Kanu kədɛrəmɛ kɔn Nuha
1Kɔ Kanu kəmpocɛ Nuha pətɔt k'awut ɔn, kɔ kəloku ŋa: «Nəyɔnɛ akombəra, nəkom pəlarəm, nəlas antɔf. 2Kəyɛfɛ mɔkɔ, sɛm ya doru fəp, kəbəp bɛmp, sɛm yɛfɛt kɔ lop, yende yec-nesɛ nu. Nəndetam kəc-sɔm yi. 3Paka o paka mpɛ peyi wəyeŋ pɔc-kɔt mɔ, pɔyɔnɛ nu peri pəmɔ ntɛ inasɔŋ nu yokom ya yika yɛcaŋk kɔ ya tɔk mɔ. Isɔŋ nu oŋ ndɛkəl yayɔkɔ fəp. 4Mba pəmar fɛ nəde nəc-sɔm wɛsɛm nwɛ wɔsɔrɔyɔ mecir mayi mɔ. 5Indeyif nu teta mecir monu, mmɛ mɔyɔnɛ kəyi doru konu mɔ. Indeyif sɔ ti sɛm fəp nyɛ yendedif fum mɔ. Pəmɔ ntɛ indeyif ti fum nwɛ endedif wɛŋc mɔ.»
6«Nwɛ endif fum mɔ,
pəmar padif sɔ (məna wəkayi),
bawo Kanu kəlompəs fum pəwurɛnɛ kɔ nkɔn sərka.
7Kɔ nəna, nəyɔnɛ akombəra, nəkom pəlarəm, nəsaməsər doru.»
8Kɔ Kanu kəloku sɔ Nuha k'awut ɔn: 9«K'ina, isɔŋ nu temer kəsek ka danapa kɔ nəna, kəbəp k'awut-sɔ anu kɔ nəna nəŋcepər-ɛ 10kɔ ca fəp nyɛ yɔnɔŋkər nu mɔ: Bɛmp, sɛm ya dare kɔ ya dop, nyɛ yowur debil mɔ, kɔ nyɛ andekom nnɔ doru mɔ. 11Isɔŋ nu temer, ntɛ t' indeyɔ: Domun dɔfɔdesɔdi antɔf, wəcafən ɔfɔdesɔyi nwɛ endeləsər antɔf mɔ.» 12Kɔ Kanu kəndeŋər: «Paka pa danapa dosu pɛmpɛ mpɛ pendeyi su dacɔ kɔ nəna, kəbəp ka ca yeŋesəm doru o doru mɔ. 13Isɛkən ambəŋcəran (asiŋki) ŋem nde dəkɔm. In' ende kəc-cɛm-cɛməs im temer ntɛ isɔŋ antɔf mɔ. 14Tɛm o tɛm ntɛ wəcafən ende pəc-biyɛ, a asiŋki ŋowur mɔ, 15iŋcɛm-cɛmnɛ temer tɔkɔ inasɔŋ' un kɔ ca nyɛ yeŋesəm doru mɔ, wəcafən ɔfɔdesɔtuf nwɛ endesɔləsər ca ya doru fəp mɔ. 16K'Iŋc-kɔna-nəŋk asiŋki-ɛ, iŋcɛm-cɛmnɛ temer ta doru o doru ntɛ inasɔŋ' un, kɔ ca fəp nyɛ yeŋesəm doru mɔ.» 17Kɔ Kanu kəŋgbɔkərɛnɛ sɔ moloku mamɛ Nuha: «Asiŋki ŋementər temer ntɛ isɔŋ nu kɔ ca ya doru nyɛ yeŋesəm mɔ.»
Nuha k'awut-ɔn maas: Doru dofu, kɔ kiciya kəfu sɔ
18Awut a Nuha aŋɛ ŋanawur debil mɔ ŋanayɔnɛ: Semy, Ham, kɔ Yafɛt. Ham ɔyɔnɛ papa wəka Kanahan. 19Awut a Nuha akaŋɛ maas ŋagbɔkərɛ sɔ kəlas antɔf.
20Kɔ Nuha ɔyɔnɛ wəbifti antɔf k'ɔmbɔf len yokom. 21Kɔ Nuha omun member k'eŋcis. K'ɔŋkɔ pəwur kəsɔkər nde abal ŋɔn disrɛ. 22Ntɛ Ham papa wəka Kanahan ɛnəŋk kas Nuha pəyi kəsɔkər mɔ, k'ɔŋkɔ pəloku ti awɛŋc aŋa mɛrəŋ, aŋɛ ŋanayi nde doru mɔ. 23Semy kɔ Yafɛt ŋalɛk kəloto. Mɛrəŋ maŋan fəp, kɔ ŋaŋkumpənɛ kəloto kaŋkɔ dəcəro. Kɔ ŋaŋkɔ tokəmuntəra kɔ ŋaŋkɔ ŋabəp papa kəŋan pəyi kəsɔkər. Kɔ ŋaŋkump kɔ kəsɔkər kəŋkɔ ɛnafəntərɛ mɔ. Mba ntɛ ŋanakafəli cəro cəŋan a kɔ ŋaŋkɔ kas kəŋan tokəmuntəra mɔ, ŋananəŋk fɛ kas kəŋan kəsɔkər. 24Ntɛ pəŋcɛrŋɛ Nuha kəcis kaŋkɔ disrɛ mɔ, k'aloku kɔ tɔkɔ pənayi kɔ ntɛ ɛnacis mɔ, kɔ tɔkɔ wan kɔn wələpəs ɛnayɔ kɔ mɔ. 25Kɔ Nuha oloku:
«Intolanɛ Kanahan pəlɛc!
Kanahan pəyɔnɛ wəcar ka acar a awɛŋc aŋa!» 26Kɔ Nuha oloku sɔ:
«Intola Kanu Kəpɔŋ, Kanu ka Semy,
Kanahan pəyɔnɛ wəcar kəŋan!
27Kanu kəyac Yafɛt!
Yafɛt pəyi abal ŋa Semy disrɛ,
Kanahan nkɔn pəyɔnɛ wəcar kəŋan!»
28Kɔ Nuha eyi sɔ doru meren 350, ntɛ domun dɛlarəm deŋcepər mɔ. 29Kəwon ka Nuha doru fəp, kənasɔtɔ meren 950, a k'endefi.