86-küy •••• Yalƣuzluⱪta, ⱪiynalƣan kündǝ xapaǝt tilǝx
1Dawutning duasi:
Ⱪuliⱪingni mǝn tǝrǝpkǝ tutⱪin, i Pǝrwǝrdigar, manga jawab bǝrgǝysǝn;
Qünki mǝn ezilgǝn wǝ ⱨajǝtmǝndurmǝn.
2Jenimni saⱪliƣaysǝn,
Qünki mǝn Sanga mɵmindurmǝn;
I Sǝn Hudayim, Sanga tayanƣan ⱪulungni ⱪutⱪuzƣaysǝn;
3Manga meⱨir-xǝpⱪǝt kɵrsǝtkǝysǝn, i Rǝb,
Qünki mǝn kün boyi Sanga nida ⱪilimǝn.
4Ⱪulungning jenini xad ⱪilƣin,
Qünki jenim Sanga tǝlmürüp ⱪaraydu;
5Qünki Sǝn Rǝb, meⱨriban, kǝqürümqan Sǝn!
Ɵzǝnggǝ iltija ⱪilƣanlarning ⱨǝmmisigǝ zor meⱨir-muⱨǝbbǝt kɵrsǝtküqidursǝn!
6Mening duayimƣa ⱪulaⱪ salƣin, i Pǝrwǝrdigar,
Yelinixlirimning sadasini angliƣaysǝn;
7Beximƣa kün qüxkǝndǝ,
Mǝn Sanga iltija ⱪilimǝn,
Qünki Sǝn manga jawab berisǝn.
8Ilaⱨlar arisida Sening tǝngdixing yoⱪtur, i Rǝb;
Ⱪilƣan ixliringningmu tǝngdixi yoⱪtur.
9Sǝn yaratⱪan barliⱪ ǝllǝr kelip sening aldingda sǝjdǝ ⱪilidu, i Rǝb,
Namingni uluƣlaydu.
10Qünki Sǝn naⱨayiti büyüksǝn,
Mɵjizilǝrni Yaratⱪuqidursǝn;
Sǝn Hudadursǝn, yalƣuz Sǝnla.
11Ɵz yolungni manga ɵgǝtkǝysǝn, i Pǝrwǝrdigar,
Wǝ Sening ⱨǝⱪiⱪitingdǝ yürimǝn;
Namingƣa ⱨɵrmǝt-ǝyminixtǝ boluxum üqün, ⱪǝlbimni pütün ⱪilƣaysǝn.
12Ya Rǝbbim Huda, pütün ⱪǝlbim bilǝn Seni mǝdⱨiyilǝymǝn,
Əbǝdil’ǝbǝd namingni uluƣlaymǝn.
13Qünki manga bolƣan meⱨir-muⱨǝbbiting zordur,
Sǝn tǝⱨtisaraning tǝgliridin jenimni ⱪutⱪuzisǝn;
14I Huda, tǝkǝbburlar manga ⱪarxi kɵtürüldi,
Əxǝddiylǝrning jamaiti jenimni izdimǝktǝ,
Ular Seni nǝzirigǝ almǝydu!
15Əmma Sǝn, Rǝb, rǝⱨimdil wǝ xǝpⱪǝtlik Ilaⱨsǝn,
Asanliⱪqǝ aqqiⱪlanmaysǝn,
Meⱨir-muⱨǝbbǝt ⱨǝm ⱨǝⱪiⱪǝt-sadiⱪliⱪing texip turidu.
16Mǝn tǝrǝpkǝ burulup, xǝpⱪǝt kɵrsǝtkǝysǝn;
Ɵz ⱪulungƣa küqüngni bǝrgǝysǝn,
Dedikingning oƣlini ⱪutⱪuzƣaysǝn!
17Manga ɵqmǝnlǝrning uni kɵrüp hijil boluxi üqün,
Iltipatingni kɵrsitidiƣan bir alamǝtni manga kɵrsǝtkin;
Qünki Sǝn Pǝrwǝrdigar, manga yardǝm ⱪilding,
Manga tǝsǝlli berip kǝlgǝnsǝn.