Kayëte kigëna mba Piyer
Wade yehëhna hnë iŋi kayëte
Afaƴik Piyer ŋa herëk iŋi kayëte wati nte kobëko gë icëm ntëw̃u (mpëd yëbëlan bëhn wafëhw imbëɗ g'iryaw̃ g'imbëɗ gë bëhn wafëhw imbëɗ g'iryaw̃ g'imbëɗ gë wahnah (65-69) ga ndëcëk hnagi Yesu ỹa). Kerëhnëkëhni vële hwëtahnëk va ɓare ƴëtëlëfuhna bi ne nkeniho. Niraɗëhëhni soŋe vëharaŋ wamër va. Andënkwëtehnëɗëhëhni gante nkwënëɗëni ikwëtahn dëw̃ hni ka do ikwëtahn dëw̃ hni ŋa kahnëk hn'ile njaw̃ëk. Yesu mbokajëɗ do atëfëkëhni kahnëndani hnë umë.
Wëlin wanës wakwëhn nafa hn'iŋi kayëte: gë fere, kila, vëharaŋ wamër, iƴët.
Wëlin gante nke kayëte ka:
Simpaỹi (1.1-2)
Gante tëfëka nkeni vële kwëhnëk Këris va (1.3-11)
Kahnëndaryin hnë vile haraŋirun hna (1.12-21)
Soŋe vële haraŋëɗ wamër va (2.1-22)
Paryi Yesu mbokajëɗ (3.1-18)
Simpaỹi
1Ami, Simo Piyer, aryokuŋëhn do afaƴik Yesu Këris, herëhnëɗëhëhni aki vahnë vële njëɗak W̃ën ikwëtahn nte hëñëk gë ntëw̃ fu ŋa. Usatah Yesu Këris, umë ale ye W̃ën fu do Afehët, yëɗaku iŋi kwëtahn.
2Araɓi ƴam ỹa g'ipërëna W̃ënu ŋa nkwënaw̃u ɗus, gë fere iƴët W̃ënu gë Yesu Ahwëhn fu ỹa.
Imac do itëhna W̃ën
3Gë fanka falëw̃u fa W̃ënu ŋa njëɗakëfu fop ile valëkëfu ỹa soŋe nkehahnin gante ñaɗ ka. Antik rac gë fere uyët ule hwëhnayinëk soŋe lëw̃u, umë ale w̃acëkëfu gë icëmb do g'ipërëna camah ntëw̃u ŋa. 4G'icëmb do g'ipërëna tac W̃ënu ŋa anjëɗakëfu viỹë vihnëfak gë vifërën had gante ntehnëko koɓëri ka. Antik gë fere vëỹin, soŋe afehëtahniwu hnë viña vimeh iỹi ɗuniỹa vile fërëkahnëɗëhëhni vahnë, do ayentahniw̃u ile nke W̃ënu ŋa.
5Soŋe umë ye kamënaryin awënu kwëtahn hun hna ipërëna camah; hnë ipërëna camah hna gwënëryin uyët W̃ënu ŋa; 6hnë uyët W̃ënu hna gwënëryin imëk vankaf hun; hnë imëk vankaf hun hna gwënëryin iɗuñëna; soŋe iɗuñëna ŋa gwënëryin nkeya nte ñaɗ W̃ënu ŋa; 7hnë nkeya nte ñaɗ W̃ënu ŋa gwënëryin iŋahnël hun ŋa; hnë iŋahnël hun hna gwënëryin iŋahn W̃ënu ŋa. 8Kaɓi, ge kwëhnarun vaŋi vankeya, do ge pëlëk vënkahn va hnë w̃uhnë, antëw̃ëɗun vifërën do ndokuŋëɗun ɗus do iƴët hun Ahwëhn fu Yesu Këris nkwënaɗ. 9Ɓare ale wok kwëhnana vaŋi vankeya va, nke had ale w̃ëpëk; nuɗina ɗus. Andënkwëk W̃ënu ŋa njaryëka wameh waɓë koɓëri ŋa.
10Soŋe rac ye, vëỹënta mën, kamënaryin aliwu imac gë itëhna W̃ënu ŋa njaw̃ g'ahaw̃ary hnë w̃uhnë. Kaɓi ge ntirun koyëna, ƴoɗiluhna muk hnë wameh hna. 11Aki W̃ënu ŋa kacaɗëhu g'afërën Naw̃ nte wok puɗina muk mba Ahwëhn fu do Afehët fu Yesu Këris hna.
Vële hnuk icëmb Këris
12Soŋe rac ye, lakënde ayëtu vëỹin fop, do fëna ahahnëndawu hnë toña le wëryërun ỹi, nkoɗëfu ryënkwëtehnëndu kwëlëkwël. 13Catanëko, age cëmëla, andënkwëtehnëɗëmu soŋe wow̃u vëhnëgak. 14Kaɓi njëtëɓu ɓiỹëɗina cëmëɗëfu, had gante tufëko Ahwëhn fu Yesu Këris. 15Ɓare ntiɗëfu fop soŋe wow̃u aryënkwëtahnëndu kwëlëkwël vëỹin age cëmëɓu.
16Ante pëƴaỹirunëho ŋa Ahwëhn fu ỹa Yesu Këris mbokajëɗ gë fanka, gena wëhnantul wahnahar nësëhnirunëho. Ɓare nuɓun inaỹ ntëw̃u ŋa gë vinkër vintëw̃ fu va. 17-18G'umë nkeɓunëho kuŋ pacah hna, wati nte ntënënëkawo do cëmbehnëkawo W̃ënu ŋa Rëm ỹa. Wati rac, hnë Icëmb Camah ntëw̃u hna, W̃ënu ŋa nkwëryëndanëka kopa lëw̃u ỹa, ntehn: «Aỹi ajë mën ye ale ỹahnëɓu ɗus. Hnë umë natëɗëho.» Do kopa rac, fuhnë dënk nkwëryëɓun matind ambin.
19Do fëna, tamahnëɗëfun g'ahaw̃ary wanës wakila W̃ënu ŋa. Anjivënëɗun ge kwëtarun vintaw̃ary hun hna, kaɓi nke had lampu le fëɗik hnë umëhwëry hafo Fac ỹa tëki, do Këris, ikol sampërënkoli ŋa, pëtën wasakahn hun w̃a. 20Ani gë iỹin fop, njëtëryin ɗus: wanës wakila hnë Vikerëh hna matina vinahan vidëw̃ hni hna dënk. 21Kaɓi pëgw koɓëri ŋa, wanës W̃ënu ŋa matina hnë ahnë. Ɓare Iƴir Ipacah ŋa liɗëhëhni vahnë va nësëni wanës wante w̃atik W̃ën hna.