Muⱪeddes Kalam (yǝngi yeziⱪ)

Ayal, oƣul bala wǝ ǝjdiⱨa
1U qaƣda, ǝrxtǝ ajayip bir karamǝt pǝyda boldi — u ⱪuyaxni yepinqaⱪliƣan, putlirining astida ay, bexida on ikki yultuzluⱪ taj bar bir ayal idi. 2U ⱨamilidar bolup, tolƣaⱪ yǝp tuƣux azabida dad-pǝryad kɵtürdi. 3Andin ǝrxtǝ yǝnǝ bir alamǝt kɵründi — mana, yǝttǝ baxliⱪ, on münggüzlük, yǝttǝ bexida yǝttǝ taj bar bolƣan qong bir ⱪizil ǝjdiⱨa turatti. 4U ⱪuyruⱪi bilǝn asmandiki yultuzlarning üqtin birini süpürüp, ularni yǝr yüzigǝ qɵrüwǝtti. Əjidiⱨa tuƣay dǝp ⱪalƣan ayal yǝnggigǝn ⱨaman uning balisini yalmap yutuwǝtmǝkqi bolup uning aldida turdi. 5Ayal bir bala, yǝni pütün ǝllǝrni tɵmür ⱨasisi bilǝn padiqidǝk baⱪidiƣan bir oƣul tuƣdi. Bala bolsa Hudaning wǝ Uning tǝhtining aldiƣa ƣaqqidǝ elip qiⱪildi. 6Ayal qɵlgǝ ⱪaqti; u yǝrdǝ uning 1260 kün beⱪilixi üqün uningƣa Huda tǝripidin ⱨazirlap ⱪoyulƣan bir jay bar idi.
7Andin ǝrxtǝ jǝng boldi. Bax pǝrixtǝ Mikail wǝ uning pǝrixtiliri ǝjdiⱨa bilǝn jǝng ⱪilƣili turdi; ǝjdiⱨamu ɵz pǝrixtiliri bilǝn ularƣa etildi. 8Lekin u üstünlük ⱪazinalmidi, uningƣa wǝ pǝrixtilirigǝ ǝrxtǝ turuxⱪa orun ⱪalmidi. 9Xuning bilǝn zor ǝjdiⱨa, yǝni Iblis wǝ Xǝytan dǝp atalƣan, pütün jaⱨanni azdurƣuqi ⱨeliⱪi ⱪǝdimiy yilan yǝr yüzigǝ taxlandi. Uning pǝrixtilirimu uning bilǝn tǝng taxlandi.
10Andin mǝn ǝrxtǝ yuⱪiri bir awazning mundaⱪ degǝnlikini anglidim: —
«Kǝldi Hudayimizning nijatliⱪi, ⱪudriti, padixaⱨliⱪi wǝ Uning Mǝsiⱨining ⱨoⱪuⱪi!
Qünki ⱪerindaxlirimizning üstidin Hudayimizning aldida keqǝ-kündüz xikayǝt ⱪilip turƣan xikayǝt ⱪilƣuqi ǝrxtin taxliwetildi;
11ⱪerindaxlar uning üstidin Ⱪozining ⱪeni wǝ ularning guwaⱨliⱪ sɵzi bilǝn ƣalib kǝldi;
Ular ⱨǝtta ɵlümni kɵzigǝ ilmay ɵz jenini ǝziz kɵrmidi.
12Xuning üqün, xadlininglar, ǝy ǝrxlǝr wǝ ularda turuwatⱪalar!
Lekin ⱨalinglarƣa way, ǝy yǝr wǝ dengizlar!
Qünki Iblis üstünglarƣa qüxti;
Waⱪtining az ⱪalƣanliⱪini bilgǝq,
Ƣǝzǝp-ⱪǝⱨri bilǝn kǝldi!».
13Əjdiⱨa ɵzining yǝr yüzigǝ taxlanƣanliⱪini kɵrüp, oƣul balini tuƣⱪan ayalni ⱪoƣlaxⱪa baxlidi. 14Ayalning yilanning yüzidin daldilinixi, qɵldǝ ɵzi üqün ⱨazirlanƣan makaniƣa beripbir mǝzgil, ikki mǝzgil wǝ yerim mǝzgil beⱪilsun dǝp xu yǝrgǝ uqup ketixi üqün, uningƣa yoƣan bir bürkütning ikki ⱪaniti berildi.   15Andin yilan ayalning arⱪisidin aƣzi bilǝn dǝryadǝk su pürküp, uni sǝl bilǝn eⱪitip yoⱪatmaⱪqi boldi. 16Lekin zemin ayalƣa yardǝm ⱪilip, aƣzini eqip, ǝjdiⱨa aƣzidin pürküp qiⱪarƣan dǝryani yutuwǝtti. 17Buning bilǝn ǝjdiⱨaning ayalƣa ⱪattiⱪ ƣǝzipi kelip, uning ⱪalƣan nǝsli, yǝni Hudaning ǝmrlirigǝ ǝmǝl ⱪilip, Əysaning guwaⱨliⱪini tutⱪan pǝrzǝntliri bilǝn jǝng ⱪilƣili kǝtti; u dengiz saⱨili üstidǝ turatti.

