Muⱪeddes Kalam (yǝngi yeziⱪ)

Xuhaliⱪ Bildad sɵzlǝydu — Ilgiriki dǝwrlǝrdiki azab-oⱪubǝtlǝr toƣruluⱪ guwaⱨliⱪ
1Andin Xuhaliⱪ Bildad jawabǝn mundaⱪ dedi: —
2«Sǝn ⱪaqanƣiqǝ muxularni sɵzlǝysǝn?
Aƣzingdiki sɵzlǝr küqlük xamaldǝk ⱪaqanƣiqǝ qiⱪidu?
3Tǝngri adalǝtni burmiliƣuqimu?
Ⱨǝmmigǝ Ⱪadir adilliⱪni burmilamdu?
4Sening baliliring Uning aldida gunaⱨ ⱪilƣan bolsa,
U ularnimu itaǝtsizlikining jazasiƣa tapxurƣan, halas.
5Biraⱪ ǝgǝr ɵzüng ⱨazir qin kɵnglüngdin Tǝngrini izdisǝngla,
Ⱨǝmmigǝ Ⱪadirƣa iltija ⱪilsangla,
6Əgǝr sǝn sap dil ⱨǝm durus bolƣan bolsang,
Xübⱨisizki, U sǝn üqün oyƣinidu,
Qoⱪum sening ⱨǝⱪⱪaniyliⱪingƣa tolƣan turalƣungni güllǝndüridu.
7Sǝn dǝslǝptǝ etibarsiz ⱪaralƣan bolsangmu,
Biraⱪ sǝn ahirida qoⱪum tehimu güllinisǝn.
8Xunga sǝndin ɵtünǝyki, ɵtkǝnki dǝwrlǝrdin sorap baⱪⱪin,
Ularning ata-bowilirining izdinixlirigimu kɵngül ⱪoyƣin
9(Qünki biz bolsaⱪ tünügünla tuƣulƣanmiz;
Künlirimiz pǝⱪǝt bir sayǝ bolƣaqⱪa, ⱨeqnemini bilmǝymiz).  
10 Sanga kɵrsǝtmǝ berip ɵgǝtǝlǝydiƣan ular ǝmǝsmu?
Ular ɵz kɵnglidikini sanga sɵzlimǝmdu?
11 Latⱪa bolmisa yekǝnlǝr egiz ɵsǝlǝmdu?
Ⱪomuxluⱪtiki ot-qɵplǝr susiz ɵsǝlǝmdu?
12 Ular yexil peti bolup, tehiqǝ orulmiƣan bolsimu,
Ⱨǝrⱪandaⱪ ot-qɵptin tez tozup ketidu.
13 Tǝngrini untuƣan kixilǝrning ⱨǝmmisining aⱪiwǝtliri mana xundaⱪtur;
Iplaslarning ümidi mana xundaⱪ yoⱪⱪa ketǝr.
14 Qünki uning tayanƣini qürük bir nǝrsǝ, halas;
Uning ixǝngini bolsa ɵmüqükning toridur, halas.
15 U ɵz uwisiƣa yɵlinidu, biraⱪ u mǝzmut turmaydu;
U uni qing tutuwalƣan bolsimu, biraⱪ u bǝrdaxliⱪ berǝlmǝydu.
16 U ⱪuyax astida kɵkligǝn bolsimu,
Uning pilǝkliri ɵz beƣini ⱪapliƣan bolsimu,
17 Uning yiltizliri tax dɵwisigǝ qirmixip kǝtkǝn bolsimu,
U taxlar arisida orun izdigǝn bolsimu,
18 Lekin Huda uni ornidin yuliwǝtsǝ,
Axu yǝr uningdin tenip: «Mǝn seni kɵrmigǝn!» — dǝydu.
19 Mana uning yolining xadliⱪi!
Uningdin keyin orniƣa baxⱪiliri tupraⱪtin ünidu.
20 Ⱪara, Huda durus adǝmni taxlimaydu,
Yaki yamanliⱪ ⱪilƣuqilarning ⱪolini tutup ularni yɵlimǝydu.
21 U yǝnǝ sening aƣzingni külkǝ bilǝn,
Lǝwliringni xadliⱪ awazliri bilǝn tolduridu,
22 Sanga nǝprǝtlǝngǝnlǝrgǝ xǝrmǝndilik qaplinidu,
Əskilǝrning qediri yoⱪitilidu».

■8:3 Ⱪan. 32:4; 2Tar. 19:7; Dan. 9:14

□8:4 «Sening baliliring Uning aldida gunaⱨ ⱪilƣan bolsa, U ularnimu itaǝtsizlikining jazasiƣa tapxurƣan, halas» — Bildadning bu bayani rǝⱨimsizlik bilǝn ⱪilinƣan sɵzlǝrdur; bu sɵzlǝr Ayupning yarisiƣa tuz sepip uni tehimu azabⱪa salidu. Qünki Ayupning ⱨǝsriti dǝl muxu ix tüpǝylidin boluwatatti; biraⱪ Bildadning Ayupning balilirining ɵtküzgǝn birǝr gunaⱨi toƣrisida ⱨeqⱪandaⱪ ispati yoⱪtur. Biz bolsaⱪ, uning balilirining ǝmǝliyǝttǝ ɵz gunaⱨi sǝwǝbidin ɵlmigǝnlikini bilimiz.

■8:5 Ayup 22:23

■8:8 Ⱪan. 4:32

□8:9 «Künlirimiz pǝⱪǝt bir sayǝ...» — Bildadning bu degini, uning u dǝwridiki ata-bowilirining (ɵzining zamani bilǝn selixturƣanda) intayin uzun ɵmürlük bolƣanliⱪini kɵrsitixi mumkin. (Tǝwrattiki «Yaritilix» ⱪismiƣa asasǝn, Adǝm’atimizdin baxlap Nuⱨ pǝyƣǝmbǝrning dǝwrigiqǝ nurƣun adǝmlǝr birnǝqqǝ yüz yil yaxiƣanidi).

■8:9 Yar. 47:9; 1Tar. 29:15; Ayup 7:5, 6, 7; Zǝb. 39:5, 13; 102:11; 144:4

■8:12 Zǝb. 129:5-6; Yǝr. 17:6

■8:13 Ayup 11:20; 18:14; Zǝb. 112:10; Pǝnd. 10:28

□8:18 «... Lekin Huda uni ornidin yuliwǝtsǝ, axu yǝr uningdin tenip: «Mǝn seni kɵrmigǝn!» — dǝydu» — muxu yǝrlǝrdǝ Bildad Ayup uqriƣan balayi’apǝtni xu birnǝqqǝ ixⱪa ohxatⱪan boluxi mumkin: — awwal -15-ayǝttǝ, u «yamanlarning ɵyining ƣulap ketixi» toƣruluⱪ sɵzlǝydu; ikkinqi, 16-ayǝttiki «pilǝklǝr» degǝn sɵz, ibraniy tilida «pǝrzǝntlǝr»nimu kɵrsitidu. Üqinqi, muxu ayǝttǝ bǝlkim «axu yǝr» degǝn sɵz Ayupning yurtdaxlirini kɵrsitidu; ular uni qǝtkǝ ⱪeⱪip: «Sǝndǝk Huda lǝnǝt ⱪilƣan adǝmni tonumaymiz» degǝn mǝnilǝrdimu eytilƣan boluxi mumkin.

□8:20 «... yamanliⱪ ⱪilƣuqilarning ⱪolini tutup ularni yɵlimǝydu» — yaki «...yamanliⱪ ⱪilƣuqilarni ⱪoliƣa küq bǝrmǝydu».