144-küy •••• Padixaⱨning nijatliⱪi — hǝlⱪning bǝhti
1Dawut yazƣan küy: —
Ⱪollirimƣa jǝng ⱪilixni,
Barmaⱪlirimƣa uruxni ɵgitidiƣan,
Mening Ⱪoram Texim Pǝrwǝrdigarƣa tǝxǝkkür-mǝdⱨiyǝ ⱪayturulsun!
2Mening ɵzgǝrmǝs xǝpⱪitim wǝ mening ⱪorƣinim,
Mening egiz munarim wǝ nijatkarim,
Mening ⱪalⱪinim wǝ tayanƣinim, mǝn Uningdin ⱨimayǝ tapimǝn;
U Ɵz hǝlⱪimni ⱪol astimda boysundurƣuqidur!
3I Pǝrwǝrdigar, Sǝn uningdin hǝwǝr alidikǝnsǝn, adǝm degǝn zadi nemǝ?
Uning toƣruluⱪ oylaydikǝnsǝn, insan balisi degǝn nemǝ?
4Adǝm bolsa bir nǝpǝsturla, halas;
Uning künliri ɵtüp ketiwatⱪan bir kɵlǝnggidur, halas.
5I Pǝrwǝrdigar, asmanlarni egildürüp qüxkǝysǝn;
Taƣlarƣa tegip ulardin is-tütǝk qiⱪarƣaysǝn;
6Qaⱪmaⱪlarni qaⱪⱪuzup ularni tarⱪitiwǝtkǝysǝn;
Oⱪliringni etip ularni ⱪiyⱪas-sürǝngǝ salƣaysǝn;
7Yuⱪiridin ⱪolliringni uzitip,
Meni azad ⱪilƣaysǝn;
Meni uluƣ sulardin,
Yaⱪa yurttikilǝrning qanggilidin qiⱪarƣaysǝn.
8Ularning aƣzi ⱪuruⱪ gǝp sɵzlǝydu,
Ong ⱪoli aldamqi ⱪoldur.
9I Huda, mǝn Sanga atap yengi nahxa eytimǝn;
Ontarƣa tǝngkǝx bolup Sanga küylǝrni eytimǝn.
10Sǝn padixaⱨlarƣa nijatliⱪ-ƣǝlibǝ beƣixlaysǝn;
Ⱪulung Dawutni ǝjǝllik ⱪiliqtin ⱪutuldurisǝn.
11Meni ⱪutuldurƣaysǝn, yat yurttikilǝrning ⱪolidin azad ⱪilƣaysǝn;
Ularning aƣzi ⱪuruⱪ gǝp sɵzlǝydu,
Ong ⱪoli aldamqi ⱪoldur.
12Xundaⱪ ⱪilip oƣullirimiz yaxliⱪida puhta yetilgǝn kɵqǝtlǝrgǝ ohxaydu,
Ⱪizlirimiz ordiqǝ nǝⱪixlǝngǝn tüwrüklǝrdǝk bolidu;
13Axliⱪ ambarlirimiz toldurulup,
Türlük-türlük ozuⱪlar bilǝn tǝminlǝydiƣan,
Ⱪoylirimiz otlaⱪlirimizda minglap, tümǝnlǝp ⱪozilaydiƣan;
14Kalilirimiz boƣaz bolidiƣan;
Ⱨeqkim besip kirmǝydiƣan, ⱨeqkim jǝnggǝ qiⱪmaydiƣan;
Koqilirimizda ⱨeq jedǝl-ƣowƣa bolmaydiƣan;
15Əⱨwali xundaⱪ bolƣan hǝlⱪ nemidegǝn bǝhtliktur!
Hudasi Pǝrwǝrdigar bolƣan hǝlⱪ bǝhtliktur!