51-küy •••• Eƣir gunaⱨ üqün kǝqürüm tilǝx duasi
1Nǝƣmiqilǝrning bexiƣa tapxurulup oⱪulsun dǝp, Dawut yazƣan küy. Bu küy Natan pǝyƣǝmbǝr uning yeniƣa kelip, uni Bat-Xeba bilǝn bolƣan zinahorluⱪi toƣruluⱪ ǝyibligǝndin keyin yezilƣan: —
Ɵzgǝrmǝs muⱨǝbbiting bilǝn, i Huda, manga meⱨir-xǝpⱪǝt kɵrsǝtkǝysǝn!
Rǝⱨimdilliⱪliringning kɵplüki bilǝn asiyliⱪlirimni ɵqürüwǝtkǝysǝn!
2Meni ⱪǝbiⱨlikimdin yiltizimƣiqǝ yuwǝtkǝysǝn,
Gunaⱨimdin meni taziliƣaysǝn.
3Qünki mǝn asiyliⱪlirimni tonup iⱪrar ⱪildim;
Gunaⱨim ⱨǝmixǝ kɵz aldimda turidu.
4Sening aldingda, pǝⱪǝt Sening aldingdila gunaⱨ ɵtküzüp,
Nǝziringdǝ rǝzil bolƣan ixni sadir ⱪildim;
Xu wǝjidin, Sǝn meni ǝyiblǝp sɵzlisǝng, adilliⱪing ispatlinidu;
Meni soraⱪ ⱪilƣiningda, Ɵzüngning pakliⱪi ispatlinidu.
5Mana, mǝn tuƣulƣinimdila, yamanliⱪta idim,
Anamning ⱪarnida pǝyda bolƣinimdila mǝn gunaⱨta boldum.
6Bǝrⱨǝⱪ, Sǝn adǝmlǝrning qin ⱪǝlbidin sǝmimiylik tǝlǝp ⱪilisǝn;
Iqimdiki yoxurun jaylirimda Sǝn manga danaliⱪni bildürisǝn.
7Meni gunaⱨlirimdin zofa bilǝn taziliƣaysǝn,
Ⱨǝm mǝn pak bolimǝn;
Meni pakpakiz yuƣaysǝn, mǝn ⱪardinmu aⱪ bolimǝn.
8Manga xad-huram awazlarni anglatⱪaysǝn;
Xuning bilǝn Sǝn ǝzgǝn ustihanlirim yǝnǝ xadlinidu.
9Gunaⱨlirimdin qirayingni yoxurup,
Yamanliⱪlirimni ɵqüriwǝtkǝysǝn.
10Mǝndǝ pak ⱪǝlb yaratⱪaysǝn, i Huda;
Wujumdiki sadiⱪ roⱨimni yengiliƣaysǝn.
11Meni ⱨuzurungdin qiⱪiriwǝtmigǝysǝn;
Meningdin Muⱪǝddǝs Roⱨingni ⱪayturuwalmiƣaysǝn.
12Aⱨ, nijatliⱪingdiki xadliⱪni manga yengibaxtin ⱨes ⱪildurƣaysǝn;
Itaǝtmǝn roⱨ arⱪiliⱪ meni yɵligǝysǝn.
13Buning bilǝn mǝn itaǝtsizlǝrgǝ yolliringni ɵgitǝy,
Wǝ gunaⱨkarlar yeningƣa ⱪaytidu.
14Ⱪan tɵküx gunaⱨidin meni ⱪutuldurƣaysǝn,
I Huda, manga nijatliⱪ bǝrgüqi Huda,
Xuning bilǝn tilim ⱨǝⱪⱪaniyliⱪingni yangritip küylǝydu.
15I Rǝbbim, lǝwlirimni aqⱪaysǝn,
Aƣzim mǝdⱨiyiliringni bayan ⱪilidu.
16Qünki Sǝn ⱪurbanliⱪni hux kɵrmǝysǝn;
Bolmisa sunar idim;
Kɵydürmǝ ⱪurbanliⱪlardinmu hursǝnlik tapmaysǝn.
17Huda ⱪobul ⱪilidiƣan ⱪurbanliⱪlar sunuⱪ bir roⱨtur;
Sunuⱪ wǝ ezilgǝn ⱪǝlbni Sǝn kǝmsitmǝysǝn, i Huda;
18Xapaiting bilǝn Zionƣa meⱨribanliⱪni kɵrsǝtkǝysǝn;
Yerusalemning sepillirini yengibaxtin bina ⱪilƣaysǝn!
19U qaƣda Sǝn ⱨǝⱪⱪaniyliⱪtin bolƣan ⱪurbanliⱪlardin, kɵydürmǝ ⱪurbanliⱪlardin,
Pütünlǝy kɵydürülgǝn kɵydürmǝ ⱪurbanliⱪlardin hursǝnlik tapisǝn;
U qaƣda adǝmlǝr ⱪurbangaⱨingƣa buⱪa-ɵküzlǝrni tǝⱪdim ⱪilixidu.