1 യഹോവേ, രാജാവ് നിന്റെ ബലത്തിൽ സന്തോഷിക്കുന്നു;

നിന്റെ രക്ഷയിൽ അവൻ ഏറ്റവും ഉല്ലസിക്കുന്നു.

2 അവന്റെ ഹൃദയത്തിലെ ആഗ്രഹം നീ അവന് നല്കി;

അവന്റെ അധരങ്ങളുടെ യാചന നിഷേധിച്ചതുമില്ല.

3 സമൃദ്ധമായ അനുഗ്രഹങ്ങളാൽ നീ അവനെ എതിരേറ്റ്,

തങ്കക്കിരീടം അവന്റെ തലയിൽ വയ്ക്കുന്നു.

4 അവൻ നിന്നോട് ജീവൻ ചോദിച്ചു; നീ അവനു കൊടുത്തു; എന്നെന്നേക്കുമുള്ള ദീർഘായുസ്സ് തന്നെ.

5 നിന്റെ രക്ഷയാൽ അവന്റെ മഹത്വം വലിയത്;

ബഹുമാനവും തേജസ്സും നീ അവനെ അണിയിച്ചു.

6 നീ അവനെ എന്നേക്കും അനുഗ്രഹസമൃദ്ധിയുള്ളവനാക്കുന്നു;

നിന്റെ സന്നിധിയിലെ സന്തോഷംകൊണ്ട് അവനെ ആനന്ദിപ്പിക്കുന്നു.

7 രാജാവ് യഹോവയിൽ ആശ്രയിക്കുന്നു;

അത്യുന്നതന്റെ കാരുണ്യംകൊണ്ട് അവൻ കുലുങ്ങാതെയിരിക്കും.

8 നിന്റെ കൈ നിന്റെ സകലശത്രുക്കളെയും കണ്ടുപിടിക്കും;

നിന്റെ വലങ്കൈ നിന്നെ വെറുക്കുന്നവരെ പിടികൂടും.

9 നീ പ്രത്യക്ഷപ്പെടുമ്പോൾ നീ അവരെ തീച്ചൂളപോലെയാക്കും;

യഹോവ തന്റെ ക്രോധത്തിൽ അവരെ വിഴുങ്ങിക്കളയും;

തീ അവരെ ദഹിപ്പിക്കും.

10 നീ അവരുടെ ഉദരഫലത്തെ ഭൂമിയിൽനിന്നും

അവരുടെ സന്തതിയെ മനുഷ്യപുത്രന്മാരുടെ ഇടയിൽനിന്നും നശിപ്പിക്കും.

11 അവർ നിനക്കു വിരോധമായി ദോഷം വിചാരിച്ചു;

അവരാൽ കഴിയാത്ത ഒരു ഉപായം നിരൂപിച്ചു.

12 നീ അവരെ പുറംതിരിഞ്ഞ് ഓടുമാറാക്കും;

അവരുടെ മുഖത്തിനുനേരെ അസ്ത്രം ഞാണിന്മേൽ തൊടുക്കും.

13 യഹോവേ, നിന്റെ ശക്തിയിൽ ഉയർന്നിരിക്കണമേ;

ഞങ്ങൾ പാടി നിന്റെ ബലത്തെ സ്തുതിക്കും.