Muⱪeddes Kalam (yǝngi yeziⱪ)

Əysaning muhlisliri üqün dua ⱪilixi
1Əysa bu sɵzlǝrni ⱪilƣandin keyin, kɵzlirini ǝrxkǝ tikip, mundaⱪ dua ⱪildi:
— I Ata, waⱪit-saǝt yetip kǝldi; Sǝn Oƣlungni uluƣlatⱪuzƣaysǝn; buning bilǝn Oƣlungmu Seni uluƣlatⱪuzidu; 2yǝni, uning Sǝn uningƣa tapxurƣan insanlarƣa mǝnggülük ⱨayat ata ⱪilixi üqün, uningƣa pütkül ǝt igiliridin üstün ⱨoⱪuⱪ ata ⱪilƣiningdǝk, uni uluƣlatⱪuzƣaysǝn.   3Mǝnggülük ⱨayat xuki, birdinbir ⱨǝⱪiⱪiy Huda — Seni wǝ Sǝn ǝwǝtkǝn Əysa Mǝsiⱨni tonuxtin ibarǝttur. 4Mǝn Sening ǝmǝl ⱪilixim üqün tapxurƣan ixingni orundixim bilǝn Seni yǝr yüzidǝ uluƣlatⱪuzdum. 5I Ata, Sening alǝm apiridǝ boluxtin burun mǝn Ɵzüngning yeningda igǝ bolƣan xan-xǝrǝp bilǝn meni Ɵzüngning yeningda uluƣlatⱪuzƣaysǝn.  
6Sǝn bu dunyadin manga tallap bǝrgǝn adǝmlǝrgǝ Sening namingni ayan ⱪildim. Ular Seningki idi, Sǝn ularni manga bǝrding wǝ ular Sening sɵz-kalamingni tutup kǝldi. 7Ular ⱨazir Sǝn manga bǝrgǝn ⱨǝmmǝ nǝrsilǝrning Seningdin kǝlgǝnlikini bildi. 8Qünki Sǝn manga tapxurƣan sɵzlǝrni ularƣa yǝtküzdüm; ularmu bularni ⱪobul ⱪildi, xuning bilǝn Sǝndin qiⱪⱪinimni ⱨǝⱪiⱪǝtǝn bilip yǝtti ⱨǝmdǝ Sening meni ǝwǝtkǝnlikinggimu ixǝndi. 9Bularƣa dua ⱪilimǝn; bu dunyadiki adǝmlǝrgǝ ǝmǝs, bǝlki Sǝn manga bǝrgǝn adǝmlǝrgǝ dua ⱪilimǝn; qünki ular Seningkidur. 10Mening barliⱪim Seningkidur wǝ Sening barliⱪing bolsa meningkidur wǝ mǝn ularda xǝrǝp taptim.  
11Mǝn ǝmdi bu dunyada turiwǝrmǝymǝn; lekin ular bu dunyada ⱪaldi wǝ mǝn Sening yeningƣa ketiwatimǝn. I muⱪǝddǝs Ata, Sǝn manga bǝrgǝn naming arⱪiliⱪ ularni saⱪliƣinki, biz ikkimiz bir bolƣinimizdǝk, ularmu bir bolƣay. 12Mǝn ular bilǝn billǝ bolƣan waⱪtimda, Sǝn manga bǝrgǝn naming bilǝn ularni saⱪlidim ⱨǝm ⱪoƣdidim; wǝ muⱪǝddǝs yazmilardiki bexarǝtning ǝmǝlgǝ axuruluxi yolida, ularning iqidin ⱨalakǝtkǝ has bolƣan kixidin baxⱪa birimu yoⱪalmidi.    13Mana ǝmdi sening yeningƣa barimǝn. Mening xadliⱪim ularda tolup taxsun dǝp, bu sɵzlǝrni dunyadiki waⱪtimda sɵzlidim. 14Mǝn ularƣa sɵz-kalamingni tapxurdum. Mǝn bu dunyadin bolmiƣinimdǝk, ularmu bu dunyadin bolmiƣini üqün, bu dunyaning adǝmliri ulardin nǝprǝtlinidu.    15Ularni bu dunyadin ayriwǝtkǝysǝn dǝp tilimǝymǝn, bǝlki ularni rǝzil bolƣuqidin saⱪliƣaysǝn, dǝp tilǝymǝn. 16Mǝn bu dunyadin bolmiƣinimdǝk, ularmu bu dunyadin ǝmǝstur. 17Ularni ⱨǝⱪiⱪǝt arⱪiliⱪ Ɵzünggǝ muⱪǝddǝs ⱪilip atiƣuzƣaysǝn, qünki sɵz-kalaming ⱨǝⱪiⱪǝttur.    18Sǝn meni dunyaƣa ǝwǝtkiningdǝk, mǝnmu ularni dunyaƣa ǝwǝttim. 19Ularmu ⱨǝⱪiⱪǝttǝ muⱪǝddǝs ⱪilinip Ɵzünggǝ atalsun dǝp, ɵzümni Sanga has ataymǝn.  
20Mǝn yalƣuz ular üqünla ǝmǝs, yǝnǝ ularning sɵzi arⱪiliⱪ manga etiⱪad ⱪilidiƣanlar üqünmu dua ⱪilimǝn. 21Ularning ⱨǝmmisi bir bolƣay; i Ata, Sǝn mǝndǝ, mǝn Sǝndǝ bolƣandǝk, ularmu Bizdǝ bir bolƣay; xundaⱪ bolƣanda, bu dunyadikilǝr meni Sening ǝwǝtkǝnlikinggǝ ixinidu. 22Sǝn manga ata ⱪilƣan xan-xǝrǝpni ularƣa ata ⱪildimki, biz ikkimiz bir bolƣandǝk, ularmu bir bolƣay; 23yǝni mǝn ularda, sǝn mǝndǝ bolup, ular birliktǝ kamil ⱪilinƣay. Xu arⱪiliⱪ bu dunyadikilǝr meni ǝwǝtkǝnlikingni ⱨǝm meni sɵyginingdǝk ularnimu sɵygǝnlikingni bilidu.
24I Ata, Sǝn manga bǝrgǝnliringning ⱨǝmmisining mǝn bolƣan yǝrdǝ mǝn bilǝn birgǝ boluxini, xundaⱪla mening xan-xǝripimni, yǝni Sǝn alǝm apiridǝ boluxtin burun meni sɵygǝnliking üqün, manga bǝrgǝn xan-xǝrǝpni ularning kɵrüxini halaymǝn.
25I ⱨǝⱪⱪaniy Ata, bu dunyadikilǝr seni tonumiƣan, ǝmma mǝn Seni tonuymǝn wǝ bularmu meni Sening ǝwǝtkǝnlikingni bildi. 26Wǝ mǝn Sening namingni ularƣa ayan ⱪildim wǝ yǝnǝ dawamliⱪ ayan ⱪilimǝn. Xuning bilǝn, Sening manga kɵrsǝtkǝn meⱨir-muⱨǝbbiting ularda bolidu wǝ mǝnmu ularda bolay.

