1Neebee nokaa yuwa, eto ko Yesus mee epee meepi ye, moga meepi ye, see menaa kuwa inii se kiebeanake. 2Tuhan me mona naagoo ko inii ewo, oma maseekee bagee daatooyiba yaato miyaa see see Waa miya kisee meetagi kaata see kuwa ikii miya ipi. 3Mée me "Inii daamaa-daamaa umiwoo, toowoo taakea, weda agiyoo taa" see menaa wegaatagea kaboo kisee ki pedeo kiyaano agiyoo okoo kaa agoo kedaa taata. Kadapoo yago apii yoga kabaano see kaboo kisee ki yoga boodi abaayaa see see okoo kaa miya pedeo agiyoo kisee ki meanee taatagea, daba se daagimagaatagea.* 4Kiya neebee nokaa yuwa, ikii gaayu ko kisee taa. Ikii digiyoo yiba ewo kaa toogee see bagee yuwa se. Mee naagoo ko oma masiyaa mée kisee ki miyaa mokoo kaata kiya ikii mee naagoo dimi se oogaatagea. 5Ikii uduma dimi mena awee da kaa toogee see bagee, egapi kaa toogee see bagee mokoo. Inii dimi mena digiyoo yiba toogee see bagee se, daatooyiba yaato bagee se. 6Kisee kemaata inii ko apanaa bagee see see se. Okoo mee naagoo ewo kaa toomoo umiyaa bagee yuwa mokoo. Inii gaayu ko daamaa ipi kaa dimi gaamaata kaama daamaa niideewoo taai.* 7Toomoo ometaa see bagee kuwa daatooyiba yaato toomoo omegee siyaa, bedaa boomagaa see uwoo notaa see bagee kuwa daatooyiba yaato boomaga-baamaga siyaa. 8Kiya inii gaayu ko dimi mena awee da kaa toogee see bagee yuwa, egapi kaa toogee see bagee kemaata inii ipi kaa daamaa niideewoo, umiwoo taai. Toopusi naadi agiyoo maanaa siyaa see see inii miya dimi mena toopusi naadi agiyoo niimaanaa taai. Kuwa ko ikigii to kaa maanaa siyaa mokoo inii miya Yesus mikee gaawoo see dimii ma, mée epa dimii ma kuwa niimaanaa taai. Bedaa mumoo to kaa maanaa siyaa mokoo inii miya 'Ogatamee me daba nadaagimaa peeyaatagi nao' see dimii mee miya niimaanaa taai.* 9Inii ko Ogatamee me inii pedeo mée kiyaano see naadi mée wigintaata bagee yuwa se kiya inii epoo Mée Tuhan Yesus Kristus doodoo inii daba mée daagimaa peeyaano see naadi daamaa mée wigintaata bagee yuwa. 10Waa meetagi naagoo inii boota kaama miya, bogaano taa kaa miya inii Waa ma enaataa umiwoo, toowoo segeesi naadi inii kaa mée yaboota.* 11Kisee kemaata ikii dimi mena daamaa pesee aakiyaabuu taano see naadi kuwa menaa yuwa daamaa aasee siwoo taai. Mikee, ikii kuwa menaa daamaa aasee taakea yoka bedaa kisee too aasee siwoo taai.

12Neebee nokaa yuwa, ikii paagoo tuku-tuku see bagee yuwa kuwa ebo ekeasii see kisege. Okoo Tuhan Wa me agiyoo omaago ma yaukuwataa, gaamaasi naadi menaa daamaa kitopetaa, kisee kiukuwagee see bagee yuwa yoka 13okoo me kiukuwagee see agiyoo kuwa kaa okoo kiiboo, epa nao naadi ebo ekeasii. Ikii aaemee-emee see kaa umiwoo, toowoo taai.

14Neebee nokaa yuwa, bedaa inii maamaa kisiino ko: Ikii paagoo agiyoo ukuwaano be see bagee kuwa okoo gaamaasi yoka asii. Weda, gaagaa see dimii agoo see bagee kuwa miya dimi mena daamaa pesee kiyaai, dabaa see bagee yuwa okoo kaa tabogeai, bedaa ikii mée uduma paagoo dimi animaata kaama daamaa omegee taai. 15Mée me kipedeo kiyaayu ko modee se masisi yoka dii. Ikii daamaa agiyoo too aaukuwagee siwoo taai, apanaa bagee kaa miya daamaa agiyoo yaukuwagee taai.*

16Dimi menaa da ede ma, ede ma siwoo taai,* 17sembahyang se daayaata kisee too ukuwawoo taai,* 18bedaa agiyoo-pagiyoo uduma yiba Ogatamee kiiboo, paamee see asegee taai. Kuwa uduma Ogatamee me ede kiyaa agiyoo yoka ikii Kristus Yesus ma dimi aagadi-maagadi naadi kaama yaukuwagee siwoo taai.*

19Roh mee se modeai.* 20Roh me mée paagoo kisee eewegaai naadi ase-manee siyaa menaa kuwa aii menaa yoka naadi kaama wisintagaakee se. 21Kuwa kiiwegayaa menaa kuwa uduma mikee Roh me menaa ye, mée me menaa too ye naadi daamaa wigineai. Wigintaata kaama mikee menaa yuwa too peneasii,* 22pedeo menaa, pedeo agiyoo uduma ekeasii, wisintagaai.

23Koogo adumeta dimii mée maniyaa Mée Ogatamee Wa me ikii daamaa wa too kiwigintaata pedeo ena ma taa see bagee kikiyaasi naadi kiasegeeke. Ikii dimi menaa da ma, dimi noogaa da ma, maa da miya uduma daamaa too kikiyaabuu siwoo see kisee too inii epoo Mée Tuhan Yesus Kristus meetagi yoo too kisee daamaa kiukuwawoosi naadi kiasegeeke. 24Waa ko ikii Ni paagoo nameei see kisetaa see Mée yoka Wa me taa ma taa kisee daamaa kiukuwawoo taapi.*

25Neebee nokaa yuwa, ikii inii kaa sembahyang mée yasegee taai. 26Ikii paagoo Yesus yiba ena kenaa bagee yuwa uduma epao see mée yaasii, okoo ebe mée yanuunuu taai.

27Mee kapogee kaa menaa kuwa Yesus yiba ena kenaa bagee uduma paagoo eewegaai. Anii Tuhan me neeta pesee da kaa anii omaago ma kisega.

28Inii epoo Mée Tuhan Yesus Kristus Wa me aii kiepa dimii mee ikii ma epo enaataa kiitoowoosi naadi kiasega. Kiyoo too.