1ไมจ เปอะ ลืลาว พะจาว. กัน ทไว ปุย รซอม ลืลาว ละ พะจาว ยุฮ เอะ เซ, มัฮ เนอึม ป ปุก. กัน ลืลาว ปุย พะจาว มัฮ เนอึม ป โซมกวน. มัฮ โรฮ ป ตึก นึง มวน แตะ.

2เอีจ มัฮ พะจาว ป เฌาะ โก โคระ เวียง เยรูซาเลม เมอ, ไม่ ซาวป อื ซเพระ โม อิซราเอน ป อาวต เฮีย อาวต ไฮ เซ. 3พะจาว เยอ เกาะ โลม โรฮ โม ป ไลจ รพาวม, เยื่อ เอิน โรฮ รพาวม ไลจ อื เซ เกือฮ ไมจ มวน แม.

4มัฮ พะจาว ป ปุน เมีญ เมาะ ไก ซโมยญ เญอ, เอีจ ปุก เอิน โรฮ มอยฮ อื โครยญ โนง. 5พะจาว ยุฮ เอะ เอ มัฮ เนอึม ป ตึก นึง ระ นัน นึง ฮลาวง แตะ. อัมนัต อื ระ เนอึม, มัฮ เอิน ป ยุง โอเอีฮ โครยญ เจือ, โฮฮ เนอึม ฮา เกียฮ คาวไจ ปุย อื. 6โม ป อาวต ไม่ รพาวม ตุเตียม แตะ, พะจาว เอีจ ยวก อื เกือฮ โกฮ. โม ปุย ฆอก ปุย เบร เยอ, พะจาว ปังเมอ น่าึก เอิน อื ฮอยจ ลังเตะ ก เตียม อื.

7ไมจ เปอะ เชีย ละ พะจาว ไม่ รพาวม ญันดี่ แตะ นึง. ไมจ โรฮ เปอะ เตียต ไม่ พิน โด่วง กู ละ ทไว เปอะ ละ พะจาว ยุฮ เอะ. 8มัฮ พะจาว ป เกือฮ มะลอง นาวก นึง ชุต รวู เยอ. เอีจ มัฮ เพรียง อื อาึง รอาวม เฮละ ละ ปลัฮเตะ เฮี, ละ ซ เกือฮ โรฮ อื ไรป กวยฮ นึง บลาวง โครยญ โดฮ. 9ซัตซิง โครยญ เจือ เอีจ มัฮ พะจาว ป เลียง เงอ. กวน รงั่ก ป รัก นึง ฆวต โซม แตะ, พะจาว เอีจ ตาว โรฮ ป โซม อื ละ อื.

10ป ปุก รพาวม พะจาว เยอ, มัฮ โตว บรอง ป ระ เรียง ระ แด่น. มัฮ โตว โรฮ โม ตฮัน ระ เรียง ไม่ เกง เลือ แตะ. 11ป ปุก เนอึม รพาวม พะจาว เยอ มัฮ โม ป นัปทื เนอึม พะจาว ไม่ ไก รพาวม ฮลัต อื นึง. มัฮ โรฮ โม ป ซโอว รพาวม ไม่ รพาวม ฮรัก ตอน ฮมัน ยุฮ อื, ป ปุก เนอึม รพาวม อื.

12โอ เยรูซาเลม, ลืลาว พะจาว เยอ เออ. โอ เมือง ซีโยน, ไมจ เนอึม เปอะ ทไว รซอม ลืลาว ละ พะจาว ยุฮ แตะ. 13มัฮ พะจาว ป เกือฮ รเวือะ เมือง เปอะ เซ ตอน ฮมัน เนอ. พะจาว ปิฮ โรฮ กุนมุ่น ละ โม ลัปซด่อน ยุฮ เปอะ ป อาวต กไน เปอะ เซ. 14มัฮ พะจาว ป เกือฮ ปุย กไน เคต บั่นเมือง ยุฮ เปอะ โฮลฮ อาวต เฮน อาวต ฮลอง, ไม่ เกือฮ อื เฮงาะ ซาลี ตึก นึง ไมจ แตะ ละ เปอะ กุม ปอ.

15พะจาว เอีจ เกือฮ ลปุง แตะ โอก ฮอยจ ละ ปลัฮเตะ. โอเอีฮ เมาะ ป อัฮ อื, เอีจ เกิต เนอึม เอิน ตอก อัฮ อื เซ โครยญ เจือ. 16เกือฮ โรฮ ฮิมะ ราื, ปลัฮเตะ ปิญ เอิน ฆาื อื ตอก ฮาึก แกะ โฮ. เกือฮ โรฮ รน่ะ กอ ราื ปอ ปาื อื ยุฮ ปลัฮเตะ ตอก จะ โฮ. 17พะจาว เกือฮ โรฮ แพร ราื ละ ปลัฮเตะ แปน โม่ว แปน โม่ว อื เอิน. เญือม เซ มัฮ ปุย ป ซ ปุน โอต โฆยญ บริ เกือฮ อื ฮอยจ เซ? แจง โอ อื ไก เยอ. 18ฟวยจ เซ เญือม โอก รซอม ดวน พะจาว ละ อื, นัมแคง เซ ลวยจ ไน เอิน ฆาื อื. พะจาว ดวน แม กาื ฮอยจ ละ อื, กาื เซ เกือฮ แม รอาวม เซ ปัต ตอก ไพรม แตะ.

19พะจาว เอีจ เกือฮ ลปุง แตะ ฮอยจ ละ โม ยาโคป. เอีจ เกือฮ โกตไม ไม่ ลปุง ซตอก แตะ ละ โม อิซราเอน. 20ละ ปุย ปะเทต ไฮญ เญอ, พะจาว ปังเมอ โอ ยุฮ อื ละ อื ตอก เซ ติ ตื เนอึม. ปุย เมือง ไฮญ เญอ ยุง โตว อื โกตไม ยุฮ พะจาว เยอ.

ไมจ เปอะ ลืลาว พะจาว.