1 Ma Iob i ga tur pa mule kana varvai, ma i ga biti:

2 Da God, nina i ga tak vue ra varkurai takodo kan iau, i laun;

Ma ra Dekdek Muka, nina i ga vapurpuruan ra balagu, i laun;

3 Ba iau laun boko,

Ma ra Tulungea i God i ki boko tagu;

4 A ura bul na ngiegu pa dir a vaongo,

Ma ra karameagu pa na vartuam.

5 Pa iau mulaot ba kaum tinata i dovot;

Pa ina varpuai ure kaugu mangamangana takodo tuk ta ra bung ba ina mat i tana.

6 Iau vatur vake kaugu mangamangana takodo, ma pa ina nur vue;

A balagu pa na takun iau ba iau laun boko.

7 Boina ba kaugu ebar na da ra tena varpiam,

Ma nina i tut ure iau, boina ba na da ra bilak na tutana.

8 Tago na topa nina i piam vue God dave ba i kale ta ngala na tabarikik,

Ta ra pakana bung ba God na tak vue ra tulungeana?

9 Dave, God na valongore ra nilaina laka,

Ba ra varmonong i tadav ia?

10 Dave, na gugu muka laka ure ra Dekdek Muka,

Ma na vala kail tadav God?

11 Ina vateten u ure ra lima i God;

Ma pa ina ive nam i ki pire ra Dekdek Muka.

12 Ea, amutal tar kapa ure ra dari;

Ta ra ava bar amutal papait vakuku?

13 Go iat ra tiniba ba ra tena varpiam na vatur vake tai God,

Ma ra umana tena vakavakaina diat a kale pa ra dari tai ra Dekdek Muka.

14 Ona ra umana natuna diat a peal, diat ai ra pakat na vinarubu;

Ma ra umana bul mur tana diat a ki na mulmulum.

15 Diat dia ki valili, diat a mat ta ra kaina minait,

Ma kadia umana aua pa diat a tangie diat.

16 Ona i vung varurue ra silva pi na peal da ra tobon,

Ma ra umana mal upi diat a peal da ra pia petpetep;

17 A umana tena takodo diat a vung ra umana mal nina i ga vaninare,

Ma diat dia langalanga diat a tibe ra silva.

18 Ra pal nina i pait ia i da ka ra po na kabiloko,

Ma da ra pal na turturup nina ra tena minakila i pait ia.

19 Ba i va na pal i uviana boko, ma ia ra mutuaina tana;

Ba i tavangun, di tar kari vue.

20 A umana magit na bunurut dia tadav ia da ra lovon;

Ma ra dekdek na labur i kap vue ta ra marum.

21 A kalivuvur maro ra matana taur i puak vakakit vue;

Maia, i tak vue kan kana pakana.

22 God i tupatupar ia, ma pa i mari ia;

Ma i mama lop kan ra limana.

23 A tarai diat a pakate vue,

Ma diat a itinge vue kan kana gunan.