1Tuke Pujuuwah, ame minak shiig dekagme.

2Ame wi dutikamu aina duka ashí dekame,

amek atushat pujusmesh,

wi wajuk anentaimja dushakam dekame.

3Wi wajuk wekaeja duka amek ashí dekame,

¡wi wajina takaja dushakam ashí dekame!

4Wika eke chichatsaig,

wi wajina titag taja duka amek

emtikam dekame.

5Ame minak ashí tententuam,

amina uwegmin achigsam pujame.

6Wika amina yachajum imana nunak

kakajus dekamainchau dekapeajai.

Mina dekatjuk nuwig makichkish jegatsui.

7Amina Wakanmin ukuknush ¿tuki wetaja?

Ame ashí nugkanum dekam nuniaish,

¿wisha itug tupikaknuk uumjuktagme?

8Wi nayaimpinum wakamtaish,

amek nuwi pujuttame,

tuja wi nugka initken akaikimtaish,

amek nuwishkam pujuttame.

9-10Wi nanaakan etsa minitaiya nuni wemataish,

ame minak achigkau atatme,

tuja etsa akaetaiya nuni nayantsa amain wenu

pujusmataishkam, ame minak yainkattame.

11Wi suwenum uumkatjai tumainaitjai,

tuja nuniachkush tsawaiya nunú suwe wajasmataish,

12suwea duka minak aminig ugmaitsui;

ame diismak kashia duka tsaaptinai.

¡Ame diismak suwea duka tsaaptinjai betekai!

13Ame mina iyashjuk najatjuawaitme,

ame minak, mina dukuju wakeen najatuawaitme.

14Wika ame imatiksa najanamu asan see tajame,

ame najanamu aina duka ashí pegkejai.

¡Wika nunak shiig dekajai!

15-16Wi initak wainkachbau

mina dukuju wakeen najaneauwaitag duka ame waitmayume,

eke najaneaig wajupa tsawan pujustinaitja duka

ame umigtukuitme.

¡Nunú amina papiigmin agagbauwai!

17Chah Apajuíjuh,

amina anentaimtagmia nunak

shiig anentaimja ejeyin

dekamainchau dekapeajai.

¡Untsu nuna pachisan augmattsatag takun

ima utugchat dekapmainaitjai!

18Nuna dekapagtajai takunush,

kamatak kuashta iman asamtai,

kakajus dekapamaitsujai.

¡Tuja kanaja shintaish amek wijaig pujame!

19Apajuíyah, aents pegkegchau aina duka ijinata,

dutikakum magkagtin aidaushkam datupatjukta.

20Nunú aents aidauk amina daagmin pachisag

pegkegchaun chichainawai.

Nuninak amijai wainak shiwagmagainawai.

21Tuke Pujuuwah,

amina kajegtamaidaunak wishakam kajejajai,

tuja amina dakitjamaidaunashkam

dutiksanuk dakitajai.

22¡Nunú aents aidaunak shiig senchi kajejajai!

Amina shiwaajum aina duka

mina shiwag ainawai.

23Chah Apajuíyah,

mina anentaijush shiig diigtusta,

dutikam mina anentaimtajush shiig dekapjuttsata.

24Tudau jintan aintsujash nunú diigtusta,

nuniakum jinta pujut nagkankashtinnum

ekagtina nuni etita.