1 യഹോവയ്ക്ക് ഒരു പുതിയ പാട്ടു പാടുവിൻ;

അവൻ അത്ഭുതകാര്യങ്ങൾ പ്രവർത്തിച്ചിരിക്കുന്നു;

അവന്റെ വലങ്കയ്യും അവന്റെ വിശുദ്ധഭുജവും

അവന് ജയം നേടിയിരിക്കുന്നു.

2 യഹോവ തന്റെ രക്ഷ അറിയിച്ചും ജനതകളുടെ കാഴ്ചയിൽ തന്റെ നീതി വെളിപ്പെടുത്തിയുമിരിക്കുന്നു.

3 അവൻ യിസ്രായേൽഗൃഹത്തോടുള്ള തന്റെ ദയയും വിശ്വസ്തതയും ഓർമ്മിച്ചിരിക്കുന്നു;

ഭൂമിയുടെ അറുതികളിലുള്ളവരും നമ്മുടെ ദൈവത്തിന്റെ രക്ഷ കണ്ടിരിക്കുന്നു.

4 സകല ഭൂവാസികളുമേ, യഹോവയ്ക്ക് ആർപ്പിടുവിൻ;

ആനന്ദഘോഷത്തോടെ കീർത്തനം ചെയ്യുവിൻ.

5 കിന്നരത്തോടെ യഹോവയ്ക്കു കീർത്തനം ചെയ്യുവിൻ;

കിന്നരത്തോടും സംഗീതസ്വരത്തോടും കൂടി തന്നെ.

6 കൊമ്പും കാഹളവും ഊതി രാജാവായ യഹോവയുടെ സന്നിധിയിൽ ഘോഷിക്കുവിൻ!

7 സമുദ്രവും അതിലുള്ളതും

ഭൂതലവും അതിൽ വസിക്കുന്നവരും ആരവം മുഴക്കട്ടെ.

8 നദികൾ കൈ കൊട്ടട്ടെ;

പർവ്വതങ്ങൾ ഒരുപോലെ യഹോവയുടെ മുമ്പാകെ ഉല്ലസിച്ചുഘോഷിക്കട്ടെ.

9 അവൻ ഭൂമിയെ ന്യായം വിധിക്കുവാൻ വരുന്നു;

ഭൂലോകത്തെ നീതിയോടും ജനതകളെ നേരോടുംകൂടി വിധിക്കും.