55-küy •••• Satⱪunluⱪⱪa uqriƣanning dǝrd-ǝlǝmlirini tɵküx duasi
1Nǝƣmiqilǝrning bexiƣa tapxurulup, tarliⱪ sazlar bilǝn oⱪulsun dǝp, Dawut yazƣan «Masⱪil»: —
I Huda, duayimni angliƣaysǝn;
Tilikimdin ɵzüngni ⱪaqurmiƣaysǝn,
2Manga ⱪulaⱪ selip, jawab bǝrgǝysǝn;
Mǝn dad-pǝryad iqidǝ kezip,
Aⱨ-zar qekip yürimǝn;
3Sǝwǝbi düxmǝnning tǝⱨditliri, rǝzillǝrning zulumliri;
Ular beximƣa awariqiliklǝrni tɵkidu;
Ular ƣǝzǝplinip manga adawǝt saⱪlaydu.
4Iqimdǝ yürikim tolƣinip kǝtti;
Ɵlüm wǝⱨxǝtliri wujudumni ⱪaplidi.
5Ⱪorⱪunq wǝ titrǝk beximƣa qüxti,
Dǝⱨxǝt meni qɵmküwaldi.
6Mǝn: — «Kǝptǝrdǝk ⱪanitim bolsiqu kaxki,
Uqup berip aramgaⱨ tapar idim» — dedim.
7— «Yiraⱪ jaylarƣa ⱪeqip,
Qɵl-bayawanlarda makanlixar idim;
Selaⱨ.
8Boran-qapⱪunlardin,
Ⱪara ⱪuyundin ⱪeqip, panaⱨgaⱨƣa aldirar idim!».
9Ularni yutuwǝtkǝysǝn, i Rǝb;
Tillirini bɵlüwǝtkǝysǝn;
Qünki xǝⱨǝr iqidǝ zorawanliⱪ ⱨǝm jedǝlhorluⱪni kɵrdüm.
10Ular keqǝ-kündüz sepillǝr üstidǝ ƣadiyip yürmǝktǝ;
Xǝⱨǝr iqini ⱪabaⱨǝt wǝ xumluⱪ ⱪaplidi.
11Ⱨaram arzu-ⱨǝwǝslǝr uning iqidǝ turidu,
Sahtiliⱪ wǝ ⱨiylǝ-mikirlik, koqilardin kǝtmǝydu.
12Əgǝr düxmǝn meni mǝshirǝ ⱪilƣan bolsa, uningƣa sǝwr ⱪilattim;
Biraⱪ meni kǝmsitip, ɵzini mahtiƣan adǝm manga ɵqmǝnlǝrdin ǝmǝs idi;
Əgǝr xundaⱪ bolƣan bolsa, uningdin ɵzümni ⱪaqurattim;
13Lekin buni ⱪilƣan sǝn ikǝnlikingni — Mening buradirim, sirdixim, ǝziz dostum bolup qiⱪixingni oylimaptimǝn!
14Halayiⱪⱪa ⱪetilip, Hudaning ɵyigǝ ikkimiz billǝ mangƣaniduⱪ,
Ɵzara xerin paranglarda bolƣaniduⱪ;
15Muxundaⱪ satⱪunlarni ɵlüm tuyuⱪsiz qɵqitiwǝtsun!
Ular tǝⱨtisaraƣa tirik qüxkǝy!
Qünki ularning makanlirida, ularning arisida rǝzillik turmaⱪta.
16Lekin mǝn bolsam, Hudaƣa nida ⱪilimǝn;
Pǝrwǝrdigar meni ⱪutⱪuzidu.
17Ətigini, ahximi wǝ qüxtǝ,
Dǝrdimni tɵküp pǝryad kɵtürimǝn;
U jǝzmǝn sadayimƣa ⱪulaⱪ salidu.
18U manga ⱪarxi ⱪilinƣan jǝngdin meni aman ⱪilidu;
Gǝrqǝ kɵp adǝmlǝr meni ⱪorxawƣa alƣan bolsimu.
19Tǝngri — ǝzǝldin tǝhttǝ olturup kǝlgüqi!
U nalǝmni anglap ularni bir tǝrǝp ⱪilidu;
(Selaⱨ)
Qünki ularda ⱨeq ɵzgirixlǝr bolmidi;
Ular Hudadin ⱨeq ⱪorⱪmaydu.
20 Ⱨeliⱪi buradirim ɵzi bilǝn dost bolƣanlarƣa muxt kɵtürdi;
Ɵz ǝⱨdisini buzup taxlidi.
21Aƣzi seriⱪ maydinmu yumxaⱪ,
Biraⱪ kɵngli jǝngdur uning;
Uning sɵzliri yaƣdinmu siliⱪ,
Əmǝliyǝttǝ suƣurup alƣan ⱪiliqlardur.
22Yüküngni Pǝrwǝrdigarƣa taxlap ⱪoy,
U seni yɵlǝydu;
U ⱨǝⱪⱪaniylarni ⱨǝrgiz tǝwrǝtmǝydu.
23Biraⱪ, sǝn Huda axu rǝzillǝrni ⱨalakǝt ⱨangiƣa qüxürisǝn;
Ⱪanhorlar wǝ ⱨiyligǝrlǝr ɵmrining yeriminimu kɵrmǝydu;
Biraⱪ mǝn bolsam, sanga tayinimǝn.