1Yesu nakalawa koyali, kaluta hakaye hake Nazaleti koyalawile, yelongoze na walanguswa wa heye. 2Ifichile zuwa lya Kwesela, kaluka kuwalangusa mng'handa ya kusalila. Kwali na wanhu wenji na wali wohulichiza na wekala wabubuwale, weuza walonga!, “Kagalavya kohi aga gose? Kahi luhala lwachi loyapegwe ayu? Kahi, kangudita ndaze vinduzanduza avi vyoyalingudita? 3Ahi ayu hawele selemala, mwana wa Maliya mng'holoze na Yakubu na Yose na Yudasi na Simoni? Ndaze walumbuze hawalingikala baha na hetwe?” Hamba wambeza!

4Yesu kawalonjela, “Waloli wa Nguluwi watogolagwa kweng'ha kula, ila hawatogolagwa hakaye hawo na kwa wang'holoze.”

5Yesu haditile vinduzanduza hala honhu, ila nakawawichila moko watamwa wachefu, nakuwalohola. 6Yesu nakabubuwala kwa vila wanhu awa nawalema kukunda.

Hamba Yesu nakavijendela vila vijiji vya habehi yowalangusa wanhu. 7Yesu nakawachema awala walanguswa kumi na weli, kawalajiza weliweli, kawapa ludali lwa kuwinga vijeni vihile. 8Kawalajiza kalonga, “Mleche kuhola chinhu komluta, mleche kuhola chilyo na sendi na mhako, mhole ng'hweku yeka. 9Mvale makwamba, ila mleche kuhola igwanda lya keli.” 10Kahi nakawalonjela, “Honeche hombocheligwa, mikale hali ng'handa yiyo mbaka homkuka honhu aho. 11Honhu honeche, wanhu hawawabochele ne kuhulika gomlangusa, muche mkung'hune nhimbwisi mmagulu genu iwe ulolezi wa kuwapanjila hewo.” 12Awala walangusa nawoka na kuwadamlila wanhu Mbuli Inojile na kuwalonjela wamgalamchile Nguluwi. 13Nawalavya vijeni vinji na wawabakaliza mafuta watamwa waloholigwa.

14Helodi mndewa wa Galilaya nakahulika goyalingudita Yesu, mina lutogo lwake nalwenela honhu heng'ha. Wanhu wamwe nawali wolonga, “Yohani Mbatiza kazilipuka, ndo vila mong'ho uno wangukola mijito mgati mwake.” 15Wanhu wanji wali wolonga, “Munhu ayu ndo Eliya, na wanji wali wolonga, ayu ndo mloli wa Nguluwi, kota awala waloli wakatali.”

16Mndewa Helodi vyoyahuliche, kalonga, “Hambi ndo Yohani Mbatiza! Ndimdumule mutwi, ndaze, kazilipuka!” 17Aho hamwande Helodi heye nakalajiza Yohani yebatigwe, yahindilwe mchinweng'ho, nakadita hino kwa vila nakamhesa Helodiya, na yawele mdala wa Filipo. Filipo nayali mng'holoze Helodi. 18Yohani Mbatiza yali yomlonjela Helodi, “Haiwa goya kuhesa mdala wa mng'holozo Filipo.”

19Helodiya nakawika ng'alazi mnhumbula, mbaka yamkopole Yohani, lelo yali yolemwela kokwaluka ndaze! 20Helodi yaliyomdumba Yohani, kwa vila nakavizela Yohani yali Yelile na yatanganiche, na yali yomwamila, waleche kumdita vibi. Helodi nakagana kumhulichiza Yohani, hanga loyamhuliche, nakawa na masinzo.

21Zuwa imwe Helodiya nakapata mhumu. Zuwa ya kudita kukumbuchila zuwa yo yaleligwe Helodi, kawalajiza wanhu wawele wakulukulu, wakulu wa wamizi, na wakulu weng'ha waliwochikala muisi ya Galilaya. 22Mhinza wa Helodiya kenjila mng'handa na kuvina goya, awala wakulu na Helodi na wajenzi wanji na wanojezwa! Mndewa Helodi nakamlonjela ayula mhinza, “Undande chinhu choneche cho ulingugana na heni ndokupa.” 23Kahi na kwa ulonzi winji wa kilaha, nakamlonjela, “Ndangilaha kota choneche choundanda, ndokupa, chasi chikulu cha nusu ya undewa wa heni.”

24Aho yula mhinza kalawa kunze kazangumuuza mayake, “Ndande choni?” Na heye kamwidichila, “Ulande mutwi wa Yohani Mbatiza.” 25Mhinza ayula nakamhiluchila Mndewa yobilima nakumlonjela, “Ndangulanda ndigalile sambi baha mchisaye mutwi wa Yohani Mbatiza.”

