bia bonte be u ni, ki teen bakitnauŋ,
ki a loon ki tin sat mɔb nana ni?
Poo lomm yaŋ
10N yɔɔk na ŋan ki bia mɔk paŋ,
u be u kɔɔe, li-i tee ki a got niib tusaa piik ni.
11U numpo tee nan kutmɔnt nae, ki ŋarii,
ki u yut ŋan ki bɔn nan naakpaabɔŋ na.
12Ki u ninbina fan nan ŋmana nba tuu be kpenu ni biaŋinba na,
ki tee nan ŋmana nba ki bi wurib naabiin, ki bi see kpia kpenu na.
13U kpianii na mɔk fant ki tee nan kpaab nba gbee nan kpinfaat
nan baarii na.
Ki u mɔgbana tee nan tipuuk nba ki bi gbar mir tulaar-nyun na.
14U nii na fan,
ki u pir banii nba ki bi tabin tanbinyinyira li paak na.
Ki u gbanant na tee nan loobnyana nba ŋarii biaŋinba na,
ki nyirii nan tanbinyinyira na.
15Ki u pana tee nan tann nba chaa, ki tee jaantarik,
ki bi sikinir salima toota ni na.
Ki u paŋ tee nan Lebanonn kunkona ni kpek-foot na.
16Ki u mɔgbana na mɔɔtu man; ki u gbanant kur po ŋan.
Jerusalem poob, n yɔɔk nba naan biaŋinbae na.
Poob lomm yaŋ