1Yalƣan taraza Pǝrwǝrdigarƣa yirginqliktur;
Adil jing texi Uni hursǝn ⱪilar.
2Tǝkǝbburluⱪ bilǝn birgǝ xǝrmǝndiqilik ǝgixip kelǝr;
Lekin danaliⱪ kiqik peillarƣa ⱨǝmraⱨ bolar.
3Toƣrilarning sǝmimiyliki ɵzini yetǝklǝr;
Lekin kazzaplarning ǝgriliki ɵzini wǝyran ⱪilar.
4Hudaning ƣǝzǝp künidǝ mal-dunyaning paydisi bolmas;
Lekin ⱨǝⱪⱪaniyǝt adǝmni ɵlümdin ⱪutⱪuzar.
5Kamil adǝmning ⱨǝⱪⱪaniyliⱪi ɵzini tüz yolƣa baxlar;
Yaman adǝm ɵz yamanliⱪidin yiⱪilar.
6Durus adǝmlǝrning ⱨǝⱪⱪaniyliⱪi ɵzlirini ⱪutⱪuzar;
Lekin kazzaplar ɵz ⱨiylǝ-nǝyringidin tutular.
7Rǝzil adǝm ɵlsǝ, uning ümidi yoⱪⱪa qiⱪar;
Gunaⱨkarning ümidi ahiri ⱪuruⱪ ⱪalar.
8Ⱨǝⱪⱪaniy adǝm ⱪiyinqiliⱪtin haliy ⱪilinar;
Rǝzil adǝm uning orniƣa tutular.
9Munapiⱪlar ɵz aƣzi bilǝn yeⱪinini buzar;
Lekin ⱨǝⱪⱪaniylar bilimi bilǝn ⱪutⱪuzular.
10Ⱨǝⱪⱪaniy adǝm ronaⱪ tapsa, xǝⱨǝr hux bolar;
Rǝzil adǝm ⱨalak bolsa, hǝlⱪ tǝntǝnǝ ⱪilar.
11Toƣrilarning bǝrikǝt tilǝxliri bilǝn xǝⱨǝr güllinǝr;
Lekin rǝzillǝrning tili bilǝn wǝyran bolar.
12Ɵz yeⱪinini sɵkidiƣan kixi — ǝⱪilsizdur;
Əmma yorutulƣan adǝm aƣzini yiƣar.
13Gǝp toxuƣuqi mǝhpiyǝtlǝrni axkarilar;
Sadiⱪ adǝm amanǝtkǝ hiyanǝt ⱪilmas.
14Yolyoruⱪ kǝm bolsa, ǝl-yurt yiⱪilar;
Uluƣ bir mǝsliⱨǝtqi bolsa, ǝl nijat tapar.
15Yatⱪa borun bolƣan kixi ziyan tartmay ⱪalmas;
Ⱪol berixip kepil boluxni yaman kɵrgǝn kixining ⱪuliⱪi tinq bolar.
16Xapaǝtlik ayal izzǝt-ⱨɵrmǝtni ⱪoldin bǝrmǝs;
Zorawanlar bayliⱪni ⱪoldin bǝrmǝs.
17Rǝⱨimdil ɵz-ɵzigǝ bǝht yaritar;
Rǝⱨimsiz ɵz tenini aƣritar.
18Yaman adǝmlǝrning alƣan ix ⱨǝⱪⱪi ularni aldar, bǝrikǝtsiz bolar;
Əmma ⱨǝⱪⱪaniyǝt teriƣuqi adǝm ǝmǝliy in’am alar.
19Ⱨǝⱪⱪaniyǝt adǝmgǝ ⱨayatliⱪ tapⱪuzar;
Yamanliⱪni kɵzlǝp yüridiƣan kixi ɵlümgǝ yüz tutar.
20Niyiti buzuⱪ kixi Pǝrwǝrdigarƣa yirginqliktur;
Əmma yoli diyanǝtlik kixilǝr uning hursǝnlikidur.
21Ⱪol tutuxup birlǝxsimu, yamanlar jazaƣa tartilmay ⱪalmas;
Lekin ⱨǝⱪⱪaniylarning nǝsli nijat tapar.
22Qirayliⱪ ǝmma tetiⱪsiz hotun,
Qoxⱪining tumxuⱪiƣa altun ⱨalⱪa salƣandǝktur.
23Ⱨǝⱪⱪaniylarning arzusi pǝⱪǝt yahxi mewǝ elip kelǝr;
Yamanlarning kütkini ƣǝzǝp-nǝprǝttur.
24Biraw mǝrdlǝrqǝ tarⱪatsimu, güllinǝr;
Yǝnǝ biraw berixkǝ tegixlikini ayisimu, pǝⱪǝt namratlixar.
25Mǝrd adǝm ǝtlinǝr;
Baxⱪilarni suƣarƣuqi ɵzimu suƣirilar.
26Axliⱪni satmay besiwalƣan kixi ǝlning lǝnitigǝ uqraydu;
Lekin axliⱪni setip bǝrgüqigǝ bǝrikǝt tilinǝr.
27Yahxiliⱪni izdǝp intilgǝn adǝm xapaǝt tapar;
Yamanliⱪni izdigǝn adǝm ɵzi yamanliⱪ kɵrǝr.
28Ɵz mal-duniyasiƣa tayanƣuqi yiⱪilar;
Ⱨǝⱪⱪaniy kixi yopurmaⱪtǝk kɵkirǝr.
29Ɵz ɵyigǝ azarqiliⱪ salƣan kixi xamalƣa miras bolar;
Əⱪilsiz adǝm aⱪilanining ⱪuli bolup ⱪalar.
30Ⱨǝⱪⱪaniyning beridiƣan mewisi «ⱨayatliⱪ dǝrihi»dur;
Dana kixi kɵngüllǝrni ⱨayatliⱪⱪa mayil ⱪilar.
31Ⱪaranglar, ⱨǝⱪⱪaniy adǝm bu dunyada sǝwǝnliki üqün bǝdǝl tɵligǝn yǝrdǝ,
Rǝzillǝr bilǝn gunaⱨkarlarning aⱪiwiti ⱪandaⱪ bolar?