26Mndewa Helodi nakesinza ng'hatu, ila kwa vila nakelaha, hali wala wajenzi wezile mchilyo, nahamlemele hebu. 27Lelo, Mndewa Helodi na kawalajiza wamizi wakegale mutwi wa Yohani. Mwamizi nakaluta, nakumdumula mutwi wa Yohani mla mchinweng'ho, 28nakegala mutwi wa Yohani Mbatiza uwichigwe mchisaye, kamha mhinza na mhinza kamigalila mayake. 29Walanguswa wa Yohani lowahuliche mbuli ayo, nawaluta kuhola mtufi wa Yohani, wazakuutila mchilaga.

30Watumigwa nawahiluka, nawekungajiza hamwe hali Yesu, wamlonjela geng'ha gowaditile na kulangusa. 31Yesu nakawalonjela, “Tulute tuliyeka honhu ha uviso tukesele tandi.” Nakalonga ahyo kwa vila kwali na wanhu wenji lukami wali wafika aho nakuka mbaka Yesu na walanguswa wa heye nahawawele na honhu ha kulya chilyo. 32Lelo, nawoka waliyeka kwa itumbwi, waluta honhu hawele hela wanhu.

33Ila wanhu wenji nawawona woluta, nawawazela. Lelo, wenji nawalawa chila muji nakubilimila kuko kowalutile Yesu na walanguswa wa heye, wawalongola kufika. 34Lowaduliche kumwani, Yesu nakona lung'hongola lwa wanhu, kawonela isungu, kwa vila wali kota ming'holo jilihela mdimi. Kaluka kuwalangusa mbuli nyinji. 35Nemisi naipuluta walanguswa wamlutila Yesu, nawamlonjela, “Honhu aha twa kisolo, na sambi lyangutita. 36Igana uwalaje wanhu walute kumigunda na kuli vijiji vili habehi, wakagule vilyo.” 37Ila Yesu nakawalonjela, “Muwape hemwe ndiya.” Na hewo wamuuza, “Lelo, tulute tugagule mibumunda kwa sendi denali miya mbili zihejile sendi za kuhega myezi nane, na kuwegalila chilyo?” 38Yesu nakawauza, “Mwanajo mibumunda jilinga? Mlute mkalole.” Vyowalolile, wamlonjela, “Jabaho mibumunda jihano na somba mbili.”

39Yesu nakawalajiza walanguswa wawalonjele wanhu weng'ha wekalise vilundo honhu hawele na misolo midodi. 40Na hewo wekalisa kuli vilundo vya wanhu miya, miya na vya wanhu makumi gahano hano. 41Hamba Yesu nakahola ajila mibumunda jihano na somba mbili, kalola kilanga, katambichiza. Kamogola kawapa walanguswa wa heye wawagawile wanhu. Na zila somba mbili nazo kawapa weng'ha. 42Wanhu wose nawalya weguta. 43Walanguswa wakungajiza chilyo chisigale mibumunda na somba, navimema vidoto kumi na vili. 44Walume nawadile ajo mibumunda nawali wafichile elufu zihano.

45Baho Yesu nakawalonjela walanguswa wenjile mli itumbwi wamlongole walute Betisaida, mwambu mwa ilamba, mhela heye yolulaga lung'hongola lwa wanhu. 46Yesu vyoyawalajile wala wanhu, nakaluta kuchidunda kumlanda Nguluwi. 47Loifichile matinazo, itumbwi nalyali hagati ha ilamba, na heye Yesu yali yaliyeka hafungo mwa ilamba. 48Lelo, nakawona walanguswa wa heye wohila kutowa mitela ja itumbwi, kwa vila mbeho yali iputa. Behi na kubwemwenzuka, Yesu nakawawinza akuno yojenda mchanya mmazi, nakagana kuwapuluta. 49Ila lowamuwene yojenda hali mazi, nawejesa idimu, nawatowa iyowe. 50Mina weng'ha lowamuwene nawadumba lukami. Baho Yesu nakalonga na hewo, “Msindamale, nda heni. Mleche kudumba!” 51Hamba kakwina mitumbwi mowali, na mbeho inyamalila. Walanguswa nawabubuwala ng'hatu, 52kwa vila nawang'hali kuvizela ulanguso wa jila mibumunda. Luhala lwa hewo nalung'hali lububuwale.

53Nawaloka ilamba, nawafika isi ya Genezaleti, nawemiza itumbwi. 54Lowalawile mli itumbwi wanhu nawamzela Yesu baho. 55Lelo, hima wazunguluta isi ila yeng'ha, waluka kuwahola watamwa wawasile mmicheka jawo, wawegala chila honhu kowahuliche Yesu kakuko. 56Chila honhu Yesu koyalutile, mvijiji, mjini au kumigunda, wanhu nawawawika watamwa mluga, wamlanda wadolize lupembo lwa nguwo ya heye. Na weng'ha wadolize nawaloholigwa.