■17:1 Yⱨ. 12:23; 13:32.

□17:2 «Sǝn uningƣa tapxurƣan insanlar...» — grek tilida «uningƣa bǝrgǝn barliⱪ insanlar...» — demǝk, Mǝsiⱨkǝ etiⱪad ⱪilƣuqilar.

■17:2 Zǝb. 8:6; Mat. 11:27; 28:18; Luⱪa 10:22; Yⱨ. 3:35; 5:27; 1Kor. 15:25; Fil. 2:10; Ibr. 2:8.

■17:3 Yǝx. 53:11; Yǝr. 9:22

■17:4 Yⱨ. 4:34; 13:32; 14:13; 19:30.

□17:5 «I Ata, Sening alǝm apiridǝ boluxtin burun mǝn Ɵzüngning yeningda igǝ bolƣan xan-xǝrǝp bilǝn meni Ɵzüngning yeningda uluƣlatⱪuzƣaysǝn» — yaki bolmisa «I Ata, mǝn Sǝn bilǝn birgǝ igǝ bolƣan xan-xǝrǝp bilǝn meni Ɵzüng bilǝn tǝng uluƣlandurƣaysǝn».

■17:5 Yⱨ. 1:1, 2; 10:30; 14:9.

□17:6 «Sǝn bu dunyadin manga tallap bǝrgǝn adǝmlǝrgǝ Sening namingni ayan ⱪildim» — Mǝsiⱨning «Sening namingni ayan ⱪildim» eytⱪini nemini kɵrsitidu? Tǝwrat-Zǝburda Hudaning nurƣun namliri (Pǝrwǝrdigar (Yaⱨwǝⱨ), Huda (Əloⱨim), Rǝb (Adonay) ⱪatarliⱪlar) ayan ⱪilinƣandin keyin Mǝsiⱨ ⱪaysi namni ularƣa ayan ⱪilƣan? U «Ata» ǝmǝsmu?

