1Ihwangak anhan APU DIOS hi gaga-ihon tatagun pumapatte. 2Dida ya mumplanuplanu dat nangamung hi gaga-ihon aton da. Ya diday huhhumlun hi pun-aawwitan di tatagu. 3Hay kali da ya mialig nah gitan di ulog an pumate.*

4APU DIOS, ihwangak anhan hi gaga-ihon aton di tatagun pumapatte te pinhod dan abun patayonak. 5Dadiyen mumpahhiyan tatagu ya paddungnay inih-od day bitun kaknaak. Takon di daanay pangayak ya dehdiy inih-od da.

6APU DIOS, kanak di “He-ay Dios ku. Donglom anhan di dasal kun mumpahpahmok ke he-a.” 7APU an Nakattag-en Dios an ongal di kabaelana, inihwangak nadah ek nakigubagubatan. 8Adim iabulut an maat di pinpinhod nadan gaga-ihon tatagu, mu dadagom nadan implanu dan aton te deket umannung dadiye ya mumpahhiya da mo.

9Pumbalinom an dumadag ot anhan ke dida nadan gaga-ihon implanu dan panadag dan ha-on. 10Ogaham didah apuy weno ogahom didah bitun adallom ta adida mabalin an bumudal. 11Ya pumbalinom an adi maat di implanun nadan mumpabahul hi langkak hi ibba da. Ya nada ken pumapatte ya hana ot ta nadan gaga-ihon atoaton day manadag ke dida.

12APU DIOS, inilak an he-a ya itakdog muy kalebbengan nadan nawotwot. 13Nunna-ud an dayawon daka nadah makangngun-unud ke he-a, ya nunna-ud an ahida makihayyup ke he-a.