Muⱪeddes Kalam (yǝngi yeziⱪ)

102-küy
1Ezilgǝnning duasi: U ⱨalidin kǝtkǝndǝ, dad-pǝryadini Pǝrwǝrdigar aldiƣa tɵkkǝndǝ: —
Duayimni angliƣaysǝn, i Pǝrwǝrdigar;
Pǝryadim aldingƣa yetip kirsun!
2Yüzüngni mǝndin ⱪaqurmiƣaysǝn;
Ⱪisilƣan künümdǝ manga ⱪulaⱪ salƣaysǝn;
Mǝn nida ⱪilƣan kündǝ, manga tez jawab bǝrgin!
3Mana, künlirim is-tütǝktǝk tügǝp ketidu,
Ustihanlirim otun-qoƣlarƣa ohxax kɵydi!
4Yürikim zǝhmǝ yǝp qɵplǝr hazan bolƣandǝk ⱪurup kǝtti,
Ⱨǝtta nenimni yeyixni untudum.
5Mǝn aⱨu-zar tartⱪanliⱪimdin,
Ətlirim süngǝklirimgǝ qaplixip ⱪaldi.
6Qɵl-bayawandiki saⱪiyⱪuxtǝk,
Wǝyranqiliⱪta ⱪonup yürgǝn ⱨuwⱪuxⱪa ohxaymǝn.
7Uhlimay sǝgǝk turup kɵzǝttimǝn;
Ɵgzidǝ yalƣuz ⱪalƣan ⱪuxⱪaq kǝbimǝn.
8Düxmǝnlirim kün boyi meni mǝshirǝ ⱪilmaⱪta,
Meni ⱨaⱪarǝtligǝnlǝr ismimni lǝnǝt ornida ixlǝtmǝktǝ.
9-10Ⱪǝⱨring ⱨǝm aqqiⱪing tüpǝylidin,
Külni nan dǝp yǝwatimǝn,
Iqimlikimni kɵz yexim bilǝn arilaxturimǝn;
Qünki Sǝn meni kɵtürüp, andin yǝrgǝ urdung.
11Künlirim ⱪuyax uzartⱪan kɵlǝnggidǝk yoⱪulay dǝp ⱪaldi,
Ɵzüm bolsam qɵplǝr hazan bolƣandǝk ⱪurup kǝttim.
12Lekin Sǝn, Pǝrwǝrdigar, ǝbǝdiy turisǝn,
Sening nam-xɵⱨriting dǝwrdin-dǝwrgiqidur.
13Sǝn ornungdin turisǝn,
Zionƣa rǝⱨim ⱪilisǝn;
Qünki uningƣa xǝpⱪǝt kɵrsitix waⱪti kǝldi,
Ⱨǝ, waⱪit-saiti yetip kǝldi!
14Qünki ⱪulliring uning taxliridin hursǝnlik tapidu,
Ⱨǝm tupriⱪiƣimu iqini aƣritidu;
15Əllǝr Pǝrwǝrdigarning namidin,
Yǝr yüzidiki xaⱨlar xan-xǝripingdin ǝyminidu.
16Mana, Pǝrwǝrdigar Zionni ⱪaytidin ⱪurƣanda,
U Ɵz xan-xǝripidǝ kɵrünidu!
17U ƣerib-miskinning duasiƣa etibar beridu;
Ularning duasini ⱨǝrgiz kǝmsitmǝydu.
18Bular kǝlgüsi bir ǝwlad üqün hatirilinidu;
Xuning bilǝn kǝlgüsidǝ yaritilidiƣan bir hǝlⱪ Yaⱨni mǝdⱨiyǝlǝydu;
19-20Qünki U ǝsirlǝrning aⱨ-zarlirini anglay dǝp,
Ɵlümgǝ buyrulƣanlarni azad ⱪilay dǝp,
Egizdiki muⱪǝddǝs jayidin engixip nǝzǝr saldi,
Ərxlǝrdin Pǝrwǝrdigar yǝrgǝ ⱪaridi;
21-22Xundaⱪ ⱪilip, ular Pǝrwǝrdigarning hizmitidǝ bolayli degǝndǝ,
Yǝni ǝl-mǝmlikǝtlǝr jǝm yiƣilƣan waⱪtida —
Pǝrwǝrdigarning nami Zionda,
Uning xǝrǝpliri Yerusalemda jakarlinidu!
23Biraⱪ U meni yolda maƣdursizlandurup,
Künlirimni ⱪisⱪartti.
24Mǝn: «Tǝngrim, ɵmrümning yerimida meni elip kǝtmǝ!» — dedim.
— «Sening yilliring dǝwrdin dǝwrgiqidur,
25Sǝn yǝrni ǝlmisaⱪtinla bǝrpa ⱪilƣansǝn,
Asmanlarni ⱨǝm ⱪolliring yasiƣandur;
26Ular yoⱪ bolup ketidu,
Biraⱪ Sǝn dawamliⱪ turiwerisǝn;
Ularning ⱨǝmmisi kiyimdǝk konirap ketidu;
Ularni kona ton kǝbi almaxtursang,
Xunda ular kiyim-keqǝk yǝnggüxlǝngǝndǝk yǝnggüxlinidu.
27Biraⱪ Sǝn ɵzgǝrmigüqidursǝn,
Yilliringning tamami yoⱪtur.
28Ⱪulliringning balilirimu turiweridu,
Ularning ǝwladi ⱨuzuringda mǝzmut yaxaydu!».

■102:3 Zǝb. 37:20

□102:11 «Künlirim ⱪuyax uzartⱪan kɵlǝnggidǝk yoⱪulay dǝp ⱪaldi» — «ⱪuyax uzartⱪan kɵlǝnggidǝk» — ⱪuyax patⱪanda, kɵlǝnggilǝr uzirap, andin tuyuⱪsiz ƣayip bolidu.

□102:18 «Bular kǝlgüsi bir ǝwlad üqün hatirilinidu; xuning bilǝn kǝlgüsidǝ yaritilidiƣan bir hǝlⱪ Yaⱨni mǝdⱨiyǝlǝydu» — «Zǝb.» 22:30-31ni, «Yǝx.» 53:10ni kɵrüng.

□102:24 «Sening yilliring dǝwrdin dǝwrgiqidur...» — 24-28-ayǝtlǝrdiki sɵzlǝrni («Sening yilliring...» degǝn sɵzlǝrdin baxlap) Hudaning ⱪulining Hudaƣa eytⱪini ǝmǝs, bǝlki Hudaning Ɵz ⱪulining iltijasiƣa bǝrgǝn jawabi dǝp ⱪaraymiz. Ayǝtlǝrning baƣlinix jǝⱨǝtliridin xundaⱪ ⱪariduⱪ. Kona grekqǝ tǝrjimisidiki (LXXdiki) ⱪaraxmu xundaⱪ. Xunga bu sɵzlǝr Dawutning ǝwladi bolƣan Mǝsiⱨkǝ eytilƣan, dǝp ⱪaraymiz. Injil, «Ibr.» 1-babnimu kɵrüng. (Miladiyǝdin ilgiriki 3-ǝsirdǝ, Grek imperiyǝsidǝ tarilip kǝtkǝn kɵp Yǝⱨudiylar ibraniy tilini bilmǝytti. Ular Tǝwratni oⱪuyalmiƣaqⱪa, xu qaƣda ularni dǝp, Tǝwratning bir Grekqǝ tǝrjimisi ixlǝngǝn. Bu tǝrjimǝ «Sǝptuagint» deyilidu (ⱪisⱪiqǝ LXX)).