1Dawut yazghan küy: —

Perwerdigargha atap yéngi naxsha éytinglar;

Chünki U karamet möjizilerni yaratti;

Uning ong qoli hem muqeddes biliki

Özige zeper-nijat keltürdi.

2Perwerdigar Öz nijatliqini ayan qildi;

Heqqaniyitini ellerning köz aldida ashkara körsetti.

3U Israil jemetige bolghan méhir-muhebbitini hem heqiqet-sadaqitini ésige aldi,

Zéminning chet-yaqilirimu Xudayimizning nijatliqini kördi.

4Perwerdigargha awazinglarni kötürünglar, pütkül yer yüzi;

Tentene qilip awazinglarni kötürünglar, naxsha éytinglar!

5Perwerdigargha chiltar chélip naxsha éytinglar,

Chiltar bilen, küyning sadasi bilen!

6Kanay hem sunay awazliri bilen,

Padishah bolghan Perwerdigar aldida tentene qilinglar;

7Déngiz-okyan hem uninggha tolghan hemme jush urup,

Jahan hem uningda yashawatqanlar shawqunlisun!

8Kelkün-tashqinlar chawak chalsun;

Perwerdigar aldida taghlar qoshulup tentene qilip naxsha éytsun;

9Chünki mana, U yerni soraq qilishqa kélidu;

U alemni adilliq bilen,

Xelqlerni Öz heqiqet-sadaqitide soraq qilidu.