1ฟวยจ เซ โยป โลยฮ ญอ แม อื ตอก เฮี, 2“เอีจ มัฮ เนอึม ปะ เฮี ป เกียฮ เรอึม เนอึม ปุย ชุมเรียง ตอก อาึ เฮี. เอีจ โตวก เนอึม เปอะ เตะ ตูไต มะ ฆราวง ชุม เมอะ เฮี เกือฮ ไก แม เรียง แด่น. 3เอีจ มัฮ เนอึม ปะ เฮี เซ ป เพอึก ปุย งาว ตอก อาึ เฮี เกือฮ เฮียง เงอ. เอีจ เพรียง เนอึม โรฮ เปอะ ปุย โอ ไก กัมกึต เฮี เกือฮ ยุง ตอก ซ ยุฮ ซ อัฮ แตะ โอเอีฮ. 4มัฮ ปุย บุย ป เกือฮ ปะ อัฮ โอเอีฮ ตอก เซ, มัฮ ปุย ป โบว รพาวม เปอะ เกือฮ เปอะ เพอึก โอเอีฮ ตอก เซ เยอ?

5“โม ป เอีจ อาวต นึง เมือง ป ยุม ป ไก ฆรึม เตะ ฆรึม รอาวม เซ, อาวต ไม่ โตวฮ ฆราึง ไม่ รกุฮ รเตียง แตะ. 6เมือง ป ยุม มัฮ ป ที ลอป ละ แลน พะจาว อื. ไก โตว ตอก ไฆลป อื ฮา ไง่ พะจาว เยอ.

7“พะจาว กัง ปลัฮ มะลอง ลวง ลั่กล่าวง อื เกือฮ อื เลอึป ราว ก ม่าวง เยือ อื เซ. เกือฮ ปลัฮเตะ อาวต นึง กังฮาว เตือง โอ อื ไก รตาึก. 8มัฮ พะจาว ป เกือฮ ชุต รวู นาวก นึง รอาวม. เกือฮ โตว ชุต รวู เซ ดอฮ เตือง เชียน รอาวม ละ อื. 9มัฮ พะจาว ป เม่าะ เคิ ดู นึง เกือฮ อื ชุต รวู เดีย อื. 10มัฮ ป ยุฮ เคต ยุฮ ม่าื ละ ปลัฮ รอาวม ไม่ กังฮาว. เกือฮ โรฮ เคต ไก ซน่ะ เฟียก ไม่ ซเปีย. 11ป มัฮ ด่อง ดู มะลอง เซ ดุงเดียง เอิน, นึง เรียง ลอยฮ เซียง บวยจ พะจาว ละ แตะ. 12พะจาว เกียฮ บั่งคัป ปลัฮ รอาวม เกือฮ อาวต โฆย เบือ อัมนัต ระ แตะ. เอีจ ปุน ยุฮ โรฮ ไลจ ไม่ ราฮัป ป มัฮ เงือก เซ เบือ เฮียง ยุง แตะ. 13พะจาว เกียฮ เกือฮ ปลัฮ มะลอง บวยฮ เบือ รพาวม โอก ฮา มวยญ แตะ. เตะ พะจาว เอีจ ปุน ยุฮ ยุม ไม่ ซโอยญ ระ ป ริ ตอ ฮา แตะ เซ. 14ง่อต ที แลน, กัน ซัมคัน เมาะ ป เอีจ ยุฮ พะจาว ป ยุ ป ฮมอง เอะ นึง อื เซ, มัฮ เยือ ลั่ง ตอก เฮลาะ ตอก เพลือะ อื โฮ. มัฮ โรฮ ตอก ฮมอง เงอะ เซียง รแซป โฮ. ป มัฮ อัมนัต โญตซัก ระ ไล ยุฮ อื เซ มัฮ ปุย ป ซ เกียฮ ยุง เตือง โอยจ อื?” อัฮ เซ โยป เปอ.