1 യഹോവേ, ദുഷ്ടമനുഷ്യരുടെ കൈയിൽ നിന്ന് എന്നെ വിടുവിച്ച്

സാഹസക്കാരുടെ പക്കൽനിന്ന് എന്നെ പരിപാലിക്കണമേ.

2 അവർ ഹൃദയത്തിൽ തിന്മ നിരൂപിക്കുന്നു;

അവർ ഇടവിടാതെ പോരാട്ടത്തിനായി കൂട്ടം കൂടുന്നു;

3 അവർ സർപ്പംപോലെ അവരുടെ നാവുകൾക്ക് മൂർച്ചകൂട്ടുന്നു;

അവരുടെ അധരങ്ങൾക്കു കീഴിൽ അണലിവിഷം ഉണ്ട്.

4 യഹോവേ, ദുഷ്ടന്റെ കൈയിൽനിന്ന് എന്നെ കാക്കണമേ;

സാഹസക്കാരനിൽനിന്ന് എന്നെ പരിപാലിക്കണമേ;

അവർ എന്റെ കാലടികൾ മറിച്ചുകളയുവാൻ ഭാവിക്കുന്നു.

5 ഗർവ്വിഷ്ഠന്മാർ എനിക്കായി കെണിയും കയറും മറച്ചുവച്ചിരിക്കുന്നു;

വഴിയരികിൽ അവർ വല വിരിച്ചിരിക്കുന്നു;

അവർ എനിക്കായി കുടുക്കുകൾ വച്ചിരിക്കുന്നു.

6 “നീ എന്റെ ദൈവം” എന്ന് ഞാൻ യഹോവയോടു പറഞ്ഞു;

യഹോവേ, എന്റെ യാചനകൾ കേൾക്കണമേ.

7 എന്റെ രക്ഷയുടെ ബലമായ കർത്താവായ യഹോവേ,

യുദ്ധദിവസത്തിൽ നീ എന്റെ തലയിൽ ശിരസ്ത്രം വയ്ക്കുന്നു.

8 യഹോവേ, ദുഷ്ടന്റെ ആഗ്രഹങ്ങൾ നടത്തരുതേ;

നിഗളിച്ചുപോകാതിരിക്കേണ്ടതിന്

അവന്റെ ദുരുപായം സാധിപ്പിക്കുകയും അരുതേ.

9 എന്നെ വളഞ്ഞിരിക്കുന്നവരുടെ തലയോ, -

അവരുടെ അധരങ്ങളുടെ തിന്മ അവരെ മൂടിക്കളയട്ടെ.

10 തീക്കനൽ അവരുടെ മേൽ വീഴട്ടെ;

അവൻ അവരെ തീയിലും

എഴുന്നേല്ക്കാത്തവിധം കുഴിയിലും ഇട്ടുകളയട്ടെ.

11 വാവിഷ്ഠാണക്കാരൻ ഭൂമിയിൽ നിലനില്ക്കുകയില്ല;

സാഹസക്കാരനെ അനർത്ഥം നായാടി ഉന്മൂലനാശം വരുത്തും.

12 യഹോവ പീഡിതന്റെ വ്യവഹാരവും

ദരിദ്രന്മാരുടെ ന്യായവും നടത്തും എന്ന് ഞാൻ അറിയുന്നു.

13 അതേ, നീതിമാന്മാർ നിന്റെ നാമത്തിനു സ്തോത്രം ചെയ്യും;

നേരുള്ളവർ നിന്റെ സന്നിധിയിൽ വസിക്കും.