1ปลัฮเตะ ป โฮลฮ โม จัตเจือ โยเซป เซ, ไก เน่อึม นึง โกลง จอแด่น โบ เมือง เยรีโค. ปุก ลวง ลั่ก โอก ซเงะ ละ ก ไก รอาวม ปลาึฮ นึง เมือง เยรีโค เซ. ม่าื เตะ อื โฮว แม ลวง ลั่ก ลาึน เวือฮ. โอก เน่อึม เยรีโค เซ, ฮาวก เลียก แม ละ บลาวง เบ่ตเอน. 2โอก เน่อึม ย่วง เบ่ตเอน เซ โฮว แม ฮอยจ นึง ย่วง ลุต, โฮว แม ฮอยจ นึง ย่วง อาทาโรต. เลียก นึง นาตี โม อารคี. 3ฟวยจ เซ เลีฮ แม ลวง ลั่ก เลียก ซเงะ ฮอยจ นึง นาตี โม ยาเฟนที, โฮว แม ฮอยจ นึง ย่วง เบ่ตโฮโรน ก เซฮ, ฮอยจ แม นึง เมือง เกเซอ, โฮว ลอยจ นึง ปลัฮ รอาวม ระ.

4จัตเจือ โยเซป ป มัฮ โม มะนาเซ ไม่ โม เอฟราอิม โฮลฮ รัป ปลัฮเตะ โม เซ แปน คอง โกะ แตะ ไอฮ.

5ม่าื เตะ ยุฮ โม เอฟราอิม ตัม มู ตัม ซฆลาวม อื มัฮ ตอก เฮี, ลวง ลั่ก โอก ซเงะ มัฮ เน่อึม นึง ย่วง อาทาโรต-อัตด่า, ฮาวก ฮอยจ นึง เบ่ตโฮโรน ก ล่าวง. 6ม่าื เตะ เซ โฮว แม ฮอยจ นึง ปลัฮ รอาวม ระ. เคต ลวง ลั่กล่าวง อื ปุก เมือง มิกเมทัต. ลวง ลั่ก โอก ซเงะ นึง อื, โฮว รบ่อก ลวง ลั่ก เมือง ทาอานัต-ชิโล, ฟวยจ เซ โฮว แม โปน ย่วง ยาโนอา ลวง ลั่ก โอก ซเงะ เซ. 7โอก เน่อึม ย่วง ยาโนอา เซ, เลีฮ แม ฮอยจ นึง ย่วง อาทาโรต ไม่ ย่วง นาอารา, โฮว ปุก เมือง เยรีโค. โฮว ลอยจ นึง โกลง จอแด่น. 8ม่าื เตะ เซ โอก แม เน่อึม ทัปปูวา เลีฮ แม ลวง ลั่ก เลียก ซเงะ, ฮอยจ นึง โกลง คานา, โฮว ลอยจ นึง ปลัฮ รอาวม ระ. เซ มัฮ ปลัฮเตะ ป โฮลฮ จัตเจือ โม เอฟราอิม แปน คอง โกะ แตะ ไอฮ. 9โนก ฮา เซ โม เอฟราอิม โฮลฮ โรฮ ย่วง ระ ไม่ ย่วง แตวะ ป อาวต นึง นาตี โม มะนาเซ เซ แปน คอง แตะ ง่อน. 10โม เอฟราอิม เซ ปังเมอ โอ โครฮ โม คะนาอัน ป อาวต นึง เกเซอ เซ เกือฮ โอก ฮา เมือง เซ. มัฮ เซ ป อาวต ลั่ง โม คะนาอัน เซ ไม่ โม เอฟราอิม ฆาื อื ฮอยจ ปเลี่ย เฮี. ปุย โม เซ ปังเมอ โฮลฮ ยุฮ กัน โซะ นึง โฮลฮ อื แปน ครา เซีญ ปุย.