1An áinen me búoh Yésu aamme Kirista ahu, an ahumu o añil ala Aláemit nam ; ban an ábboli me Aláemit Ᵽaaya, ᵽan ábboli ᵽoᵽ guñolol. 2Ubbólial me Aláemit, ban núkanumal ᵽoᵽ gúboñol, dó ᵽan digitenolal me búoh núbbolialboli guñol Aláemit. 3Maagen, ébboli Aláemit, yo yuomme ékanum gúboñol ; ban ékanum gúboñol étañiut, 4mata añil ánoan ala Aláemit nahehek mof mamu ; ban ni gáinen gagu gololal núhekumal mo me. 5Ay ahek me mof mamu, íni let an ahu áinen me búoh Yésu aamme Añol Aláemit ?

6Aĉila faŋaol Yésu Kirista ajoulo bi ni wolal ni mal mamu maa gábatiseol ni físim fafu fal eĉelol. Let ni mal bare najoulo, bare mal ni físim. Ban Biinum Banabe bigitene búoh maagen dom, mata Biinum babu bo buomme maagen mamu. 7Kan ñer baje ugitenum wono úfaji : 8Biinum babu, mal mamu ni físim fafu ; ban wo waamme úfaji ujamojamor ni yo. 9Iní me ban uruhenal bagitener babu baa bugan, ube baamme bal Aláemit bufaŋbofaŋ fúf : Aláemit nagitengiten mala Añolol ! 10An áinen me ni Añol Aláemit, an ahumu náineyinen ni firim faufu. An áinenut me ni Aláemit, an ahumu najojoh Aláemit aᵽula-elob, mata áinenut ni gurim gagu go Aláemit alob me mala Añolol. 11Gurim gaugu go guomme uge : Aláemit nasenolalsen buroŋ babu bábaerit me, ban buroŋ baubu ubu ni Añolol. 12An ayab me Añol Aláemit, buroŋ babu nayabe ; an ayabut me Añol Aláemit, ayabut may buroŋ babu.

13Nihiĉululhiĉ gurim gaugu, buru jáinen me ni gajow gagu gal Añol Aláemit, tima n’jiffas búoh jibabaj buroŋ babu bábaerit me. 14Gafium gauge nubajale n’Aláemit gaa búoh úcinaol me waf wajaore ni búnongumol, ᵽan áttunolal. 15Nemme nuffasale búoh Aláemit wáfowaf wo núcinaol náttuneolaltun, nuffasale may búoh wo núcineaol me ᵽan asenolal wo.

16An ajuh me atiol akan gatil gaatut guĉilol naĉet, naate alaw, ban Aláemit ᵽan asen atiol ahumu buroŋ, eno maagen mamu gatil gaugu guotut guĉilol naĉet. Maagen baje gatil go nihi guĉil an naĉet ; let gatil gaugu niegul jilaw mala go. 17Bakaner bánoban baarat gatil gom ; bare let gatil gánogan nihi guĉil an naĉet.

18Nuffasale búoh an áni me añil ala Aláemit, mati nah’atil áni to me, mata Añol Aláemit napoyolpoy ban Seytane mát’ájuol ekan wáfowaf. 19Nuffasale ᵽoᵽ búoh Aláemit aĉilolal, bare mof mamu ᵽe umu ni fujoh faa sembe sasu saa Seytane. 20Nuffasale may búoh Añol Aláemit najoulojow, ban nakanolal min uffasal Aláemit ahu ala maagen. Ni Añolol Yésu Kirista ᵽoᵽ núbajumale gajogor n’Aláemit ahu ala maagen. Kirista ahumu, aĉila fumumol aamme Aláemit ahu ala maagen, aĉila aamme buroŋ babu bábaerit me.

21Gúñum, jíkanum úlaemit waw galet me bugaa maagen !