Muⱪeddes Kalam (yǝngi yeziⱪ)

Ⱨayat pǝsilliri
1Ⱨǝrbir ixning muwapiⱪ pǝsli bar, asmanlar astidiki ⱨǝmmǝ arzuning ɵz waⱪtimu bar;
2Tuƣuluxning bir waⱪti bar, ɵlüxningmu bir waⱪti bar;
Tikix waⱪti bar, tikilgǝnni sɵküx waⱪti bar;
3Ɵltürüx waⱪti bar, saⱪaytix waⱪti bar;
Buzux waⱪti bar, ⱪurux waⱪti bar;
4Yiƣlax waⱪti bar, külüx waⱪti bar;
Matǝm tutux waⱪti bar, ussul oynax waⱪti bar;
5Taxlarni qɵriwetix waⱪti bar, taxlarni yiƣip-toplax waⱪti bar;
Ⱪuqaⱪlax waⱪti bar, ⱪuqaⱪlaxtin ɵzini tartix waⱪti bar;
6Izdǝx waⱪti bar, yoⱪaldi dǝp waz keqix waⱪtimu bar;
7Yirtix waⱪti bar, tikix waⱪti bar;
Süküt ⱪelix waⱪti bar, sɵz ⱪilix waⱪti bar;
8Sɵyüx waⱪti bar, nǝprǝtlinix waⱪti bar;
Urux waⱪti bar, tinqliⱪ waⱪti bar.
Insan Huda bekitkǝn waⱪit-pǝsillǝrni bilmǝydu
9Ixligǝn ɵz ixliginidin nemǝ payda alidu? 10Mǝn Huda insan baliliriƣa yükligǝn, ixlǝp japa tartix kerǝk bolƣan ixni kɵrgǝnmǝn. 11U ⱨǝrbir ixning waⱪti kǝlgǝndǝ güzǝl bolidiƣanliⱪini bekitkǝn; u yǝnǝ mǝnggülükni insanlarning kɵngligǝ salƣan; xunga, insan Hudaning ɵz ⱨayatiƣa baxtin ahirƣiqǝ nemini bekitkǝnlikini bilip yǝtmǝstur.
12Insanlarƣa ⱨayatida xadlinix wǝ yahxiliⱪ ⱪilixtin baxⱪa ǝwzǝl ix yoⱪ ikǝn dǝp bilip yǝttim. 13Xundaⱪla yǝnǝ, ⱨǝrbir kixining yeyix-iqixi, ɵzining barliⱪ ǝjridin ⱨuzur elixi, mana bu Hudaning sowƣisidur.
14Hudaning ⱪilƣanlirining ⱨǝmmisi bolsa, mǝnggülük bolidu, dǝp bilimǝn; uningƣa ⱨeqnǝrsini ⱪoxuxⱪa wǝ uningdin ⱨeqnǝrsini eliwetixkǝ bolmaydu; Hudaning ularni ⱪilƣanlirining sǝwǝbi insanni Ɵzidin ǝymindürüxtur. 15Ⱨazir bolƣanliri ɵtkǝndimu bolƣandur; kǝlgüsidǝ bolidiƣan ix alliⱪaqan bolƣandur; Huda ɵtkǝn ixlarni soraydu.
Adalǝtsiz ixlar
16Mǝn ⱪuyax astida yǝnǝ xu ixni kɵrdümki — soraⱪ ornida, xu yǝrdǝ ⱨeliⱨǝm rǝzillik turidu; ⱨǝⱪⱪaniyliⱪ turux kerǝk bolƣan jayda, mana rǝzillik turidu! 17Mǝn kɵnglümdǝ: «Huda ⱨǝⱪⱪaniy ⱨǝm rǝzil adǝmni soraⱪⱪa tartidu; qünki ⱨǝrbir arzu-mǝⱪsǝt wǝ ⱨǝrbir ixning ɵz waⱪti bar» — dedim.
18Mǝn kɵnglümdǝ: — Bundaⱪ boluxi insan balilirining sǝwǝbidindur; Huda ularni sinimaⱪqi, bu ixlar ular ɵzlirining pǝⱪǝt ⱨaywanlarƣa ohxax ikǝnlikini kɵrüxi üqün bolƣan, dǝp oylidim. 19Qünki insan balilirining bexiƣa kelidiƣini ⱨaywanlarƣimu kelidu, ularning kɵridiƣini ohxax bolidu. Ulardin aldinⱪisi ⱪandaⱪ ɵlgǝn bolsa, keyinkisimu xundaⱪ ɵlidu, ularda ohxaxla birla nǝpǝs bardur. Insanning ⱨaywanlardin ⱨeq artuⱪqiliⱪi yoⱪ; qünki ⱨǝmmǝ ix bimǝniliktur. 20Ularning ⱨǝmmisi bir jayƣa baridu; ⱨǝmmisi topa-qangdin qiⱪⱪan, ⱨǝmmisi topa-qangƣa ⱪaytidu. 21Kim adǝm balilirining roⱨini bilidu? U yuⱪiriƣa qiⱪamdu, buni kim bilidu? Ⱨaywanlarning roⱨi, u yǝr tegigǝ qüxǝmdu, kim bilidu?
22Xuning bilǝn mǝn insanning ɵz ǝjridin ⱨuzurlinixidin artuⱪ ix yoⱪtur, dǝp kɵrdum; qünki mana, bu uning nesiwisidur; qünki uni ɵzidin keyin bolidiƣan ixlarni kɵrüxkǝ kim elip kelidu?

□3:1 «Ⱨǝrbir ixning muwapiⱪ pǝsli bar, ... ⱨǝmmǝ arzuning ɵz waⱪtimu bar» — oⱪurmǝnlǝr ixlarning «ɵz pǝsli» yaki «ɵz waⱪti» degǝnning «Huda bekitkǝn waⱪit»ni yaki bolmisa pǝⱪǝt «muwapiⱪ, toƣra kǝlgǝn waⱪit»ni kɵrsitidiƣanliⱪini pǝrⱪ etixi kerǝk.

■3:5 1Kor. 7:5

■3:9 Top. 1:3

□3:11 «U ⱨǝrbir ixning waⱪti kǝlgǝndǝ güzǝl bolidiƣanliⱪini bekitkǝn...» — bu ayǝt intayin muⱨim. Huda insanlarƣa, kɵnglidǝ ⱨayatining mǝnggülük ǝⱨmiyitini sezixni ata ⱪilƣan. Biraⱪ ɵz gunaⱨliri tüpǝylidin, insanlar buning ǝⱨmiyitining zadi nemǝ ikǝnlikini, Hudaning ɵzliri üqün bekitkǝn pilanining waⱪti-saǝtlirini bilip yǝtmǝydu. «Ⱪoxumqǝ sɵz»imizdǝ uning üstidǝ tohtilimiz.

□3:15 «Huda ɵtkǝn ixlarni soraydu» — «soraydu» degǝnning ibraniy tilidiki baxⱪa mǝnisi «izdǝydu». «Ɵtkǝn ixlarni soraydu» degǝnning mǝnisi: «Huda ɵtkǝn ixlarni sürüxtürüp adǝmlǝrdin ⱨesab alidu» degǝnlik bolsa kerǝk. Baxⱪa birhil tǝrjimisi: «Huda ɵtkǝn ixlarni yǝnǝ bolƣuzidu».

■3:20 Yar. 3:19