1Morarame tuisa Ezekia takuruhtase yronymyryme. Orikyĩse nexiase. Mame urutõ Izaja, Amoxi mũkuru toytose oturuse eya. Ynara tykase ynororo eya:

— Ynara ãko Ritonõpo oya: “Okyryry tõ ikurãkako emero, ekurãkara ropa oexiryke, orihnõko mase,” tykase.

2Naeroro tõmyty tyramase Ezekia a tapyi apuru pona. Tõturuse ynororo Ritonõpo a, ynara tykase:

3— Ritonõpo, yna Esemy, wenikehpyra exiko opoetoryme jehtoh poko. Õmihpyry omipona ase yronymyryme. Onyripohpyry ya tymoise ya ipunaka kokoro rokene.

Mame tyxitase tãtasamaryke yronymyryme.

4Moromeĩpo tutũtase Izaja tuisa nyhtoh tae, yrome zara mõpozakoxi ytopyra ro ahtao tuisa tapyĩ konõto rãnao, turuse ynororo Ritonõpo a.

5— Ytoko ropa Ezekia zuruse, ypoetory tõ tuisary. Ynara kaxiko eya: “Ywy, Ritonõpo, atamuru Tawi Esemy, õmiry etano, oenuru xity eneno. Okurãkãko ropa ase. Mame taroino oseruao tynyhse ahtao ymaro Oturutoh taka ytõko mase. 615me jeimamyry ekarõko ropa ase oya isene ro oehtohme. Opynanohtorỹko ase sero apatary Jerusarẽ maro Axiria tuisary winoino. Sero pata ewomãko ase imehxo jehtoh waro imehnõ ehtohme te, jomihpyry etapotopõpyryke roropa ypoetory Tawi a.”

7Mame ynara tykase Izaja tuisa akorehmananomo a:

— Peteme exikety opime tyriko, fiku tõ epery risemy, jetũ exikety esary pona, tuisa erukoimory pona, aekurãkatohme ropa.

8Mame tõturupose Ezekia eya:

— Oty rĩko Ritonõpo nae, jukurãkary ropa waro jehtohme? Oseruao tynyhse jahtao jytotohme Ritonõpo Tapyĩ taka?

9Ynara tykase Izaja eya:

— Zae toehtoh enetupuhtoh ekarõko Ritonõpo oya mana. Naeroro imenekako, oty se hma? Jerutumã opyi pona oytory se hma ikurenaka 10me onuhtoh pona? Jerutumã opyi pona onukuru se hma kakoxi ropa 10me onuhtoh opyi pona? tykase Izaja.

10Mame ynara tykase Ezekia eya:

— Jerutumã aropory myaro 10me onuhtoh pona kakoxi tupime hkopyra mana ya. Naeroro opyi pona jerutumã enehpoko ropa 10me onuhtoh zopikoxi ropa, tykase ynororo eya.

11Mame tõturuse Izaja Ritonõpo a. Mame jerutumã tonehpose ropa Ritonõpo a 10me onuhtoh pona tuisa Akaze nyrihpyry pona opyime.

12Mame morara ahtao Papironia tuisary, Merotake-Paratã, Paratã mũkuru tuaro toehse Ezekia kure pyra ehtopõpyry poko. Naeroro tynymerohpyry tonehpose eya Ezekia neneryme, tynekarory maro. 13Enehnanõ toahmase Ezekia a tytapyĩ konõto taka toto omõtohme. Mame tymõkomory kurã tonepose eya: parata, uuru maro, otytyko tonahsã emeporyme, ixtaratu te, typyre tõkehko, emero tonepose eya xine. 14Morarame urutõ, Izaja toytose tuisa Ezekia a ekaropose:

— Otokoino toehse mokaro nae? Otara tykase toto oya? tykase ynororo.

— Moino nono imepỹ poe toehse mã toto, Papironia poe, tykase Ezekia eya.

15— Oty tonese eya xine atapyĩ tao? tykase, tõturupose Izaja.

— Tonese eya xine emero porehme, tykase Ezekia. — Emero enepoase eya xine.

16Mame ynara tykase Izaja tuisa a:

— Ynara ãko Ritonõpo oya mana: 17“Imeĩpo ynara exĩko mana. Omõkomory emero atapyĩ tao exiketõ, atamuru tõ nukurãkahpyry, emero tarosẽme exĩko mana Papironia pona. Arypyra exĩko mana. 18Toitoine opoenõkõ, apakõ roropa tarosẽme exĩko mã toto. Mame tomukase toto ahtao, erohnõko mã toto Papironia tuisary tapyĩ konõto tao,” tykase.

19Morara kary etaryke tyya, ynara tõsenetupuhse tuisa Ezekia; etonara exĩko sytatose isene ro jahtao, joorikyry ponãmero. Naeroro ynara tykase ynororo:

— Ritonõpo nekarohpyry oya jurutohme kure mana, tykase ynororo.

20Imehnõ tuisa Ezekia nyrityã emero, orẽpyra aehtopõpyry poko te, nono ahkatopõpyry eya tuna kurãkatohme, tuna enehtopõpyry eya eutary ae, nono zopino pata pona, emero tymerose pape pokona esety Juta tõ Tuisary tõ Ehtopõpyry. 21Mame Ezekia toorihse, imũkuru Manase tuisame toehse tumy myakãme.