1Yesu nakalutilila kuwalonjela, “Ndanguwalonjelani ndikomya, wabaha wanji bahano hotuli hawobagama nekuwona Undewa wa Nguluwi ukuya kwa ukulu.”

2Mazuwa sita logapulute, Yesu nakawahola Petili na Yakubu na Yohani, kuchanya kuchidunda chikulu waliyeka. Ako, Yesu nakagaluka kumeho hali hewo, 3nguwo yoyavalile naigaluka iwa nzelu chweya, kwali kuduhu munhu yoneche muisi aha yojeza kuidita nzelu vila. 4Eliya na Musa nawawalawila, wolongasa na Yesu. 5Petili nakamlonjela Yesu, “Mlangusa, inoga heko hetwe twa hano. Lelo, tuzenje vibumuli vidatu, chimwe cha hegwe na chimwe cha Musa na chimwe cha Eliya.” 6Heye na wayage nawadumba heko nahawavizelele cha kulonga. 7Hamba nailawila ng'hungugu iwagubika, na lizi ihulikwa kulawa kuli aila ng'hungugu ilonga, “Ayu ndo Mwanangu ndimganile, mumhulichize heye.” 8Baho walanguswa awo nawalola nzingo zeng'ha, ila hawamuwene ne munhu, ila Yesu yaliyeka hamwe na hewo.

9Lelo, lowali wodulika kulawa kuchidunda, Yesu nakawalemeza waleche kumlonjela munhu yoneche mbuli yowaiwene, mbaka Mwana wa Munhu loyozilipuka kulawa kowabagame. 10Lelo, nawebata ilajizo alyo, ila wali walonga hewo kwa hewo ndo choni kuzilipuka kulawa kuli wabagame. 11Nawamuuza Yesu, “Mbona walangusa wa malajizo ga Musa wangulonga igana tandi Eliya yoye?” 12Heye kawedichila, “Ena, Eliya kanguya tandi kuwika goya geng'ha. Ahyo, iwa ndaze lelo yandichigwa kuli Maandiko Matakatifu kota Mwana wa Munhu kogazigwa lukami na kubezigwa? 13Ila ndanguwalonjelani, Eliya mina koya, na wanhu nawamditila vyowaganile, kota vyoyandichigwe kuli Maandiko Matakatifu.”

14Lowawafichile wala walanguswa wanji, nawona lung'hongola lwa wanhu aho. Na wamwe wa walangusa wa malajizo ga Musa wali wochilewa na hewo. 15Bahala wanhu lowamuwene Yesu, weng'ha nawabubuwala ng'hatu, wambilimila wakamlamse. 16Yesu kawauza walanguswa wa heye, “Mwangilewa choni na hewo?” 17Aho munhu yumwe kulawa mumula mowali wanhu kamwidichila, “Mlangusa ndimigala mwana wa heni kwa hegwe, kana chijeni chimditile yalemwele kulonga. 18Wone chijeni chimwaluche, chomgwisa na kumdita yalavye ifulo kumlomo, kochijejeda mizino na kukala bee. Ndiwalonjela awa walanguswa wamlavye chijeni ila walemwela.”

19Yesu nakawalonjela, “Hemwe lulelo lulihela makundo! Ndochikala na hewe mbaka nili? Ndowemilila mbaka nili? Ndigalileni heni ayo mwana.” 20Wamigala heye kwa Yesu. Baho du, acho chijeni lochimuwene Yesu, chimdita yawe na chinzilisa, na heye mwana kagwa hasi, yogalawata na kulawa ifulo kumlomo. 21Yesu kamuuza mhaza wa ayo mwana, “Kawa hino kulawila nili?” Na heye kamwidichila, “Kulawila loyawele mwana mdodo.” 22“Mala nyinji chijeni chiwaga chimgwisa mchiluli na mmazi, leka chimbagamize ng'hatu. Lelo, wone ulinguweza, utonele isungu na ututanze!” 23Yesu nakamlonjela, “Mbona kwangulonga wone ulinguweza! Mbuli yeng'ha yowa goya kwa munhu yawele na makundo.” 24Aho, yula mhaza nakayowa kwa lizi, “Ndangukunda! Ila makundo ga heni hagenele, unhanze kwa mbuli ya kulema kukunda.”

