44-küy •••• Mǝƣlubiyǝttin keyinki munajat
1Nǝƣmiqilǝrning bexiƣa tapxurulup oⱪulsun dǝp, Koraⱨning oƣulliri üqün yezilƣan «Masⱪil»:—
I Huda, ɵz ⱪulaⱪlirimiz bilǝn angliduⱪ,
Atilirimiz bizgǝ bayan ⱪilip,
Ɵz künliridǝ, yǝni ⱪǝdimki zamanlarda Sening ⱪilƣan zor ixliringni uⱪturƣanidi;
2Sǝn ata-bowilirimizning aldida Ɵz ⱪolung bilǝn yat ǝllǝrni ⱪoƣliwetip,
Ularning zeminiƣa ata-bowilirimizni orunlaxturdung;
Yat ⱪowmlarƣa apǝt qüxürüp, ularni tarⱪitiwǝtting.
3Bǝrⱨǝⱪ, bowilirimiz zeminni ɵz ⱪiliqi bilǝn alƣini yoⱪ,
Ɵz biliki bilǝn ɵzlirini ⱪutⱪuzƣinimu yoⱪ;
Bu bǝlki Sening ong ⱪolung, Sening biliking wǝ jamalingning nurining ⱪilƣinidur;
Qünki Sǝn ulardin hursǝnlik tapting.
4Sǝn Ɵzüng mening padixaⱨimdursǝn, i Huda,
Sǝn Yaⱪup üqün ƣǝlibilǝr buyruƣuqidursǝn.
5Sǝn arⱪiliⱪ biz rǝⱪiblirimizni ⱨǝydiwetimiz;
Naming bilǝn ɵzimizgǝ ⱪarxi turƣanlarni qǝylǝymiz;
6Qünki ɵz oⱪyayimƣa tayanmaymǝn,
Ⱪiliqimmu meni ⱪutⱪuzalmaydu.
7Qünki Sǝn bizni rǝⱪiblirimizdin ⱪutⱪuzdung,
Bizgǝ ɵq bolƣanlarni yǝrgǝ ⱪaratting.
8Hudani kün boyi iptiharlinip mahtaymiz;
Namingni ǝbǝdil’ǝbǝdgiqǝ mǝdⱨiyilǝymiz.
Selaⱨ!
9Biraⱪ Sǝn ⱨazir bizni taxlawetip aⱨanǝtkǝ ⱪaldurdung;
Ⱪoxunlirimiz bilǝn jǝnggǝ billǝ qiⱪmaysǝn.
10Sǝn rǝⱪiblirimiz aldida bizni qekindürdüng;
Bizni ɵqmǝnlǝrgǝ haliƣanqǝ talan-taraj ⱪildurdung.
11Soyuxⱪa tapxurulƣan ⱪoylardǝk, bizni ularƣa tapxurdung,
Əllǝr arisiƣa bizni tarⱪitiwǝtting.
12Sǝn Ɵz hǝlⱪingni bikarƣa setiwǝtting,
Uning ⱪimmitidin Ɵzüng ⱨeq beyip kǝtmiding;
13Sǝn bizni ⱪoxna ǝllǝrning mǝshirisigǝ ⱪaldurƣansǝn;
Ətrapimizdikilǝrgǝ aⱨanǝt, zangliⱪ obyekti ⱪildingsǝn.
14Sǝn bizni ǝllǝr arisida sɵz-qɵqǝkkǝ ⱪoydungsǝn,
Yat ⱪowmlar bizgǝ bax qayⱪixip ⱪaraxmaⱪta.
15-16Mǝshirǝ ⱨǝm kupurluⱪ eytⱪuqilarning awazi tüpǝylidin,
Düxmǝnlǝr wǝ ɵq alƣuqilar tüpǝylidin,
Kün boyi uyatim aldimdin kǝtmǝydu,
Yüzümning nomusi meni qirmiwaldi.
17Mana bularning ⱨǝmmisi beximizƣa qüxti;
Biraⱪ biz Seni untumiduⱪ,
Yaki ǝⱨdǝnggǝ ⱨeq asiyliⱪ ⱪilmiduⱪ;
18Ⱪǝlbimiz ⱨeq yanmidi, Sanga sadaⱪǝtsizlik ⱪilmiduⱪ,
Ⱪǝdǝmlirimiz yolungdin ⱨeq ezip kǝtmidi.
19Biraⱪ Sǝn bizni qilbɵrilǝr makanida ǝzding,
Bizgǝ ɵlüm sayisini qaplaxturdung.
20Əgǝr biz Hudayimizning namini untuƣan bolsaⱪ,
Yaki yat bir ilaⱨⱪa ⱪol kɵtürgǝn bolsaⱪ,
21Huda Sǝn qoⱪum buni sürüxtǝ ⱪilmas idingmu,
Ⱪǝlbtiki sirlarni bilip turidiƣan tursang?
22Biraⱪ Sǝn tüpǝyli biz kün boyi ⱪirilmaⱪtimiz;
Boƣuzlinixni kütüp turƣan ⱪoylar kǝbi ⱨesablanmaⱪtimiz.
23Oyƣan, i rǝb! Nemixⱪa uhlap yatisǝn?
Ornungdin tur, bizni mǝnggügǝ taxlawǝtmigǝysǝn!
24Nemixⱪa yüzüngni bizdin yoxurisǝn?
Nemixⱪa külpǝtlirimizgǝ, uqriƣan zulumlirimizƣa pisǝnt ⱪilmaysǝn?
25Ⱪariƣina, jenimiz tupraⱪta beƣirlap yüridu;
Tenimiz yǝrgǝ qaplaxti;
26Ornungdin turup bizgǝ yardǝmdǝ bolƣaysǝn!
Ɵzüngning ɵzgǝrmǝs muⱨǝbbiting sǝwǝbidin,
Bizlǝrni ⱨɵrlükkǝ qiⱪarƣaysǝn!