135-küy •••• Xudaning qilghan ulugh emelliri üchün ibadet
1Hemdusana! Perwerdigarning namini medhiyilenglar,
Uni medhiyilenglar, Perwerdigarning qulliri!
2Uni medhiyilenglar, Perwerdigarning öyide turghanlar,
Xudayimizning hoylilirida turghanlar!
3Yahni medhiyilenglar, chünki Perwerdigar méhribandur;
Uning namigha küy éytinglar;
Chünki mushundaq qilish shérindur;
4Chünki Yah Yaqupni Öziningki bolushqa,
Israilni Öz mirasi bolushqa talliwaldi.
5Chünki özüm bilimenki, Perwerdigar ulughdur;
Rebbimiz barliq ilahlardin üstündur.
6Perwerdigar néme ishni muwapiq körgen bolsa,
U asmanlarda,
Zéminda,
Déngizlarda hem uning barliq tegliridimu shuni qilghandur.
7U yer chetliridin bulut-tumanlarni örlitidu;
Yamghurlargha chaqmaqlarni hemrah qilidu;
Shamalni Öz xeziniliridin chiqiridu.
8U Misirdiki tunji oghullarni halak qildi,
Insanlarning bolsun, haywanlarning bolsun hemmini urup halak qildi.
9U alametlerni, möjizilerni aranglargha ewetti, i Misir;
Pirewn we uning hemme qulliri üstige ewetti.
10U ulugh ellerni uruwetti,
Qudretlik padishahlarni öltürüwetti;
11Amoriylarning padishahi Sihonni,
Bashanning padishahi Ogni,
Qanaandiki barliq padishahliqlarni uruwetti.
12Ularning zéminini miras qilip,
Öz xelqi Israilgha miras bolushqa teqdim qildi.
13Séning naming, Perwerdigar, menggüge,
Shöhret-xatireng dewrdin-dewrgichidur.
14Chünki Perwerdigar Öz xelqining dewasini soraydu;
Öz qullirigha rehim qilidu.
15Ellerning butliri bolsa peqetla kümüsh-altundin ibarettur,
Ularni insanning qolliri yasighandur, xalas.
16Ularning aghzi bar, biraq sözlimeydu;
Közliri bar, biraq körmeydu;
17Qulaqliri bar, biraq anglimaydu,
Aghzida héch nepes yoqtur.
18Ularni yasighanlar ulargha oxshap qalidu,
Ulargha tayan’ghanlarmu shundaqtur.
19Israil jemeti, Perwerdigargha teshekkür-medhiye qayturunglar;
Harun jemeti, Perwerdigargha teshekkür-medhiye qayturunglar;
20Lawiy jemeti, Perwerdigargha teshekkür-medhiye qayturunglar;
Perwerdigardin qorqidighanlar, Perwerdigargha teshekkür-medhiye qayturunglar!
21Yérusalémda makanlashqan Perwerdigargha Ziondin teshekkür-medhiye éytilsun!
Hemdusana!