1Ritonõpo yna Esemy, wenikehpyra exiko yna ryhmatopõpyry poko;

yna eneko, yna poremãkatopõpyry eneko.

2Yna nonory tapoise imepỹ nono põkomo a;

yna tapyĩ tao imehnõ nonory põkõ tõsesarise mã toto.

3Poetõpome ynanase, yna zũ tõ totapase exiryke zehnotokomo a;

seromaroro yna ẽ tõ pytỹpome toehse mã toto.

4Tuna se yna ahtao, epekahnõko ynanase yna okurume;

apotopokõ epehmãko roropa ynanase.

5Yna rohmanohpõko mã toto yronymyryme jumẽtu samo, kameru sã roropa,

tapotũkehse ynanase,

yrome yna oneremapopyra mã toto.

6Tonahsẽ nae yna ehtohme isene ro yna ehtohme,

tokaropose yna a Ejitu põkomo a te, axirio tomo a roropa.

7Yna tamuru tõ iirypyryme toehse toh nexiase,

toorihse mã toto,

yna etuarimãko popyra mokaro ehtopõpyry pokoino.

8Yna tuisary tõ imehnõ namotome erohnõko mã toto.

Yna onypynanohsaromepyra imehnõ mana mokaro winoino.

9Imehnõ etapananõ ytoytõko yna nonory poro.

Naeroro tomeseke sã rokẽ tonahsẽ zupĩko ynanase yna orikyryino.

10Omise yna exiryke oxirohnõko ynanase,

yna pihpyry axitũ exĩko mana orinato samo, apoto po exikety samo.

11Yna pyxiã tyyryhmase pata Jerusarẽ po ro, yna ẽxiry tõ oryximãkõ roropa, emero pata tõ po Juta nonory po.

12Zehnotokomo a yna tuisary tõ tõsexihse wewe pokona;

tamuximehxo exiketõ tyhtomase,

tounohse roropa eya xine.

13Yna poenõ tyrohmanohpose mã toto yronymyryme erohtoh tupime exikety poko.

Aimo tõ osetapãko mã toto apotopokõ omoxinety puimaryhtao eya xine.

14Tamuhpomãkõ oximõpyra toehse mã toto pata omõtoh tao,

eremiara toehse nuasemãkõ mã toto.

15Tãkye ehtoh toepase mana yna kurohtae.

Yna watoh tonõ tymyakãmase emynyhmatoh ke.

16Yna epyrypatopõpyry emero tonahkase ipunaka,

iirypyryme toehse yna exiryke,

tuãnohse ynanase yna rypyry epehpyryme.

17Yna kurohtao kure pyra ynanase,

popyrahme sã osenuhmãko ynanase yna xity ke,

18Ypy Xião turumekase exiryke, raposa tõ ytoytõko mã toto typahsã poro.

19Omoro, Ritonõpo, tuisame oehtoh jũme exikehpyra mana, ahno poenõ pona te, ipakomotyã ponãmero roropa.

20Oty katoh yna murumekase okynahxo?

Otarahtao yna poko tuarõtãko ropa mah mya roropa?

21Yna iramapoko ropa oya, Ritonõpo.

Ajohpame sã yna iramapoko ropa!

Yna tyriko osemazuhme yna ehtopõpyry sã yna ehtohme ropa.

22Otarame jũme turumekase yna oya?

Ajohpe pyra yna zehno exikehpyra exĩko mah jũme?