69-küy •••• Zor dǝrd-ǝlǝm wǝ azablardin keyinki ƣǝlibǝ
1Nǝƣmiqilǝrning bexiƣa tapxurulup, «Nilupǝrlǝr» degǝn aⱨangda oⱪulsun dǝp, Dawut yazƣan küy: —
Meni ⱪutⱪuzƣaysǝn, i Huda!
Sular jenimdin ɵtti;
2Turƣudǝk jay yoⱪ qongⱪur patⱪaⱪliⱪⱪa qɵküp kǝttim;
Suning qongⱪur yerigǝ qüxüp kǝttim,
Kǝlkün meni ƣǝrⱪ ⱪildi.
3Pǝryadlirimdin ⱨalimdin kǝttim;
Gallirim ⱪurup kǝtti;
Hudayimƣa tǝlmürüp, kɵzümdin ketǝy dǝp ⱪaldim;
4Sǝwǝbsiz manga ɵq bolƣanlar qaqlirimdinmu kɵptur;
Meni yoⱪatmaⱪqi bolƣanlar,
Ⱪara qaplap mǝn bilǝn düxmǝnlixidiƣanlar küqlüktur;
Xu qaƣda ɵzüm bulimiƣan nǝrsini ⱪayturimǝn.
5I Huda, mening nadanliⱪim ɵzünggǝ ayan;
Mening ⱪǝbiⱨliklirim Sǝndin yoxurun ǝmǝstur.
6Mening sǝwǝbimdin, i Rǝb, samawiy ⱪoxunlarning Sǝrdari bolƣan Pǝrwǝrdigar,
Ɵzünggǝ umid baƣlap kütkǝnlǝr yǝrgǝ ⱪarap ⱪalmiƣay;
I Israilning Hudasi, Ɵzüngni izdigüqilǝr mening sǝwǝbimdin xǝrmǝndǝ bolmiƣay;
7Qünki Seni dǝp mǝn rǝswaqiliⱪⱪa uqridim;
Xǝrmǝndilik yüzümgǝ qaplandi.
8Mǝn ɵz ⱪerindaxlirimƣa yat,
Anamning baliliriƣa yaⱪa yurtluⱪ boldum.
9Qünki meni muⱪǝddǝs ɵyünggǝ bolƣan otluⱪ muⱨǝbbǝt qulƣuwalƣanidi;
Sanga ⱨaⱪarǝt ⱪilƣanlarning ⱨaⱪarǝtlirimu mening üstümgǝ qüxti;
10Mǝn yiƣlidim, jenim roza tutti,
Bumu manga ǝyib dǝp ⱪaraldi.
11Mǝn bɵzni kiyimim ⱪilip kiysǝm,
Xuning bilǝn ularning sɵz-qɵqikigǝ ⱪaldim.
12Xǝⱨǝr ⱪowuⱪida olturƣanlarning tǝnǝ gepigǝ ⱪaldim,
Mǝyhorlarning nahxisining temisi boldum.
13Biraⱪ mǝn xǝpⱪitingni kɵrsǝtkǝn waⱪtingda duayimni sanga nixanlidim, i Pǝrwǝrdigar;
I Huda, ɵzgǝrmǝs muⱨǝbbitingning zorluⱪidin,
Nijatliⱪ ixǝnqidǝ manga jawab bǝrgǝysǝn;
14Meni patⱪaⱪliⱪtin ⱪutⱪuzuwalƣaysǝn,
Meni qɵktürmigǝysǝn;
Manga ɵqmǝn bolƣanlardin,
Suning qongⱪur yeridin ⱪutuldurƣaysǝn;
15Kǝlkün suliriƣa meni ƣǝrⱪ ⱪildurmiƣaysǝn;
Dengiz tǝglirigimu meni yutⱪuzmiƣaysǝn;
Tegi yoⱪ ⱨangning meni ⱨap etip aƣzini yumuwelixiƣa yol ⱪoymiƣaysǝn!
16Duayimni ijabǝt ⱪilƣaysǝn, i Pǝrwǝrdigar,
Qünki ɵzgǝrmǝs muⱨǝbbiting yahxidur;
Mol rǝⱨimdilliⱪing bilǝn manga yüzlǝngǝysǝn;
17Jamilingni ⱪulungdin yoxurmiƣaysǝn;
Qünki beximƣa kün qüxti;
Tezdin manga jawab bǝrgǝysǝn.