■17:8 Yⱨ. 16:27.

□17:10 «mǝn ularda xǝrǝp taptim» — «ularda...» muxu yǝrdǝ kɵzdǝ tutulƣini bǝlkim «Sǝn manga bǝrgǝn adǝmlǝrdǝ..» bolsa kerǝk.

■17:10 Yⱨ. 16:15.

□17:11 «Sǝn manga bǝrgǝn naming arⱪiliⱪ ularni saⱪliƣinki...» — baxⱪa birhil tǝrjimisi: «Sǝn naming bilǝn manga tapxurup bǝrgǝnlǝrning Sanga bolƣan sadiⱪliⱪini saⱪliƣinki,... ». Muxu yǝrdǝ «Sǝn manga tapxurup bǝrgǝn naming» bolsa yǝnila Huda’atining Ɵz Mǝsiⱨigǝ insanlarƣa ɵgitix üqün tapxurƣan «Ata» (ibraniy tilida «Abba») degǝn ⱪimmǝtlik namidur.

□17:12 «Mǝn ular bilǝn billǝ bolƣan waⱪtimda, Sǝn manga bǝrgǝn naming bilǝn ularni saⱪlidim ⱨǝm ⱪoƣdidim;...» — baxⱪa birhil tǝrjimisi: «Sening naming bilǝn ularni saⱪlidim; Sǝn manga tapxurup bǝrgǝnlǝrning Sanga bolƣan sadiⱪliⱪini ⱪoƣdidim;... ». Bu «nam» yǝnila yuⱪiriⱪi izaⱨatta eytⱪinimizdǝk «Ata» bolsa kerǝktur. «ⱨalakǝtkǝ has bolƣan kixi» — grek tilida «ⱨalakǝtning oƣli» degǝn sɵz bilǝn ipadilinidu, u Yǝⱨuda Ixⱪariyotni kɵrsitidu, ǝlwǝttǝ. Mǝsiⱨgǝ satⱪunluⱪ ⱪilƣan kixining ⱨalakǝtkǝ yüzlinixi toƣruluⱪ bexarǝtlǝr bǝlkim «Zǝb.» 41:9, 109:1-20 wǝ «Pǝnd.» 24:22 (LXX)ni ɵz iqigǝ alsa kerǝk.

■17:12 Yǝx. 8:18; Yⱨ. 6:39; 10:28; 18:9; Ibr. 2:13.

□17:14 «mǝn bu dunyadin bolmiƣinimdǝk...» — yaki «mǝn bu dunyaƣa mǝnsup bolmiƣinimdǝk...».

■17:14 Yⱨ. 15:19.

□17:15 «rǝzil bolƣuqi» — Xǝytan, Iblis.

□17:17 «Ularni ⱨǝⱪiⱪǝt arⱪiliⱪ Ɵzünggǝ muⱪǝddǝs ⱪilip atiƣuzƣaysǝn» — «Ɵzünggǝ muⱪǝddǝs ⱪilip atiƣuzƣaysǝn» grek tilida «muⱪǝddǝslǝxtürgǝysǝn» degǝn birla sɵz bilǝn ipadilinidu. Injilda ⱨǝm Tǝwratta «muⱪǝddǝs» degǝn sɵz «pak» ⱨǝm «Hudaƣa alayitǝn atalƣan» degǝn ikki uⱪumni bildüridu.

■17:17 Zǝb. 119:142; Yⱨ. 8:4.

■17:18 Yⱨ. 20:21.

□17:19 «Ularmu ⱨǝⱪiⱪǝttǝ muⱪǝddǝs ⱪilinip ɵzünggǝ atalsun dǝp...» — «muⱪǝddǝs ⱪilinip Ɵzünggǝ atalsun» grek tilida «ularmu ⱨǝⱪiⱪǝttǝ muⱪǝddǝslǝxtürülsun» degǝn birla sɵz bilǝn ipadilinidu. Yuⱪiriⱪi izaⱨatni kɵrüng.

■17:19 1Kor. 1:2,30; 1Tes. 4:7.

■17:21 Yⱨ. 10:38; 14:11; Gal. 3:28.

■17:24 Yⱨ. 12:26; 14:3.

■17:25 Yⱨ. 15:21; 16:3, 27; 17:8.

□17:26 «mǝn Sening namingni ularƣa ayan ⱪildim» — 6-ayǝt wǝ uningdiki izaⱨatni kɵrüng.