1Apu, dayawon daka an Dios ku ya Patul ku. Ipadayaw kut nangamung di ngadan mu. 2Om, dayawon dakah kabigabigat ya ipadayaw kut nangamung di kinatag-em.

3APU DIOS, nakattag-e ka ya he-ay lebbengnan madayaw. Maid di ohan pakaawat hi kinatag-em. 4Ahi daka pakatbalon nadah mahayhaynod an holag di tatagu gapu nadah umipamodwong an inat mu. Ya ahida ipainilah tatagu dadiyen inat mu gapuh ongal an kabaelam. 5-6Ipainilak* di kinatag-em ya nonomnomok nadan umipamodwong an inat mu. Takon nadan tatagu ya kalkalyon da damdama dadiyen inat mu. 7Ya kalkalyon da boy mipanggep hi kaphod mu ya maan-anla dan mangikankantah mipanggep hi ulem.

8APU DIOS, makulug an maule ka ya huhhummok ka. Adika kabinnoh-ol ya adi malumman di pamhod mu. 9Maphod di atom am-in hi tagu ya maule kan am-in hanadah lintum.

10APU DIOS, dayawon dakan am-in hanadah lintum. Ya am-in nadan makangngun-unud ke he-a ya mumpasalamat da. 11-12Ya kalkalyon day kinatag-en nan pun-ap-apuwam ya nan ongal an kabaelam an mangat nadah inat mu ta mipainilah katagutagu. 13Munnanong ta nangamung di pun-ap-apuwam ta he-ay Patul ta nangamung.

Hi APU DIOS ya ipaannung nan am-in di kalyona. Ya mipatiboy ulena di am-in nadah atona. 14Te baddangana nadan maligatan ya pakodholonay nomnom nadan nadismaya.

15He-ay pangitangadan am-in nadan matagun lintum hi mahapul da. Ya idat muy itanud da nah tiempon panapulan da. 16Adida makudangan hi ngannen mahapul da te idat mun am-in.

17Hi APU DIOS ya maphod am-in di atona ya makaulle. 18Ya makihayyup nadah makulug an mumpahpahmok ke hiya. 19Idat nan am-in di mahapul nadan mangun-unud ke hiya ya donglonay pumpahmokan dat ihwang na dida. 20Ipaptok na nadan ongal di pamhod dan hiya, mu nadan mangmangngat hi gaga-iho ya dadagona dida.

21Dayawok hi APU DIOS. Am-in takun lintuna, dayawon takut nangamung di ngadana.