18Jenimƣa yeⱪinlaxⱪaysǝn,
Uningƣa ⱨǝmjǝmǝt-ⱪutⱪuzƣuqi bolƣaysǝn;
Düxmǝnlirim aldida meni ⱨɵrlükkǝ qiⱪarƣaysǝn;
19Ɵzüng mening rǝswaliⱪta ⱨǝm ⱨɵrmǝtsizliktǝ ⱪalƣinimni,
Ⱪandaⱪ ⱨaⱪarǝtlǝnginimni bilisǝn;
Rǝⱪiblirimning ⱨǝmmisi Ɵzünggǝ ayandur.
20Ⱨaⱪarǝt ⱪǝlbimni parǝ ⱪildi;
Mǝn ⱪayƣuƣa qɵmüp kǝttim;
Azƣinǝ ⱨesdaxliⱪⱪa tǝlmürgǝn bolsammu, yoⱪ boldi;
Tǝsǝlli bǝrgüqilǝrnimu izdidim, lekin birsinimu uqritalmidim.
21Bǝrⱨǝⱪ, ular ozuⱪumƣa ɵt süyi,
Ussuzluⱪumƣa sirkini bǝrdi.
22Ularning dastihini ɵzlirigǝ ⱪiltaⱪ,
Ularning ⱨalawiti ⱪapⱪan bolƣay.
23Kɵzliri torlixip kɵrmǝydiƣan bolup kǝtkǝy;
Bǝl-putlirini titrǝkkǝ salƣaysǝn;
24Ⱪǝⱨringni ularning üstigǝ qüxürgǝysǝn,
Ƣǝzipingning otliri ularƣa tutaxⱪay;
25Ularning makani harabǝ bolƣay,
Qedirliri qɵldǝrǝp ⱪalƣay;
26Qünki ular Sǝn urƣanƣa tehimu ziyankǝxlik ⱪilmaⱪta;
Sǝn zǝhimlǝndürgǝnlǝrning azabiƣa gǝp bilǝn azab ⱪoxmaⱪta.
27Ularning gunaⱨiƣa gunaⱨ ⱪoxⱪaysǝn,
Ⱨǝⱪⱪaniyliⱪingning nesiwisigǝ ularni erixtürmigǝysǝn.
28Ular ⱨayatliⱪ dǝptiridin ɵqürülgǝy;
Ⱨǝⱪⱪaniylarning ⱪatariƣa pütülmigǝy.
29Biraⱪ mǝn bolsam bir ezilgǝn dǝrdmǝn;
Nijatliⱪing, i Huda, meni yuⱪiriƣa kɵtürüp ⱪutⱪuzƣay;
30Mǝn munajat oⱪup Hudaning namini mǝdⱨiyilǝymǝn;
Tǝxǝkkürlǝr bilǝn uni uluƣlaymǝn;
31Bu bolsa Pǝrwǝrdigarni hursǝn ⱪilix üqün,
Ɵküz tǝⱪdim ⱪilƣandin ǝwzǝldur;
Münggüz-tuyaⱪliri saⱪ torpaⱪ bǝrgǝndinmu artuⱪtur.
32Yawax mɵminlǝr buni kɵrüp huxal bolidu;
Hudani izdigǝnlǝr —
Ⱪǝlbinglar yengilinidu.
33Qünki Pǝrwǝrdigar yoⱪsullarning iltijasini anglaydu,
Ɵzigǝ tǝwǝ ǝsir ⱪilinƣanlarni u kǝmsitmǝydu;
34Asman-zemin Uni mǝdⱨiyilisun!
Dengiz-okyanlar ⱨǝm ularda yürgüqi barliⱪ janiwarlar Uni mǝdⱨiyiligǝy!
35Qünki Huda Zionni ⱪutⱪuzidu;
Yǝⱨudaning xǝⱨǝrlirini ⱪayta bina ⱪilidu;
Ular axu yǝrdǝ olturaⱪlixip, igilik tiklǝydu.
36Uning ⱪullirining nǝsilliri uningƣa miras bolidu,
Uning namini sɵygǝnlǝr u yǝrlǝrdǝ makanlixidu.