□12:2 «U (ayal) ⱨamilidar bolup, tolƣaⱪ yǝp tuƣux azabida dad-pǝryad kɵtürdi...» — ayal toƣruluⱪ üq pikir bar; u yaki (1) jamaǝtni; yaki (2) büwi Mǝryǝm; yaki (3) Israilni bildüridu. Bizning uning Israilni bildüridiƣanliⱪiƣa ⱪilqǝ gumanimiz yoⱪ. Ⱨǝzriti Yüsüpning Tǝwrat, «Yaritilix» 37-babta hatirilǝngǝn qüxini kɵrüng. «Ayal» jamaǝt boluxi mumkin ǝmǝs, qünki «ayal» Mǝsiⱨni tuƣidu (5-ayǝt). 12:17nimu kɵrüng.

□12:4 «U (ǝjdiⱨa) ⱪuyruⱪi bilǝn asmandiki yultuzlarning üqtin birini süpürüp, ularni yǝr yüzigǝ qɵrüwǝtti...» — bu wǝⱨiy bizningqǝ Xǝytanning ǝslidǝ ǝrxtǝ Hudaƣa ⱪarxi kɵtürgǝn isyanini kɵrsitidu. Bundaⱪ xǝrⱨ toƣra bolsa, pǝrixtilǝrning üqtin biri isyanƣa ⱪoxulup ⱨazirⱪi jinlar bolup qiⱪⱪan.

■12:5 Zǝb. 2:9; Wǝⱨ. 2:27.

■12:6 Wǝⱨ. 11:3.

□12:7 «Bax pǝrixtǝ Mikail» — bax pǝrixtǝ Mikailning Israil hǝlⱪini ⱪoƣdax üqün alaⱨidǝ mǝs’uliyiti bar («Dan.» 10:13, 21, 12:1 wǝ «Yǝⱨ.» 9ni kɵrüng).

■12:8 Dan. 2:35.

■12:9 Luⱪa 10:18; Wǝⱨ. 20:2.

■12:12 Zǝb. 96:11; Yǝx. 49:13; Wǝⱨ. 8:13.

□12:14 «bir mǝzgil, ikki mǝzgil, wǝ yerim mǝzgil» — 1260 kün, tǝhminǝn üq yerim yil. «Dan.» 7:25, 12:7ni, izaⱨatliri wǝ «Daniyal»diki «ⱪoxumqǝ sɵz»nimu kɵrüng.

■12:14 Wǝⱨ. 2:6.

□12:17 «Əysaning guwaⱨliⱪini tutⱪan pǝrzǝntliri» — yaki Əysa toƣruluⱪ guwaⱨliⱪ beridiƣanlar, yaki U Ɵzi bǝrgǝn guwaⱨliⱪni qing tutⱪanlarni kɵrsitidu. Bizningqǝ awwalⱪisi toƣra.