44
Yusuf pung mok perak ilang
1 Dong makan abis, ju Yusuf bakusu-kusu deng dia pung kapala urusan, bilang, “We! Lu pi isi ini orang dong pung karong satu-satu deng padi sampe ponu. Ais, lu taro ulang dong pung doi pi dalam dong satu-satu pung karong.
2 Ais, lu ame beta pung mok perak, ko taro pi di itu ana bungsu pung karong.” Ju dia pi bekin iko Yusuf pung parenta tu.
3 Dia pung beso papagi, ju Yusuf lapás sang dong ko pulang bawa makanan deng dong pung keledai.
4 Dong balóm jalan talalu jao dari kota, ju Yusuf kasi tau dia pung kapala urusan, bilang, “Lu pi buru iko itu orang dong capát-capát. Kalo su katumu sang dong, lu bilang bagini: ‘Akurang ko bosong pung hati culas deng bapatua? Ko bosong balas dia pung bae deng jahat bagini!
5 Karmana ko bosong sampe hati mancuri bawa bos pung mok perak? Bosong sonde tau, ko? Itu bukan bos pung mok minum sa! Dia ju pake itu mok ko cari tau orang pung nasib. Itu mok ilmu na! Bosong pung bekin ni, memang su talalu jahat!’ ”
6 Ais ju, itu kapala urusan pi buru sang dong sampe dapa. Ju dia kasi tau sang dong, iko Yusuf pung omong tadi tu.
7 Ais dong protes bilang, “Pak pung maksud karmana ini? Botong sumpa. Botong sonde mungkin bekin jahat bagitu!
8 Pak sandiri su tau, to? Itu doi-doi dalam botong pung karong tempo hari tu, botong su kasi kambali sang Pak, to? Jadi, karmana ko botong bisa mancuri bos pung mas ko perak dari dia pung ruma! Sonde mungkin!
9 Pak pareksa sa! Dapa itu barang di sapa pung karong, hukum mati sang dia suda! Deng biar botong yang laen ni, jadi lu pung budak sa.”
10 Ais, itu kapala urusan bilang, “Sonde! Bagini sa. Kalo dapa itu mok di sapa, na dia jadi beta pung kuli. Yang laen bole pulang.”
11 Ju dong kasi turun capát-capát itu karong dong. Tarús dong buka memang.
12 Ais, itu kapala urusan pareksa alus-alus itu karong dong satu-satu, mulai dari yang paling kaka pung karong, sampe yang paling kici. Ju dia katumu itu mok perak di Benyamin pung karong.
13 Lia bagitu, ju Benyamin pung kaka dong pung hati ancor-ancor. Ais dong kasi nae kambali itu karong dong di atas keledai, ju dong bale pi kota.
14 Waktu dong sampe di Yusuf pung ruma, te dia masi ada di situ. Ju dong tikam lutut di dia pung muka.
15 Ju Yusuf masparak sang dong, bilang, “Hee! Akurang ko bosong bekin bagini sang beta! Bosong sonde tau, bilang, orang bésar ke beta ni, bisa pake ilmu ko cari tau orang pung rahasia?”
16 Ais Yahuda manyao, bilang, “Awii! Tuhan Allah su kasi talanjang botong pung sala dong. Ais botong mau bilang apa lai, Pak? Botong mau bela diri karmana lai. Kalo Pak mau tahan sang botong pung adi bungsu ini na, lebe bae Pak tahan botong samua. Ame botong samua jadi Pak pung budak sa.”
17 Ma Yusuf manyao, bilang, “Sonde! Dapa itu mok di sapa na, dia itu yang jadi beta pung kuli! Bosong yang laen dong, bebas. Pulang pi bosong pung papa suda!”
Yahuda minta ko dia ganti sang Benyamin
18 Ais itu, Yahuda pi deka-deka sang Yusuf, ju omong, bilang, “Pak wakil! Beta tau Pak pung kuasa sama ke raja sandiri. Tagal itu, jang mara sang beta dolo. Te beta parmisi minta ba'omong sadiki deng Pak.
19 Kamaren Pak su tanya sang botong, bilang, ‘Bosong pung papa deng adi yang satu, masi ada, ko?’
20 Ais botong manyao, bilang, ‘Botong pung papa su tua. Deng ju ada botong pung adi bungsu satu. Waktu barana sang dia, papa su tua. Itu adi bungsu pung kaka barana ada satu, ma dia su mati. Dong dua pung mama su mati. Jadi sakarang, tenga adi bungsu sandiri sa. Andia ko, botong pung papa sayang mo mati sang dia.’
21 Ais Pak suru botong bawa datang botong pung adi tu, ko Pak bisa lia sang dia.
22 Ju botong manyao, bilang, itu ana sonde bisa kasi tenga dia pung papa. Kalo dia kasi tenga na, botong pung papa su mati, andia tu.
23 Tarús Pak manyao, bilang, ‘Kalo bosong sonde bawa sang bosong pung adi tu, na, bosong sonde bisa lia beta pung muka lai.’
24 Abis ju botong pulang. Sampe di Papa, ju botong kasi tau Pak pung omong samua tu.
25 Lama-lama, ju botong pung makanan su abis. Ais papa suru botong datang ulang di Masir ko béli makanan lai.
26 Ma botong balas, bilang, ‘Papa é! Botong sonde bisa pi sana lai. Te raja pung tangan kanan tu, su bilang, kalo botong sonde bawa botong pung adi bungsu na, botong sonde bisa lia dia pung muka. Jadi botong pung adi bungsu musti iko dolo, baru botong jalan.’
27 Ais itu, botong pung papa omong lai, bilang, ‘Bosong su tau, to? Beta pung bini Rahel tu, pung ana cuma dua sa.
28 Ana yang partama su sonde ada lai. Pasti binatang utan su kodo ame sang dia. Andia ko sampe sakarang, beta sonde dapa lia sang dia lai.
29 Kalo bosong ame ini ana bungsu dari beta lai, tarús dia kaná calaka na, bosong bekin tamba susa beta yang su tua ni, ko beta mati memang.’
30-31 Andia, Pak wakil. Kalo beta kambali pi papa, deng sonde bawa ini adi bungsu, pasti botong pung papa su mati, andia tu. Ko dia pung jiwa ta'ika deng itu ana na. Deng dia su talalu tua, sampe kalo botong bekin tamba susa sang dia, pasti dia mati.
32 Tamba lai, beta su bajanji deng papa bilang, beta yang jamin itu ana. Beta bajanji sang papa, kalo beta sonde bawa bale itu ana pi dia, na biar beta tanggong itu sala sampe mati.
33 Jadi beta minta bagini, Pak: Biar beta tenga di sini ganti dia, ko beta sa yang jadi Pak pung budak. Biar dia pulang deng dia pung kaka-kaka dong.
34 Kalo itu ana sonde iko na, beta ju sonde bisa pulang. Beta sonde bisa tahan lia papa pung sangsara sampe mati.”