1Morarame Izyraeu tõ erekohmary se joroko tamuru toehse. Naeroro osenetupuhtoh tokarose eya, Tawi a Izyraeu tõ kuhpotohme Juta tõ maro tuhke toto ehtoh waro ehtohme. 2Morara exiryke Joape a, imehnõ soutatu tõ tuisary tomo a roropa ynara tykase Tawi:

— Ytoko Izyraeu tõ patary tõ poro, inikahpoe ikurenaka, Izyraeu tõ kuhtohme, tuhke toto ehtoh waro se ase.

3Yrome ynara tykase Joape tuisa a:

— Tuhkehxo Izyraeu tõ tyripory se ase Ritonõpo a, toiro ahtao 100me tyripory se ase eya. Tuisa Tawi, opoetoryme mã toto, emero. Oty katohme Izyraeu tõ kuhnõko mah, iirypyryme kyritohkõme Ritonõpo neneryme? tykase.

4Yrome tõmipona Joape tyripose Tawi a. Naeroro toytose Joape, Tawi omi poe, Izyraeu tõ kuhse, Izyraeu tõ patary tõ poro porehme, imeĩpo tooehse ropa Jerusarẽ pona. 5Tuisa Tawi turuse eya: atapona Izyraeu tõ orutua kõ soutatume exiketõ 1.100.000me te, Juta tõ orutua kõ 470.000me, enara. 6Yrome tukurohtao ỹme nymyry pyra Joape exiryke tuisa nyripohpyry poko, Rewi tõ, Pẽjamĩ tõ roropa onukuhpyra kynexine.

7Mame Tawi tõ nyrihpyry Ritonõpo zamaro pyra kynexine. Naeroro Izyraeu tõ tuãnohse eya.

8Ynara tykase Tawi Ritonõpo a:

— Iirypyryme toehse ywy Izyraeu tõ kuhporyke ya. Ajohpãme sã yyrypyry ikorokako. Ajoajohpe exikety sã yriase, tykase.

9Naeroro Kate tonyohse Ritonõpo a Tawi zuruse. Urutõme Kate kynexine. Ynara tykase Ritonõpo eya:

10— Ytoko Tawi a, ynara kaxiko eya: “Ynara ãko Ritonõpo oya: ‘Oseruao imenekatoh nae mase. Toiro imenekako tyripotohme ya. Mame onymenekahpyry rĩko ase,’ ãko Ritonõpo,” tykase.

11Morara exiryke urutõ Kate toytose Tawi a, Ritonõpo omihpyry ekarose eya. Ynara tykase ynororo eya:

— Oty menekãko mah tyripotohme Ritonõpo a? 12Oseruao jeimamyry ae Izyraeu tõ emitapãkapõko konopo oehpyra ehtoh ke te, moro pyra ahtao oseruao nuno ae oporemãkapõko oepetõkara mana te, moro pyra ahtao oseruao ẽmepyry ae oporemãkapõko Ritonõpo mana typyre ke, tyrohsẽ konõto enehpõko mana Izyraeu tõ nonory pona, tynenyokyhpyry a oorihmanohpõko mana Izyraeu patary tõ poro? Otara ãko ywy Kuesẽkõ ezuhnõko? tykase Kate.

13Ynara tykase Tawi urutono a:

— Emynyhmãko ase yronymyryme; yrome juãnohpory se pyra ase ahno a. Ritonõpo a josekarory se ase juãnohtohme kypyno xine aexiryke, tykase.

14Naeroro tyrohsẽ tonehpose Ritonõpo a Izyraeu tõ pona. Mame 70 miumãkõ toorihse. 15Mame tynenyokyhpyry tonyohse eya Jerusarẽ enahkase repe. Yrome typenekehse ynororo Izyraeu tõ wãnopyry poko. Ynara tykase ynororo eya:

— Epo hnae! tykase.

Moroto nexiase Ritonõpo nenyokyhpyry Arauna esary po, tiriiku apotoh pũto, jepuseume exikety kynexine Arauna.

16Mame Ritonõpo nenyokyhpyry tonese Tawi a xikihme, nono epoehme, emahpo tapema nexiase Jerusarẽ põkõ etapatohme. Mame Tawi, ipoetory tõ tamuximãkõ maro, upo, kamisa topuxiximã risẽ ke tamuruse toto a, tupueh toehse toto. Tosekumurukõ po typorohse toto tõmytykõ po nono pokoxi. 17Mame Ritonõpo a Tawi tõturuse, ynara tykase:

— Ritonõpo Imehxo, ywy ro rokẽ tyyrypyhpyke toehse, azahkuru ehtoh tyrise ya exiryke. Yrome mokaro kaneru tõ samo. Oty tyrise eya xine popyra? tykase. Zae mase juãnopyryhtao, wekyry tõ maro, yrome mokaro, opoetory tõ pyno exiko, tykase.

18Morarame Ritonõpo nenyokyhpyry omi poe Kate toytose Tawi zuruse:

— Oeky zahkatoh tyriko, onekarory zahkatohme, onekaroryme Ritonõpo a Arauna nonory po, tiriiku apotoh po, tykase. 19Mame Ritonõpo omihpyry omipona toehse Tawi, Kate nekarohpyry ae. 20Moroto toerohtoh po Arauna nexiase erohnõko tiriiku poko tumũkuru tõ asakoropane maro. Ritonõpo nenyokyhpyry eneryke tyya xine imũkuru tõ toepase otonẽtohme. 21Tuisa Tawi oepyry eneryke tyya toerohtoh poe toytose Arauna, tosekumuru po typorohse ynororo, tõmyty po nono pokoxi.

22— Oesary, tiriiku apotoh esary epekatyry se ase apoto apõ ritohme, okyno zahkatohme ynekaroryme Ritonõpo a, tyrohsẽ enahkapotohme, Izyraeu tõ kurãkatohme ropa. Zae oepehmãko ase tineru ke, tykase Tawi eya.

23Ynara tykase Arauna:

— Morohne apoiko, jahkatohme onekaroryme Ritonõpo a. Eneko moxiamo pui tõ zahkatohme, senohne wewe risẽ apoiko roropa apotopokõme, tiriiku roropa ekarotohme onekaroryme. Morohne emero ekarõko ase oya.

24Yrome ynara tykase tuisa Tawi Arauna a:

— Arypyra! Zae tineru ke oepehmãko ase, okyno onyahkara ase ynekaroryme Ritonõpo a onepekahpyra ya ahtao, onepehmara jahtao.

25Naeroro tiriiku apotoh esary topekahse eya. 600me uuru ke topehmase eya. 26Morarame tynekarory zahkatoh apõ tyrise moroto Tawi a. Pui tõ tyahkase eya tynekaroryme Ritonõpo a, osepeme ehtoh roropa. Tõturuse ynororo Ritonõpo a, mame tozuhse Ritonõpo a apoto enehporyke kapu poe inekarory zahkatohme okyno zahkatoh po.

27Mame tynenyokyhpyry a ipyre tukurãkapose ropa ẽ aka. Aomipona toehse ynororo. 28Moro eneryke tyya, aomiry totase Ritonõpo a tonetupuhse Tawi a. Naeroro tynekarory tyahkase eya, okyno zahkatoh po, Arauna erohtopõpyry po. 29Morara ahtao, Moeze nyrihpyry tapyime, Ritonõpo maro oturutohme ona poro toto ahtao, okyno zahkatoh apõ roropa, Kipeão poro nexiase Ritonõpo eahmatoh po. 30Yrome morotona Tawi ytosaromepyra kynexine Ritonõpo eahmase, inenyokyhpyry pyre zuno toexiryke.