1โอ พะจาว, ป มัฮ ป แลน แก โม อิซราเอน, ปะ เอีจ นัม เปอะ จัตเจือ โยเซป ตอก นัม ปุย แกะ ยุฮ แตะ โฮ. ปัว เปอะ ง่อต ฮมอง ป ปัว เยอะ, ปะ ป งาวม ราว โม เตปด่า ไก โพรยจ เจอ, ปัว เปอะ ซอต รัง ซเปีย ยุฮ เปอะ ละ เอะ. 2ปัว เปอะ เปลีฮ อัมนัต ระ ยุฮ เปอะ ซองนา โม เอฟราอิม, โม เบ่นยามิน, ไม่ โม มะนาเซ. ปัว เปอะ ฮอยจ เรอึม เอะ เกือฮ โปน ฮา ป โอ ไมจ.

3โอ พะจาว, ปัว เปอะ เรอึม เอะ เกือฮ แม ไมจ แม ตอก ไพรม แตะ. ปัว เปอะ เลียก พาวม นึง เอะ เดอึม เอะ ซ โปน เนอึม.

4โอ พะจาว ป กุม ตฮัน มะลอง, ปะ ซ รอก พาวม ลั่ง เปอะ นึง รซอม ไววอน เอะ ป มัฮ ปุย ไน เปอะ เฮี เลี่ญ เมาะ เมอ แล? 5ปะ เอีจ เกือฮ เปอะ เอะ โซม รบวต แตะ ตัง อาวป, เกือฮ โรฮ เปอะ เอะ ญุ รบวต แตะ ตัง รอาวม. 6เอีจ เกือฮ เปอะ ปุย เมือง รวิต รเวียง เอะ เซ รเจ รไซญ ฆาื เฆรือง แตะ บั่นเมือง ยุฮ เอะ. โม ป ตอซู ไม่ เอะ เซ เอีจ เพียก แฮม เอะ.

7โอ พะจาว ป กุม ตฮัน มะลอง, ปัว เปอะ เรอึม เอะ เกือฮ แม ไมจ แม ตอก ไพรม แตะ. ปัว เปอะ เลียก พาวม นึง เอะ เดอึม เอะ ซ โปน เนอึม.

8ปะ เอีจ โรวก เปอะ โม อิซราเอน โอก ฮา เมือง อียิป ตอก โรวก ปุย โคะ อะงุน โฮ. เอีจ โครฮ เปอะ ปุย โฮวน เมือง เกือฮ โอก ฮา ก อาวต อื. ฟวยจ เซ ซมา เปอะ โคะ อะงุน ยุฮ แตะ เซ นึง เบือง อื. 9เอีจ ไท เอีจ เพรียง เปอะ เตะ ละ โคะ อะงุน เซ, เกือฮ เปอะ เกียฮ ซาึต แรฮ แตะ โด่ะ ไม่ มา อื ปอ เลี่ป อื ยุฮ เมือง เซ. 10ปุ โรม อื ปอ เอิน ไฆลป อื ยุฮ บลาวง. กัก อื ระ ปอ เลอึป เอิน อื โคะ โซน ซีด่า โรฮ. 11กัก อื เซ ซนาว ติ แตะ ฮอยจ นึง ปลัฮ รอาวม ระ. มา โรฮ ฮอยจ นึง โกลง ยูฟะเรตี.

12เคียง มัฮ อื ตอก เซ ปะ ตอ เญื่อฮ โน่ง เปอะ ฆรุง อื เมอ? ปุย เมาะ ป โฮว พา คระ เซ เยอ เอีจ โฮลฮ เปฮ เยือ เปลิ อื ฆาื อื. 13เลีจ พริ ป โอก เน่อึม โตะ น่อง, ฮอยจ โจฮ ฮอยจ บึน อื. ซัตซิง ป อาวต นึง กังเด่น กังปอย ฮอยจ โซม โรฮ อื. 14โอ พะจาว ป กุม ตฮัน มะลอง, ปัว เปอะ เฌาะ รพาวม แตะ ฮา กัน เซ. ปัว เปอะ แก แลน เน่อึม ก อาวต เปอะ เมือง มะลอง ไม่ โตก เปอะ ละ โคะ อะงุน ยุฮ เปอะ เฮี. 15เอีจ มัฮ ปะ ไอฮ ป ซมา เยอ, เอีจ เกือฮ โรฮ เปอะ กัก อื ระ ฮอน ตอน ฮมัน ละ โกะ เปอะ ไอฮ.

16กังเคะ เอ ปังเมอ ไก ป ฮอยจ ฆู เกือฮ ลเลอึม, ฟวยจ เซ โตก แม อื นึง งอ เกือฮ ฮะ ล่อยญ. ปัว เปอะ เปลีฮ รพาวม ฮาวก แตะ ละ ปุย โม เซ ไม่ เกือฮ เปอะ ไลจ โลม เอิน. 17ปัว เปอะ เรอึม ปุย ไน เปอะ ป เอีจ เลือก เปอะ อาึง เซ. เอีจ มัฮ ปะเทต ป เกือฮ เปอะ ระ ฮอน ตอน ฮมัน ละ โกะ เปอะ ไอฮ เซ. 18ปัว เปอะ เรอึม เอะ เกือฮ ไอม, เดอึม เอะ ซ โฮลฮ ลืลาว มอยฮ เปอะ. ดัฮ เปอะ ยุฮ ตอก เซ โม เอะ เญือะ ซ ลเตือฮ โตว ติ แตะ ฮา เปอะ ฆาื อื.

19โอ เยโฮวา ป มัฮ พะจาว กุม ตฮัน มะลอง, ปัว เปอะ เรอึม เอะ เกือฮ แม ไมจ แม ตอก ไพรม แตะ. ปัว เปอะ เลียก พาวม นึง เอะ เดอึม เอะ ซ โปน เนอึม.