1Dayawon daka, APU DIOS an paddungnay batun kihikugak. He-ay nanuddun ha-on an makigubat ya he-ay nangidat hi olot ku. 2He-a boy gayyum kun mamaddang ya mangihwang ke ha-on. Ya he-ay kihikugak. Pumbalinonak an ap-apun di tataguh kabobboble.

3APU DIOS, kon nganne anhan di tagu ta em pakahangngudon an ipaptok? 4Hay biyag da ya kay hinhap-ud ya abu weno kay mungkala-un a-o.

5APU DIOS, daan mo anhan ta ibughul muy kabunyan ta duma-ul ka. Dapaom di bibilid ta umahuk da. 6Ipaalim di kil-at ta mawahit day buhul mu ya pumpanam didat mamtik da. 7Daan mo anhan ta he-an wadah langit ya iadang muy taklem ta ihwangak hi aton di buhul kun nalpuh udum an boble. Dehtun paddungnay wadaak hi adallom an danum. 8Dadiyen tatagun nalpuh udum an boble ya makallangkak da. Takon di nunsapata da ya munlangkak da metlaing.

9Mungkantaak hi balun kanta ya mun-ayyudingak hi pundayaw kun he-a, Apu Dios. 10Gapuh baddang mu ya mangapput di papatul hi gubat. He-ay mangihwang nah muttatyum an hi David. 11Apu, ihwangak nadah buhul kun nalpuh udum an boblet adiyak patayon. Makallangkak dan tatagu. Takon di nunsapata dan hay makulug di kalyon da ya kimmali da ot ya abu on langkak.

12Hana ot ta nadan iimbabale min linalakin kakat-agu ya umongal dan umat da nadah maluwab an intanom ya nadan iimbabale min binabai ya umongal dan mamaddikit an umat da nadah napaot an mungkaphod an tukud an nialkus hi balen di patul. 13Ya hana ot ta mamapnuy aalang mih inani mi. Hana ot ta nadan kudal mi ya mapnuh kalibulibun kalnero 14ya babakan numpun-impa.

Apu, adim anhan iabulut an hogpon di buhul miy boble mi. Adim iabulut an waday ibtik di buhul mi ke dakami. Ya hana ot ta maid di katatakut an maat tuh boble min gumapuh pumpokawan di tatagu.

15Deket ipaannung mun maat am-in dadiye nah ohan boble ya nunna-ud an mun-am-amlong nadan bimmoble. Ya umamlong nadan tatagun hay Dios da ya nan AP-APU.