1Neti Pablo ankaa apóstol ge Jesucristuha. Tata Do Yebáha bedá lebie kini akaa apóstol kini kixxi'ania ka benne nu chi rabie unie, delába unie ki aka benri'i ttu dia lii de babari'i len Jesucristuha. 2Ridhelhaa yetsi‑ni gelu xa Timoteo, xi'ini to kia. Xxudi do yebaa geri'iha lhe Jesucristu benne anke Xxanari'iha edá leke aka lenke lu lhe satua leke lu lhe, anágaba uinke kini dholu xen su lasi lhe.

3Satíaba rugwea Tata Do Yebáha ixkixaru tti rexxa lasia lu. Rela lhe resá lhe rudettia lu tti rilhapia tisa lenie. Itú iki itú lasia runia sina gebie attiba ben ka benneola kiaha, kumu neti yu xeabaa labí runia ttu bixa nu udheana loa. 4Tti radú lasia gasina ribesiluha, la'ania nuha yalhá raka lasia iláti lu kini edú itta lasia. 5Lhe radúgaba lasia gasina ria lelu ge Cristuha itú iki itú lelu. Riaba lelu attiba ugía le nan xxen gelu Loida‑ni. Lade'a tte benneha ugía lebie, delola nna tti ugía le nan gelu Eunice‑ni. Neti yu xeabaa anágaba lu riagaba lelu. 6De nuha nna rodhua lelu, bedulo bodo lelu elha tse bete Tata Do Yebáha gelu, delába elha tse betebie gelu atti uxxua náya ikiluha. 7Kumu Tata Do Yebáha laa benge ri'i kini akari'i benne gasinri'i, sinuki benlee ri'i kini akari'i nu kweki tsitsi leni lhe akari'i benne si'i lasi, lhe anágaba akari'i benne innabiari'i elha ruin geri'i lhe.

8Laxkala abittu ettuinlu tti kixxi'alu ka tisa ge benne anke Xxanari'iha, nigaba ettuinlu kia de tea lisiyya de runia sina gebie. Nu uinlalu betto bechíala lo elha disa ratelu de rekilu ugixxi'a ka tisa ge Jesucristuha, ttiba neti gwa rutto ruchíabaa. Tata Do Yebaa benne ra tsitsi leeha, benneha unie ki dhaalu utto uchíalu lo nu ratelu‑na. 9Benneha bodilábie ri'i kini abittu tsia nnittiri'i lhe anágaba uxie ri'i kini akari'i gebie. Laa uxige ri'i de ruin tse xxattari'i. ¡Ko'o! Uxie ri'i kumu aníha‑ba chi ga'ananie unie lenri'i attili lani kwe yiesi lo yu‑ni. La'aniali chi bedá lebie uxie ri'i de chi babari'i len Jesucristuha. 10Ttaka nnanna chi rule'e Tata Do Yebáha nu tse redá lebie unie lenri'i de chi bita Jesucristuha yiesi lo yu‑ni, delába Jesucristu benne rodilábie ri'i. Benneha utuabie elhutti geri'i lhe anágaba bele'enie ri'i, ganna tsia leri'i ka tisa tse, delába ka tisa rigixxi'a geeha, la'ania nna gwaka benbari'i ttu dia lii, labí gattiri'i arloe.

11Tata Do Yebáha bedha'ane ka tisa‑ni len neti ki akaa benne ichea ke lhe kixxi'aya ke lhe ule'a ke lhe. 12De rigixxi'aya ka tisa‑ni nna ratea iyá nu ratea‑ni, ttaka labí rettuti, kumu gwa yubaa nú ge ria lasia lhe yu xeabaa deki benne ria lasiaha, tsitsi ra le benneha nna guyúbe iyá nu bodha'ane lasi náya axtaliba ganna chi bisia sá esia Jesucristuha.

13Beni nu ra ka tisa tse utixxi'ania luha. Bele'e deki gwa ria lelu Jesucristuha lhe bele'e deki gwa rakinlu ge ka benne de babalu len benneha. 14Espíritu ge Tata Do Yebaa benne doe lhe'e lastori'i, benneha unie kini kixxi'alu tti ttega ra ka tisa bodha'an Tata Do Yebáha lasi nálu.

15Lu chiba yulu, iyába ka nu ria lekani Cristuha ka nu se'e daka Asia‑na bedhába ikikani neti, lenkana Figelo‑ni lhe Hermógenes‑ni lhe. 16Ka benne se'e lisi Onesíforo‑ni nna satuachi le Tata Do Yebáha ke, kumu Onesíforo‑ni labí bettuinna kia de yayaa lisiyya. Ixe lidú bitana betedú ittana lasia. 17Tti bisiana Roma‑ni ugweki ttebana begilana neti nna betexxakalibana neti nna beyaka xen leni. 18Tata Xisiha satuachi lebie na ganna chi bisia sá eso duri'i arloe. Lu gwa yu xeabalu yalhá bixúna len neti tti udoa lhe'esi Éfeso‑na.