5 अय्‌जूगुलिं संसारयागु ज्‍याखं छिमिसं थःत कःघाना च्‍वँ। व्‍यभिचार याये मते, मभिंगु ज्‍याखँ याये मते, लाः लाःथें सना जुइ मते, मभिंगु मतिइ तयाजुइ मते, कर्पिनिगुली मिखा वंके मते, गुगु मूर्ति पुजा यायेगु ति हे ग्‍यं। 6 थज्‍याःगु खं यानाः हे परमेश्वरं धाःथें मयाइपिन्‍सं वय्‌कःयागु तं फये माली। 7 छिपिं नं न्‍हापा थथे हे यानाजुइपिं खः। 8 आवंनिसें छिमिसं तं व ल्‍वापुख्‍यापु त्‍वःता छ्व -- कर्पिन्‍त स्‍यंका जुइगु, कर्पिन्‍त मभिंकाः खँ ल्‍हायेगु, अस्‍यः खँ ल्‍हायेगु -- थज्‍याःगु ज्‍याखँ नं त्‍वःता छ्‍व। 9 छिमिसं आः पुलांगु चालचलन त्‍वःते धुंकूगुलिं थःथवय्‌ मखुगु खँ ल्‍हायेगु याये मते।* ३:९ एफि ४:२२ 10 छिपिं आः न्‍हूपिं जुइ धुंकल। आवंलि वय्‌कःयात बांलाक म्‍हसीके फये मा धकाः परमेश्वरं छिमित थःथें हे यानाः न्‍ह्याबलें न्‍हूकथं हिलादी।* ३:१० उत १:२६; एफि ४:२४ 11 यहूदीमखुपिं जुइ मा, यहूदी जुइ मा, म्‍हय्‌ चिं तःपिं जुइ मा, मतःपिं जुइ मा, सःस्‍यूपिं जुइ मा, छुं मस्‍यूपिं जुइ मा, अले दास जुइ मा, दास मखुपिं जुइ मा, फुक्‍कं उथें खः। सकसिकें ख्रीष्‍ट दी। ख्रीष्‍ट हे फुक्‍कं खः।

12 छिपिं परमेश्वरं ल्‍यया तःपिं पवित्रपिं व वय्‌कःया यःपिं मनूत खः। उकिं छिमिसं दया माया यायेगु, क्‍वमिलु जुइगु, स्‍वजा जुइगु, सह यानाच्‍वनेगु याये माः। 13 थःथवय्‌ सह यानाः दया माया या। थःत सुनानं मभिंकूसां वयात क्षमा बीगु या। गथे प्रभुं छिमित क्षमा यानादिल, अथे हे छिमिसं नं क्षमा बी माः।* ३:१२-१३ एफि ४:२* ३:१३ एफि ४:३२ 14 थ्‍व स्‍वयाः तःधंगु ला थःथवय्‌ माया यानाच्‍वनेगु हे खः। थ्‍व हे मायां छिपिं फुक्‍कसित छप्‍पँ व छधी याना तइ। 15 ख्रीष्‍टयागु शान्‍तिं छिमिगु नुगः जाया च्‍वने मा। थ्‍व हे शान्‍तियागु लागि परमेश्वरं छिमित सःताः छम्‍ह हे यानादीगु खः। परमेश्वरयात सुभाय्‌ ब्‍यु।

16 ख्रीष्‍टयागु वचनं छिमिगु नुगः जाया च्‍वने मा। छिमिसं थःथवय्‌ स्‍यनेकने यानाः दुनुगलंनिसें भजन व म्‍ये हालाः परमेश्वरयात तःधंकि।* ३:१६ एफि ५:१९-२० 17 छिमिसं न्‍ह्यागु याःसां, न्‍ह्यागु धाःसां प्रभु येशूयागु नामं या, अले वय्‌कःया नामं परमेश्वर बाःयात सुभाय्‌ ब्‍यु।

18 मिसातय्‌सं थः भाःतं धाःथें याये माः। थथे याइगु प्रभुयात यः।* ३:१८ एफि ५:२२; १ पत्र ३:१

19 मिजंतय्‌सं नं थः कलाःयात माया याये माः। इमित दुःख बी मज्‍यू।* ३:१९ एफि ५:२५; १ पत्र ३:७

20 अथे हे काय्‌म्‍ह्याय्‌पिन्‍सं नं थः मांबौयागु खँ न्‍यने माः, अले हनाबना तये माः।* ३:२० एफि ६:१ 21 बौपिन्‍सं नं काय्‌म्‍ह्याय्‌पिन्‍त तं चाय्‌के मज्‍यू। मखुसा इमिगु साहस हे मदया वनी।* ३:२१ एफि ६:४

22 दासं थः मालिकं धाःगु खँ न्‍यने माः। मालिकयात लय्‌ताय्‌केत न्‍ह्यःने जक ज्‍या याना क्‍यनेगु मखु, बरु परमेश्वरयात लय्‌ताय्‌केत दुनुगलंनिसें ज्‍या याये माः। 23 न्‍ह्यागु याःसां मनूतय्‌गु निंतिं मखु, बरु प्रभुयागु निंतिं यानाच्‍वना धकाः मतिइ तयाः दुनुगलंनिसें याये माः। 24 छाय्‌धाःसा छिमिसं प्रभुं बी धयादीगु सिरपाः छिमित दइ धकाः सि हे स्‍यू। प्रभु येशू ख्रीष्‍ट हे छिमि मालिक खः। 25 मभिंगु बांमलाःगु ज्‍या यानाजूपिन्‍त सजाँय बी। प्रभुं ख्‍वाः स्‍वयाः न्‍याय यानादी मखु।* ३:२२-२५ एफि ६:५-८* ३:२५ व्‍य १०:१७; एफि ६:९