25Yesu loyawene lung'hongola lwa wanhu lukonjezeka himahima kumwando kwa heye, nakaching'hanuchila chila chijeni chihile, “Chijeni ulingumdita ayu mwana yawe yolemwela kulonga na kuhulika, ndangukulajiza, mlawe mwana ayu na uleche kumwinjila kahi.” 26Aho chila chijeni chikwiniza lizi, chimgwisa yula mwana hasi, hamba chimlawa. Mwana nakoneka kota mtufi, wanhu wenji nawalonga, “Kabagama!” 27Ila Yesu nakamibata moko nakumwinula, na heye kema.

28Lelo, Yesu loyenjile mng'handa, walanguswa wa heye nawamuuza kwa chinyele, “Lekachoni hetwe tulemwela kulavya chila chijeni?” 29Na heye kawalonjela, “Chijeni kota achi hachilawa mbaka kwa kumlanda Nguluwi hela.”

30Yesu na walanguswa nawoka nawaluta kunji kukolela Galilaya. Yesu nahaganile wanhu wavizele kota koya. 31Kwa vila yali yowalangusa walanguswa wa heye yolonga “Mwana wa munhu kanguzawichigwa mmoko womkopola, kochikala mchilaga na zuwa lya kadatu kozilipuka.” 32Walanguswa nahawavizelele mbuli ayo, ila nawadumba kumuuza.

33Walanguswa nawoya Kapanaumu. Naloyawele mng'handa, Yesu nakawauza, “Namwali kiwuza choni kula mnzila?”

34Ila hewo nawanyamalila hawamwidichile, mina kunzila wali wochilewa whaani yawele mkulu ng'hatu kwa hewo. 35Yesu nakekalisa hanyi, nakawachema walanguswa kumi na weli, nakawalonjela, “Yalingugana yawe wa mwaluko, igana yawe wa mwiso na yawe chitumagwa wa weng'ha.” 36Hamba nakamhola mwana mdodo, kamwimiza hagati hawo, kamkumbatiza, hamba kawalonjela, 37“Munhu yoneche yombochela mwana kota ayu kwa mbuli ya heni, kangumbochela heni, na yalingumbochela heni, halingumbochela heni ndiliyeka, ila kangumbochela heye yanhumile.”

38Yohani nakamlonjela, “Mlangusa, tumona munhu yumwe yolavya chijeni kwa itagwa lyako, natwe natujeza kumlemeza kwa vila heye nahawele hamwe na hetwe.” 39Ila Yesu nakawalonjela, “Mleche kumlemeza,” Mina kuduhu munhu yalingudita vinduzanduza kwa itagwa lyangu, na baho koweza kulonga gehile kwa heni. 40Munhu yoneche yohambe yatulemele twahamwe. 41Munhu yoneche yowapani chizombe cha mazi ga kung'hwa, kwa vila hemwe ndo wanhu wa Kilistu, ndangukomya holemwa kupegwa ndolendole ya heye.

42Yoneche yomwambuza kuwifya yumwe wa awa wadodo walingung'hunda, igana munhu ayo kumkoweleza iganga likulu lya lwala msingo na kutozigwa kuli bahali. 43Moko wa hegwe wone ukwambuze kikwang'hwala, udumule! Inoga kwinjila kuli ukomu uli na moko umwe, kusinda uwe na moko meli na kwinjila kuli chiluli cha Jehanamu. 44Amo mhiko zilinguwadakula hazifaga na chenje chilinguwalakaza hambe chizime. 45Na mgulu wa hegwe wone ukwambuze kikwang'hwala, udumule! Inoga kwinjila kuli ukomu ulihela mgulu umwe, kuleka kuwa na migulu jeng'ha mili na kwinjila kuli chiluli cha Jehanamu. 46Amo mhiko zilingudakula hambe zife na chiluli chilungulakaza hambe chizime. 47Na iziho lyako wone likwambuze kikwang'hwala, wuse litaje! Inoga kwinjila kuli Undewa wa Nguluwi uli na iziho limwe hela, kuleka kuwa na meho geng'ha meli nakwinjila kuli chiluli cha Jehanamu. 48Amo kuwele na mhiko zillingudakula hambe zife, na chenje hambe chizimiche.

49“Mina chila munhu kokwenguligwa na chiluli kota vila nhambiko ilikwenguligwa na mwino. 50Mwino unona, ila wone wajilize unoni wake wononezwa na choni? Muwe na mwino mgati mwenu na kikala goya hali hemwe.”