Eletar yay yo Pool ahiĉ me bugaa
Galasi
Waf waw wabaj me n’eletar yauye
Eletar yauye Pool nahiĉyohiĉ bi ni sijangu sasu saa Galasi, yaamme n’gañen gamay gaa mof mamu maamme jama Turuki. Pool ailene sice ni sijangu sausu ni bújaorol búutten bi ni búfatten saa burokol. Bare ᵽúrto aĉila, bugan guce n’gújoul íkiil gugiten bagitener bice búbuli. Ejangaraay Esúif yay gútut bugagu gúkanumekanum nánonan bakaner bice baa gúboñ Esúif yay. Bakaner baubu bífirefiren etiñor ni bugan galagene ulago uce, ban ni buoh wáineaw gunogen búhut.
Pool namaŋe akan bugaa Galasi n’gujuh búoh éinen ni Yésu Kirista yo bare éjue ekan an náni m’buroŋ baĉole ban ni búari n’Aláemit.
Ni Galasi 1 ni 2, nagitendógiten buroŋol faŋabo. Aĉila aamme Esúif nabbanno áni aboñer ala Yésu Kirista bi ni galet me Esúif. Pool nabaje aceŋor bugo ni aᵽotora ahu Ᵽier (Galasi 2.11-21). Naosenol yauye búoh : bugan bugagu Aláemit ᵽan ayabil mata gúineyinen ni Yésu Kirista, bare let mala min gúkanum me gúboñ guce.
Ni Galasi 3 ni 4, Pool ni gurim gagu gaamme ni Bahiĉer babu Bufan babu náhagoe min aĉimen firimol. Wo Aláemit alob me esen, uwu to balama gúboñ gagu, ban ni Yésu Kirista úkanoume. Bugan bugagu ᵽe Aláemit najogiljoh gure heb. Gujogojogor n’Aláemit ban ni gujogor ᵽoᵽ bugan-ó-bugan ni gupalil, dó ᵽe ni búkanum baa Yésu Kirista. Dáuru gogor Esúif ni galet me Esúif, garoŋe buroŋ bábuliore (umigel ni bugan galet umigel), wáine ni waare.
Ni Galasi 5 ni 6, Pool náᵽajuᵽajul bu ejangaraay gúomum me bugan galet ni fimigelet. An áinen me mat’abbañ abaj biinum bal ekanoro o faŋaol an aĉole (juluj Galasi 3.11) ; nakakan til an abaje biinum bal eramben bugagu. Maagen mamu, gúboñ Kirista bajut uce wo gúfirene, bare guoseh bugan bugagu gurambenor eteb bítebil (Galasi 6.2). Ení an alet ni fimigelet, dóemme ehat biinum babu bajoumulo me n’Aláemit m’bíĉibbeni min uilo mala gupali.
Basaf babu baa Pool
1Injé Pool aamme aᵽotora ala Yésu Kirista ihiĉulul eletar yauye. Eníom aᵽotora let ni bugan bugagu ejoumulo, let ni búkanum bal arafuhow níomum aᵽotora, bare ni búkanum baa Yésu Kirista ni Aláemit Ᵽaaya ainnulol me ni gaĉet me. 2Injé ni gutiolal ᵽe gaamme babe jihiĉulo eletar yauye bi ni bugan bugagu bugaa sijangu sasu saamme ni mof mamu maa Galasi.
3Mbi Aláemit Ᵽayolal ni Ataw Yésu Kirista gúsonienul ban n’guhalul ni gásumay ! 4Ataw Yésu Kirista nasesen buroŋol bi eallorolal n’utilolal, tima naramolal ni sembe sasu saarat mee saa buroŋ baube baa jama, ti Aláemit aamme Ᵽayolal amaŋ yo me. 5Mbi Aláemit asali bi nánonan ! Amen.
Firim fafu fanur fafu pat Fásum me
6Bare ñer waf wanur : Kanomkan gajahali min buru jifaen me júvu búsol jas Aláemit aĉobul me ni búkanum baa gáji gagu gaa Kirista, min jíbaho jilagen firim fice fo jujoh me búoh fo fuomme Firim Fásume. 7Ban, « firim fásume » fice fubajut ; dáuru bugan gulimbeneul mee gamaŋe ébahen Firim fafu Fásum me faa Kirista. 8Bare eno me ace, hani loe ni wóli, hani amalaka áᵽullo n’émit, avareul Firim Fásume fábulie ni fo wóli jivareul me, niege : mbi Aláemit abelen an ahumu ni sambun ! 9Julobenul yo jiban, ban ban ibbañ ilobul yo maer búoh : An avareul me Firim Fásume fúbuli ni fo jiyab me, an ahumu mbi Aláemit abelenol ni sambun !
10Maer bu jiᵽinore ? Ter ínje fiŋes niom ni fo min mbi bugan bugagu guruhenom, ter min mbi Aláemit aruhenom ? Ter fiŋes niom ni fo min ísum bugan bugagu ? Eno me ínje niroŋe n’eŋes min ísum bugan bugagu, kan ilet amigel ala Kirista.
Bu Aláemit aĉob me Pool áni aᵽotora
11Gutiom, ban ilobul waf wauwe : Firim fafu Fásum me fo nivareul me fujoumulat ni arafuhow. 12Ᵽiᵽima iyabut fo ni an, ban ᵽoᵽ an aligenutom fo, bare Yésu Kirista faŋaol akanom min iffas fo.
13Maagen mamu juune gulob bu nih’ikanen me no, no niomen me ni bulago babu bal Esúif yay. Jiffase bu niakenen me n’élamen Jangu yay yal Aláemit, ban nikan wáfowaf tima ninemen yo. 14Gammeŋe ni gupalom Esúif bugaa jabbagom ínje ifaŋenil ebaj buaken ni bulago babu bololal, nifaŋenil nár ésuᵽ ni mukanay mamu maa sipayolal gufan.
15Bare Aláemit ni músumol naĉobomĉob alalen balama ibugi. Ban no najoh me búoh wáriari, 16nakanomkan min iffas Añolol tima nikan bugan bugagu galet me Esúif min guffasol. No ñer, ikait iroren an min atajenom biinum. 17Ijout ᵽoᵽ bi Yérusalem ik’itoh bugan bugagu gamundom me gúni uᵽotora, bare nifaen ijow bi ni mof mamu maa Arabi, ᵽúrto níbbañul bo bi n’ésuh yay yaa Damas.
18Ᵽúrto símit sífaji, nijow bi Yérusalem ik’iffasor ni Ᵽier, ban nirobo súndool gunah gono gaat (15). 19Ijugut bo aᵽotora ace, eno let Saak aamme ati Ataw Yésu. 20Wo nihiĉulul maa maagen dom, Aláemit naffase búoh ibijut.
21Ᵽúrto, nijow bi ni mof mamu maa Siri ni maa Silisi. 22No, bugaa sijangu sasu saamme ni mof mamu maa Yúde guffasenutom ni buul ; 23guuwun bare bugan bugagu guoh : « An ahu o náh’álamenolal me no, umu maer ni gavare gáinen gagu ni Yésu Kirista, go namaŋen me ehajen. » 24Ban nihi gusal Aláemit múmbam.